raju37yrs 2014batch | బందోబస్తు ముగించుకుని వస్తుండగా విషాదం..

raju37yrs 2014batch | పిడుగుపాటుకు కానిస్టేబుల్ మృతి.. ఇద్దరు చిన్నారులకు తండ్రి దూరం

raju37yrs 2014batch | విధి నిర్వహణ అనంతరం మృత్యువు కబళించిన ఏఆర్ కానిస్టేబుల్
ఇద్దరు చిన్నారులకు తండ్రిని దూరం చేసిన పిడుగు
ఉల్పర గ్రామంలో విషాద ఛాయలు.. కన్నీరుమున్నీరైన కుటుంబం
కుటుంబానికి అండగా ఉంటామని పోలీసు శాఖ హామీ
విధి పట్ల నిబద్ధతతో గుర్తింపు పొందిన రాజు

ఉప్పునుంతల, ఆంధ్రప్రభ: ప్రజల భద్రత కోసం విధులు నిర్వర్తించి, ఇంటికి చేరుకుని కుటుంబంతో గడపాలని ఆశించిన ఓ పోలీసు కానిస్టేబుల్‌ను విధి వక్రించింది. ముఖ్యమంత్రి పర్యటన బందోబస్తు బాధ్యతలు విజయవంతంగా పూర్తి చేసుకుని స్వగ్రామానికి బయలుదేరిన కొద్ది గంటల్లోనే పిడుగు రూపంలో మృత్యువు అతడిని కబళించింది. నాగర్‌కర్నూల్ జిల్లాలో చోటుచేసుకున్న ఈ ఘటన పోలీసు శాఖను, గ్రామాన్ని, కుటుంబ సభ్యులను తీవ్ర విషాదంలో ముంచెత్తింది.

నాగర్‌కర్నూల్ జిల్లా ఉప్పునుంతల మండలం ఉల్పర గ్రామానికి చెందిన ముద్దమల్ల రాజు (37) 2014 బ్యాచ్‌కు చెందిన ఆర్మ్డ్ రిజర్వ్ కానిస్టేబుల్. ప్రస్తుతం నాగర్‌కర్నూల్ ఏఆర్ విభాగంలో విధులు నిర్వహిస్తున్న ఆయన, క్రమశిక్షణకు మారుపేరుగా సహచరుల మన్ననలు పొందారు.

ముఖ్యమంత్రి రేవంత్ రెడ్డి పర్యటన నేపథ్యంలో సోమశిల ప్రాంతంలో ఏర్పాటు చేసిన బందోబస్తు విధుల్లో రాజు గత రెండు రోజులుగా నిరంతరం పాల్గొన్నారు. ఎండలు, వర్షాలు, అలసటలను లెక్కచేయకుండా విధి నిర్వహణలో నిమగ్నమైన ఆయన, శుక్రవారం సాయంత్రం విధులు ముగించుకుని స్వగ్రామానికి బయలుదేరారు. ఇంటికి చేరుకుని భార్యా పిల్లలను చూసి ఊరట పొందాలనుకున్న ఆ ప్రయాణమే ఆయన జీవితంలో చివరి ప్రయాణంగా మారుతుందని ఎవరూ ఊహించలేదు.

మామిళ్లపల్లి గ్రామం సమీపానికి చేరుకున్న సమయంలో మూత్ర విసర్జన కోసం వాహనం దిగిన రాజుపై అకస్మాత్తుగా పిడుగు పడింది. ఒక్క క్షణంలో జరిగిన ఈ విషాద ఘటనతో ఆయన అక్కడికక్కడే ప్రాణాలు కోల్పోయినట్లు స్థానికులు తెలిపారు. కొద్ది సేపటి క్రితం వరకు సహచరులతో మాట్లాడిన వ్యక్తి, క్షణాల్లో నిశ్చల దేహంగా మారిపోవడం అందరినీ కలచివేసింది.

సమాచారం అందుకున్న ఉప్పునుంతల పోలీసులు వెంటనే సంఘటనా స్థలానికి చేరుకుని మృతదేహాన్ని నాగర్‌కర్నూల్ ప్రభుత్వ ఆసుపత్రికి తరలించారు. అనంతరం కేసు నమోదు చేసి దర్యాప్తు ప్రారంభించారు.

రాజు మృతితో ఆయన కుటుంబం శోకసంద్రంలో మునిగిపోయింది. భార్యతో పాటు ఇద్దరు కుమారులు తండ్రిని కోల్పోయి కన్నీరుమున్నీరుగా విలపిస్తున్నారు. కుటుంబానికి అండగా నిలిచిన వ్యక్తి ఒక్కసారిగా దూరమవడంతో వారి బాధ వర్ణనాతీతంగా మారింది. గ్రామస్థులు, బంధువులు ఇంటికి చేరుకుని కుటుంబ సభ్యులను ఓదార్చేందుకు ప్రయత్నిస్తున్నప్పటికీ వారి ఆవేదనను ఆపడం ఎవరి వల్లా కావడం లేదు.

రాజు మరణవార్తతో ఉల్పర గ్రామంలో విషాద ఛాయలు అలుముకున్నాయి. గ్రామ ప్రజలు పెద్ద సంఖ్యలో ఆయన నివాసానికి చేరుకుని నివాళులర్పించారు. సహచర పోలీసు సిబ్బంది కూడా తీవ్ర దిగ్భ్రాంతికి గురయ్యారు.

ఈ ఘటనపై నాగర్‌కర్నూల్ జిల్లా ఎస్పీ డాక్టర్ సంగ్రామ్ సింగ్ జీ పాటిల్ తీవ్ర సంతాపం వ్యక్తం చేశారు. విధి నిర్వహణ అనంతరం చోటుచేసుకున్న ఈ విషాద ఘటన బాధాకరమని పేర్కొంటూ, రాజు కుటుంబ సభ్యులకు ప్రగాఢ సానుభూతి తెలిపారు. పోలీసు శాఖ తరఫున అన్ని విధాలా అండగా ఉంటామని హామీ ఇచ్చారు.

విధి నిర్వహణలో నిత్యం ప్రజల భద్రత కోసం కష్టపడే ఓ పోలీసు జవాను, ఇంటి గడప దాటకముందే ప్రకృతి విపత్తుకు బలవడం అందరినీ కలచివేస్తోంది. ప్రజల కోసం విధులు నిర్వర్తించిన రాజు సేవలను సహచరులు, గ్రామస్థులు ఎప్పటికీ గుర్తుంచుకుంటామని చెబుతున్నారు.

click here to read more

also read Support teams | నలుగురు గల్లంతు.. ఒకరి మృతదేహం లభ్యం