లబ్ధిదారురాలి వద్దకే చేరిన వితంతు పింఛన్..
మండవల్లి, ఆంధ్రప్రభ : ప్రభుత్వ సంక్షేమ పథకాలు నిజమైన లబ్ధిదారులకు చేరాలనే లక్ష్యంతో స్వర్ణగ్రామ సిబ్బంది మానవీయతను చాటుకున్నారు. మండవల్లి మండలం కానుకొల్లు గ్రామానికి చెందిన బొర్రా పెద్దింట్లమ్మ క్యాన్సర్ వ్యాధితో బాధపడుతూ మంగళగిరిలోని ఎయిమ్స్ ఆసుపత్రిలో చికిత్స పొందుతున్న నేపథ్యంలో, ఆమెకు అందాల్సిన వితంతు పింఛన్ను ఆసుపత్రికే వెళ్లి అందజేశారు.
కానుకొల్లు గ్రామానికి ఇంజినీరింగ్ అసిస్టెంట్గా విధులు నిర్వహిస్తున్న డి. సతీష్, లబ్ధిదారురాలు తీవ్ర అనారోగ్యంతో గ్రామానికి రాలేని పరిస్థితిని తెలుసుకుని సోమవారం మంగళగిరిలోని ఎయిమ్స్ ఆసుపత్రికి స్వయంగా వెళ్లి ప్రభుత్వం తరఫున అందాల్సిన వితంతు పింఛన్ను ఆమె చేతికి అందించి సేవాభావాన్ని చాటుకున్నారు.
తీవ్ర అనారోగ్యంతో చికిత్స పొందుతున్న సమయంలో ప్రభుత్వ ఆర్థిక సహాయం నేరుగా అందడంతో పెద్దింట్లమ్మ కుటుంబ సభ్యులు ఆనందం వ్యక్తం చేశారు. అవసరమైన సమయంలో ప్రభుత్వ చేయూత అందడం తమకు ఎంతో ఊరటనిచ్చిందని తెలిపారు.
ప్రభుత్వ సంక్షేమ పథకాల అమలులో మానవీయ దృక్పథంతో వ్యవహరించడం ప్రజల్లో ప్రభుత్వంపై మరింత విశ్వాసాన్ని పెంచుతుందని గ్రామస్థులు అభిప్రాయపడ్డారు. లబ్ధిదారుల ఇబ్బందులను అర్థం చేసుకుని ఆసుపత్రికే వెళ్లి పింఛన్ అందించిన ఇంజినీరింగ్ అసిస్టెంట్ డి. సతీష్ సేవలను స్థానికులు అభినందించారు.
అనారోగ్యం, వృద్ధాప్యం లేదా ఇతర కారణాలతో గ్రామానికి వచ్చి పింఛన్ తీసుకునే పరిస్థితి లేని లబ్ధిదారులకు కూడా ప్రభుత్వం అందించే సంక్షేమ పథకాలు సకాలంలో చేరేలా కృషి చేయడం అభినందనీయమని పలువురు పేర్కొన్నారు. ఈ ఘటన ప్రభుత్వ సేవల్లో మానవీయతకు నిలువెత్తు నిదర్శనంగా నిలిచింది.
