మెగా డీఎస్సీతో ఉద్యోగాల జాతర..

మెగా డీఎస్సీతో ఉద్యోగాల జాతర..

యువతకు అవకాశాలు, వైసీపీకి అసహనం: మంత్రి గొట్టిపాటి

పల్నాడు ప్రతినిధి, ఆంధ్రప్రభ: ఆంధ్రప్రదేశ్‌లో మెగా డీఎస్సీ ద్వారా వేలాది మంది నిరుద్యోగ యువత జీవితాల్లో కొత్త ఆశలు నింపుతున్నామని రాష్ట్ర మంత్రి గొట్టిపాటి రవికుమార్ తెలిపారు. మెగా డీఎస్సీకి రాష్ట్రవ్యాప్తంగా లభిస్తున్న విశేష స్పందనను చూసి ఓర్వలేకే వైసీపీ నేతలు కూటమి ప్రభుత్వంపై దుష్ప్రచారం చేస్తున్నారని విమర్శించారు.

ఈ సందర్భంగా మంత్రి మాట్లాడుతూ, గత వైసీపీ ప్రభుత్వం అధికారంలో ఉన్న ఐదేళ్ల కాలంలో ఉద్యోగాల భర్తీని పూర్తిగా నిర్లక్ష్యం చేసిందన్నారు. నిరుద్యోగ యువతకు అవకాశాలు కల్పించడంలో వైసీపీ విఫలమైందని, ఇప్పుడు మెగా డీఎస్సీపై విమర్శలు చేసే నైతిక హక్కు కూడా ఆ పార్టీకి లేదని పేర్కొన్నారు.

కూటమి ప్రభుత్వం చేపట్టిన మెగా డీఎస్సీ ద్వారా వేలాది ఉపాధ్యాయ ఉద్యోగాలు భర్తీ అవుతున్నాయని, దీని వల్ల అనేక కుటుంబాలకు భరోసా కలుగుతోందన్నారు. యువతకు ఉద్యోగ అవకాశాలు లభిస్తుండటం వైసీపీకి అసహనంగా మారిందని వ్యాఖ్యానించారు.

యువత భవిష్యత్తుపై వైసీపీకి ఎలాంటి చిత్తశుద్ధి లేదని, అధికారంలో ఉన్నప్పుడు ఉద్యోగాల భర్తీని పక్కనపెట్టి ఇప్పుడు విమర్శలు చేయడం విచారకరమని అన్నారు. రాష్ట్ర అభివృద్ధి, ఉపాధి అవకాశాల కల్పన కూటమి ప్రభుత్వ ప్రధాన అజెండా అని స్పష్టం చేశారు.

అదే సమయంలో వైసీపీ మాత్రం ప్రజల్లో గందరగోళం సృష్టించే దుష్ప్రచారానికే పరిమితమైందని మంత్రి మండిపడ్డారు. రాష్ట్ర యువత భవిష్యత్తు కోసం ప్రభుత్వం కట్టుబడి పనిచేస్తోందని, ఇచ్చిన హామీలను అమలు చేస్తూ ముందుకు సాగుతోందని తెలిపారు.

ఫొటో క్యాప్షన్: మెగా డీఎస్సీ, ఉద్యోగాల భర్తీపై మాట్లాడుతున్న మంత్రి గొట్టిపాటి రవికుమార్.