Pink E-Rickshaw | మహిళల కోసం ‘పింక్ ఈ-రిక్షా’కు శ్రీకారం
Pink E-Rickshaw | మహిళల కోసం ‘పింక్ ఈ-రిక్షా’కు శ్రీకారం
ఆంధ్రప్రభ, వెబ్డెస్క్: మహారాష్ట్ర ముఖ్యమంత్రి దేవేంద్ర ఫడణవీస్ సతీమణి అమృత ఫడణవీస్ ముంబై వీధుల్లో స్వయంగా ఈ-రిక్షా నడిపి అందరి దృష్టిని ఆకర్షించారు. ప్రపంచ పర్యావరణ దినోత్సవం సందర్భంగా నిర్వహించిన ప్రత్యేక కార్యక్రమంలో భాగంగా, మహిళల కోసం రూపొందించిన ‘పింక్ ఈ-రిక్షా’ ప్రాజెక్టును ఆమె ప్రారంభించారు.
మహిళల్లో ఆత్మవిశ్వాసం పెంపే లక్ష్యం
మహిళా డ్రైవర్లకు ప్రోత్సాహం అందించడంతో పాటు, వారిలో ఆత్మవిశ్వాసాన్ని పెంపొందించడమే ఈ కార్యక్రమం ప్రధాన ఉద్దేశమని అమృత ఫడణవీస్ పేర్కొన్నారు. మహిళలు అన్ని రంగాల్లో ముందుకు రావాలని, స్వయం ఉపాధి అవకాశాలను సద్వినియోగం చేసుకోవాలని ఆమె సూచించారు.
పర్యావరణ హితం.. ఉపాధికి బాట
పర్యావరణ పరిరక్షణకు తోడ్పడే విద్యుత్ వాహనాల వినియోగాన్ని ప్రోత్సహించే లక్ష్యంతో ఈ ప్రాజెక్టును ప్రారంభించినట్లు నిర్వాహకులు తెలిపారు. ‘పింక్ ఈ-రిక్షా’ పథకం ద్వారా సుమారు వెయ్యి మంది మహిళలకు ఉపాధి అవకాశాలు కల్పించనున్నట్లు వెల్లడించారు.
మహిళా సాధికారతకు కొత్త ముందడుగు
మహిళా సాధికారతతో పాటు హరిత రవాణా వ్యవస్థను ప్రోత్సహించే ఈ కార్యక్రమం విశేష ఆదరణ పొందుతోంది. మహిళలు స్వయం ఉపాధి ద్వారా ఆర్థికంగా నిలదొక్కుకునేందుకు ‘పింక్ ఈ-రిక్షా’ ప్రాజెక్టు తోడ్పడనుంది.
