AP | వీఆర్ఏలకు శుభవార్త…

వీఆర్వో గ్రేడ్-2 పదోన్నతికి కొత్త అవకాశం
సర్వీస్ రూల్స్ సవరణతో ఇంటర్ అర్హత ఉన్న వారికీ వెసులుబాటు
ఐదేళ్లలో డిగ్రీ పూర్తి చేయాలి

AP | శ్రీ సత్యసాయి బ్యూరో, ఆగస్టు 5 (ఆంధ్రప్రభ ): రాష్ట్ర రెవెన్యూ శాఖలో పనిచేస్తున్న గ్రామ రెవెన్యూ సహాయకులు (వీఆర్ఏలు) ఎంతోకాలంగా ఎదురుచూస్తున్న పదోన్నతుల విషయంలో రాష్ట్ర ప్రభుత్వం కీలక నిర్ణయం తీసుకుంది. 2023 మార్చి 10న జారీ చేసిన జీవో. ఎమ్మెస్ నెంబర్.104కు ముందు నియమితులైన వీఆర్ఏలకు ఊరటనిస్తూ, వీఆర్వో గ్రేడ్-2 పోస్టుకు పదోన్నతి కల్పించే నిబంధనల్లో సవరణలు చేసింది. ఈ మేరకు రెవెన్యూ శాఖ తాజా ఉత్తర్వులు జారీ చేసింది.

ఇప్పటి వరకు వీఆర్వో గ్రేడ్-2 పోస్టుకు పదోన్నతి పొందాలంటే డిగ్రీ విద్యార్హత తప్పనిసరి. దీంతో ఇంటర్మీడియట్ మాత్రమే అర్హతగా ఉన్న వేలాది మంది వీఆర్ఏలు పదోన్నతి అవకాశాలకు దూరమయ్యారు. తాజాగా ప్రభుత్వం తీసుకున్న నిర్ణయంతో ఈ అడ్డంకి తొలగిపోయింది. ఇకపై ఇంటర్మీడియట్ అర్హత కలిగిన వీఆర్ఏలు కూడా నిర్దిష్ట షరతులతో వీఆర్వో గ్రేడ్-2 పోస్టుకు బదిలీ ద్వారా నియామకం పొందే అవకాశం కల్పించారు.

అయితే ప్రభుత్వం ఈ సడలింపును కొన్ని షరతులకు లోబడి అమలు చేయనుంది. వీఆర్వో గ్రేడ్-2గా నియమితులైన ఉద్యోగులు నియామకం పొందిన తేదీ నుంచి ఐదేళ్లలోపు డిగ్రీ విద్యార్హతను పూర్తి చేయడం తప్పనిసరి అని ఉత్తర్వుల్లో స్పష్టం చేసింది. నిర్దేశించిన గడువులో డిగ్రీ పూర్తి చేయని పక్షంలో సంబంధిత ఉద్యోగిని తిరిగి వీఆర్ఏ పోస్టుకే రివర్స్ చేస్తామని ప్రభుత్వం పేర్కొంది. దీంతో ఉద్యోగులకు పదోన్నతి అవకాశాన్ని కల్పించడమే కాకుండా ఉన్నత విద్యను ప్రోత్సహించే విధంగా ప్రభుత్వం ఈ నిర్ణయం తీసుకున్నట్లు తెలుస్తోంది.
ఈ సడలింపు 2023 మార్చి 10కు ముందు నియమితులైన వీఆర్ఏలకు మాత్రమే వర్తిస్తుందని ప్రభుత్వం స్పష్టం చేసింది. ఆ తేదీ తర్వాత నియమితులైన వారికి ఈ వెసులుబాటు ఉండదని ఉత్తర్వుల్లో పేర్కొంది. దీంతో ఈ నిర్ణయం వల్ల అర్హులైన ఉద్యోగులకు మాత్రమే ప్రయోజనం చేకూరనుంది.

రాష్ట్రంలో చాలా మంది వీఆర్ఏలు పదేళ్లుగా, కొందరు రెండు దశాబ్దాలకు పైగా సేవలందిస్తున్నప్పటికీ డిగ్రీ అర్హత లేకపోవడం వల్ల పదోన్నతి పొందలేకపోయారు. దీంతో వేతన ప్రయోజనాలు, హోదా పెరుగుదల, సేవా అవకాశాలు పరిమితమయ్యాయి. తాజా సవరణతో అలాంటి ఉద్యోగులకు కెరీర్‌లో ముందుకు సాగే అవకాశం లభించనుంది. ఉద్యోగంలో కొనసాగుతూనే డిగ్రీ పూర్తి చేసి శాశ్వతంగా వీఆర్వో గ్రేడ్-2 హోదాలో కొనసాగేందుకు మార్గం సుగమమైంది.

ప్రభుత్వ నిర్ణయంపై వీఆర్ఏ ఉద్యోగుల్లో ఆనందం వ్యక్తమవుతోంది. ఉద్యోగుల సంఘాలు కూడా ఈ నిర్ణయాన్ని స్వాగతించాయి. ఎన్నో సంవత్సరాలుగా పెండింగ్‌లో ఉన్న సమస్యకు ప్రభుత్వం పరిష్కారం చూపిందని, అర్హులైన ఉద్యోగులకు న్యాయం జరిగిందని సంఘాల ప్రతినిధులు పేర్కొంటున్నారు. అయితే ఐదేళ్లలోపు డిగ్రీ పూర్తిచేయాల్సిన నిబంధనను దృష్టిలో ఉంచుకుని ప్రభుత్వం దూరవిద్య, ఓపెన్ యూనివర్సిటీలు వంటి అవకాశాలపై కూడా అవగాహన కల్పించాలని వారు కోరుతున్నారు.

తాజా సర్వీస్ రూల్స్ సవరణతో వేలాది మంది వీఆర్ఏలకు పదోన్నతి ఆశలు మళ్లీ చిగురించాయి. రెవెన్యూ శాఖలో సుదీర్ఘకాలంగా సేవలందిస్తున్న ఉద్యోగులకు ఇది ఒక కీలక అవకాశంగా భావిస్తున్నారు. ఈ నిర్ణయం ఉద్యోగుల సేవా ప్రగతికి తోడ్పడటమే కాకుండా, శాఖలో అనుభవజ్ఞులైన సిబ్బందిని ఉన్నత బాధ్యతల్లో వినియోగించుకునేందుకు కూడా దోహదపడుతుందనే అభిప్రాయం వ్యక్తమవుతోంది.