SeniorCongressLeader | శాఖల కేటాయింపుపై అసంతృప్తి వ్యక్తం చేసిన సీనియర్ నేత
SeniorCongressLeader | శాఖల కేటాయింపుపై అసంతృప్తి వ్యక్తం చేసిన సీనియర్ నేత
పరిస్థితిని చక్కదిద్దేందుకు బెంగళూరుకు రాహుల్ గాంధీ
SeniorCongressLeader | ఆంధ్రప్రభ వెబ్ డెస్క్: కర్ణాటక కాంగ్రెస్లో అంతర్గత విభేదాలు మరోసారి బహిర్గతమయ్యాయి. రాష్ట్ర మంత్రివర్గంలో శాఖల కేటాయింపుపై అసంతృప్తి వ్యక్తం చేస్తూ సీనియర్ కాంగ్రెస్ నేత రామలింగా రెడ్డి మంత్రి పదవికి రాజీనామా చేసినట్లు రాజకీయ వర్గాల్లో చర్చ జరుగుతోంది. ఈ పరిణామం రాష్ట్ర కాంగ్రెస్లో కలకలం రేపింది.
మంత్రివర్గ విస్తరణ అనంతరం రామలింగా రెడ్డికి నీటిపారుదల శాఖ కేటాయించగా, ఆయన మాత్రం బెంగళూరు నగరాభివృద్ధి శాఖను ఆశించినట్లు తెలుస్తోంది. తన సీనియారిటీ, రాజకీయ అనుభవానికి తగిన ప్రాధాన్యం ఇవ్వలేదనే భావనతో ఆయన అసంతృప్తికి గురైనట్లు పార్టీ వర్గాలు పేర్కొంటున్నాయి.
రామలింగా రెడ్డి రాజీనామా నేపథ్యంలో కాంగ్రెస్ అధిష్ఠానం అప్రమత్తమైంది. పరిస్థితిని సమీక్షించి అసంతృప్తి నేతలతో చర్చలు జరిపేందుకు కాంగ్రెస్ అగ్రనేత రాహుల్ గాంధీ సోమవారం బెంగళూరుకు చేరుకోనున్నారు. పార్టీ జాతీయ అధ్యక్షుడు మల్లికార్జున ఖర్గే కూడా ఈ పరిణామాలను నిశితంగా గమనిస్తున్నట్లు సమాచారం.
రాజీనామా అంశంపై పార్టీ నాయకత్వం త్వరలో నిర్ణయం తీసుకునే అవకాశం ఉంది. రాష్ట్రంలో కాంగ్రెస్ ప్రభుత్వం ఏర్పడిన తర్వాత శాఖల కేటాయింపుల విషయంలో నెలకొన్న అసంతృప్తి బహిరంగంగా వెలుగులోకి రావడం రాజకీయంగా ప్రాధాన్యం సంతరించుకుంది. ఈ వివాదాన్ని అధిష్ఠానం ఎలా పరిష్కరిస్తుందన్నది ఆసక్తికరంగా మారింది.
