Rs141cr | ట్రాఫిక్ కష్టాలకు శాశ్వత చెక్
Rs141cr | ట్రాఫిక్ కష్టాలకు శాశ్వత చెక్
నిమిషాల్లోనే గమ్యస్థానానికి సాఫీగా ప్రయాణం
భాగ్యనగర వాసుల దశాబ్దాల కల సాకారం
వచ్చే నెల నుంచి అందుబాటులోకి రానున్న బాచుపల్లి ఫ్లై ఓవర్
ముఖ్యమంత్రి చేతుల మీదుగా నగర ప్రజలకు అంకింతం
Rs141cr | హైదరాబాద్, ఆంధ్రప్రభ : విశ్వనగరంగా శరవేగంగా విస్తరిస్తున్న హైదరాబాద్లో మౌలిక సదుపాయాల కల్పనలో మరో అద్భుత ఘట్టం ఆవిష్కృతం కాబోతోంది. నగర ప్రజలు ఎప్పుడెప్పుడా అని వేయికళ్లతో ఆసక్తిగా ఎదురుచూస్తున్న బాచుపల్లి ఫ్లైఓవర్ నిర్మాణం పూర్తయింది. ప్రారంభోత్సవానికి సర్వం సిద్ధంగా ఉన్న ఈ వంతెన అందుబాటులోకి వస్తే గంటల తరబడి సాగే ట్రాఫిక్ నరకానికి శాశ్వత పరిష్కారం దొరుకుతుంది. హైదరాబాద్ నగరంలో అత్యంత వేగంగా, అత్యద్భుతంగా అభివృద్ధి చెందుతున్న కారిడార్లలో బాచుపల్లి మొదటి వరసలో ఉంటుంది. రోజూ లక్షలాది వాహనాల రాకపోకలతో ఈ ప్రాంతం విపరీతమైన రద్దీతో ఉంటుంది. ముఖ్యంగా ఉదయం ఆఫీసులకు వెళ్లే సమయంలో, సాయంత్రం ఇళ్లకు వచ్చే వేళల్లో ఉద్యోగులు ట్రాఫిక్ జామ్లో చిక్కుకుని నరకయాతన అనుభవిస్తున్నారు. ఇక్కడ నిర్మించిన సరికొత్త ఫ్లైఓవర్ అధికారికంగా ప్రారంభమైతే ఈ రద్దీ సమస్యకు పూర్తిగా చెక్ పడుతుంది. వాహనదారులు ఎలాంటి ఆటంకాలు లేకుండా తమ గమ్యస్థానాలకు వేగంగా చేరుకుంటారు. విలువైన ప్రయాణ సమయం ఆదా అవడంతో పాటు ఇంధన ఖర్చు, మానసిక ఒత్తిడి కూడా తగ్గుతాయి. ఇక బాచుపల్లి ఫ్లైఓవర్ సుమారు 1.3 కిలోమీటర్ల పొడవుతో నిర్మించారు. అత్యాధునికమైన 6 లేన్ల ఫ్లైఓవర్. దీని నిర్మాణానికి హెచ్ఎండీఏ ఆధ్వర్యంలో మొత్తం రూ.141 కోట్లు ఖర్చు చేశారు.
నగరంలోని పలు ప్రాంతాలకు వారధి
నిశితంగా పరిశీలిస్తే బాచుపల్లి ఫ్లైఓవర్ కేవలం ఒక సిమెంట్ వంతెన మాత్రమే కాదు.. ఇది పలు కీలక ప్రాంతాలను వేగంగా అనుసంధానం చేసే ఒక అత్యుత్తమ వారధి. దీని ద్వారా బాచుపల్లి, మియాపూర్, నిజాంపేట్ లాంటి ముఖ్యమైన రద్దీ ప్రాంతాల మధ్య కనెక్టివిటీ అమాంతం పెరిగిపోతుంది. వీటితో పాటు సమీపంలో ఉన్న భారీ ఐటీ కారిడార్లు, నివాస సముదాయాలకు కూడా ప్రయాణం ఎంతో సులువుగా మారుతుంది. చుట్టుపక్కల ఐటీ కంపెనీల్లో నిత్యం విధులు నిర్వర్తించే వేలాది మంది టెక్కీలకు ఈ ఫ్లైఓవర్ రాక అక్షరాలా ఒక అద్భుత వరం.
Rs141cr | వేగంగా విస్తరిస్తున్న వాయువ్య హైదరాబాద్..
వాయువ్య హైదరాబాద్ (నార్త్-వెస్ట్ హైదరాబాద్) ప్రాంతం ప్రస్తుతం పట్టణీకరణలో శరవేగంగా దూసుకుపోతోంది. ఆకాశమంత ఎత్తులో వెలుస్తున్న భారీ అపార్ట్మెంట్లు, వాణిజ్య సముదాయాలతో ఆ ప్రాంత రూపురేఖలు పూర్తిగా మారిపోయాయి. జనాభా అనూహ్యంగా పెరుగుతున్న కొద్దీ వారి అవసరాలకు తగినట్లుగా రహదారులు, మౌలిక వసతులను మెరుగుపరచడం ప్రభుత్వం ముందున్న అతిపెద్ద సవాలు. ఈ సవాలును సమర్థవంతంగా అధిగమించే దిశగా ఈ బాచుపల్లి ఫ్లైఓవర్ భారీ ప్రాజెక్టు ఒక కీలక మైలురాయిగా నిలిచిపోతుంది. ఆధునిక సాంకేతికతతో నిర్మించిన ఈ వంతెనతో నగరంలో రవాణా వ్యవస్థ సరికొత్త రూపు సంతరించుకుంటోంది.
Rs141cr | భవిష్యత్ అవసరాలకు అనుగుణంగా..
హైదరాబాద్ మహానగరాన్ని భవిష్యత్తు అవసరాలకు అనుగుణంగా (ఫ్యూచర్-రెడీ సిటీగా) తీర్చిదిద్దడంలో ఇటువంటి ప్రాజెక్టుల పాత్ర ఎంతో కీలకం అని చెప్పాలి. ట్రాఫిక్ రహిత, వేగవంతమైన ప్రయాణ సౌకర్యాలు అందుబాటులో ఉన్నప్పుడే నగరానికి దేశవిదేశాల నుంచి పెట్టుబడులు భారీగా వస్తాయి. తద్వారా పరిసర ప్రాంతాల్లో రియల్ ఎస్టేట్ రంగం కూడా ఊహించని స్థాయిలో అభివృద్ధి చెందుతుంది. బాచుపల్లి ఫ్లైఓవర్ లాంటి ఆధునిక నిర్మాణాలు మన నగర ఖ్యాతిని మరింతగా పెంచుతాయి. దశాబ్దాల నిరీక్షణకు తెరదించుతూ, ప్రయాణికులకు సరికొత్త అనుభూతిని పంచేందుకు బాచుపల్లి వారధి సర్వాంగ సుందరంగా ముస్తాబైంది. వచ్చే నెలలో ముఖ్యమంత్రి రేవంత్ రెడ్డి చేతుల మీదుగా ఈ వారధిని నగర ప్రజలకు అంకింతం ఇవ్వనున్నారు.
CLICK HERE TO READ MORE : 2.50 Cr | కటీఫ్ చెప్పనున్న తెలంగాణ
