ఫీడర్ ఛానల్ పనులను పరిశీలించిన జిల్లా కలెక్టర్

ఫీడర్ ఛానల్ పనులను పరిశీలించిన జిల్లా కలెక్టర్

శ్రీ సత్య సాయి బ్యూరో, ఆంధ్రప్రభ : జిల్లాలో నీటి సంరక్షణకు ప్రాధాన్యతనిస్తూ ప్రభుత్వం చేపడుతున్న కార్యక్రమాల అమలుపై జిల్లా కలెక్టర్ ఏ. శ్యామ్ ప్రసాద్ శనివారం స్వయంగా పరిశీలన చేపట్టారు. పెనుకొండ నియోజకవర్గంలోని రాంపురం గ్రామపంచాయతీ పరిధిలో ‘జలధార – జల హారతి’ కార్యక్రమంలో భాగంగా జరుగుతున్న ఉపాధి హామీ పనులను ఆయన పరిశీలించి, పనుల పురోగతిపై అధికారులకు పలు సూచనలు చేశారు. మరవపల్లి చెరువు నుండి చెర్లోపల్లి చెరువు వరకు చేపడుతున్న ఫీడర్ ఛానల్ నిర్మాణ పనులను కలెక్టర్ ప్రత్యేకంగా తనిఖీ చేశారు.

సుమారు 4,000 మీటర్ల పొడవునా కొనసాగుతున్న ఈ పనులు రూ.19.81 లక్షల అంచనా వ్యయంతో జరుగుతున్నాయి. ఈ ఫీడర్ ఛానల్ ద్వారా ఒక చెరువులోని నీటిని మరొక చెరువుకు మళ్లించే వీలుండడంతో, వర్షకాలంలో నీటి నిల్వ సామర్థ్యం పెరగడంతో పాటు భూగర్భ జలాల స్థాయి కూడా మెరుగుపడుతుందని అధికారులు వివరించారు. పరిశీలన సందర్భంగా పనుల్లో నిమగ్నమైన కూలీలతో కలెక్టర్ నేరుగా మాట్లాడారు. ప్రస్తుతం 262 మంది కూలీలు ఈ పనుల్లో పాల్గొంటున్నారని, రోజుకు ఒక్కొక్కరికి రూ.307 చొప్పున వేతనం అందుతోందని తెలిపారు.

వేతనాలు సకాలంలో తమ ఖాతాల్లో జమ అవుతున్నాయని కూలీలు కలెక్టర్‌కు తెలియజేశారు. దీనిపై స్పందించిన కలెక్టర్, ఉపాధి హామీ పథకం ద్వారా గ్రామీణ ప్రజలకు ఉపాధి కల్పించడం మాత్రమే కాకుండా, గ్రామాల అభివృద్ధికి దోహదపడే స్థిరమైన ఆస్తులను సృష్టించడమే లక్ష్యమని అన్నారు. పనుల నాణ్యతను పరిశీలించిన కలెక్టర్ సంతృప్తి వ్యక్తం చేశారు. పనులు నాణ్యతతో కొనసాగుతున్నాయని పేర్కొంటూ, ఈ పనులను సమర్థంగా నిర్వహిస్తున్న మేట్ మౌనికను ప్రత్యేకంగా అభినందించారు. అలాగే ఉపాధి హామీ సిబ్బంది కృషిని ప్రశంసించారు. భవిష్యత్తులో కూడా ఇదే విధంగా నాణ్యతను కాపాడాలని సూచించారు. ఈ సందర్భంగా ఆయన 100 రోజుల ఉపాధి హామీ ప్రణాళికలో భాగంగా నీటి సంరక్షణ పనులకు అధిక ప్రాధాన్యత ఇవ్వాలని అధికారులను ఆదేశించారు.

చెరువులు, కాల్వలు, ఫీడర్ ఛానళ్లు వంటి పనులు గ్రామీణ ప్రాంతాల్లో నీటి నిల్వ సామర్థ్యాన్ని పెంచి, వ్యవసాయానికి బలమైన మద్దతు ఇస్తాయని అన్నారు. ప్రతి గ్రామంలో నీటి వనరులను పునరుద్ధరించే దిశగా ప్రణాళికాబద్ధంగా చర్యలు చేపట్టాలని సూచించారు. ఈ కార్యక్రమంలో ఎంపీడీవో ఉమాదేవి, తహశీల్దార్ స్వాతి, ఏపీవో సంజీవరెడ్డి, నీటి పారుదల శాఖ అధికారులు, పంచాయతీ సిబ్బంది పాల్గొన్నారు.

అధికారులు సమన్వయంతో పనిచేస్తూ, ప్రభుత్వ లక్ష్యాలను సమర్థంగా అమలు చేయాలని కలెక్టర్ స్పష్టం చేశారు. మొత్తంగా, రాంపురం ప్రాంతంలో జరుగుతున్న ఈ ఫీడర్ ఛానల్ పనులు స్థానికంగా నీటి సమస్యలను తగ్గించడంలో కీలక పాత్ర పోషించనున్నాయని, గ్రామీణాభివృద్ధికి ఇది ఒక ఆదర్శంగా నిలవాలని ప్రజలు ఆశాభావం వ్యక్తం చేస్తున్నారు.