15thAprilCartoon | ఆంధ్రప్రభలో నేటి కార్టూన్ ఔరా

15thAprilCartoon | ఎన్నికల వేడి, హామీల జల్లులు
గ్యాస్ రాజకీయ వ్యూహం
ఓటర్ల సందిగ్ధ పరిస్థితి
ప్రచారంలో కొత్త ట్రెండ్

ఆంధ్రప్రభ వెబ్ డెస్క్ : ప్రస్తుతం దేశంలో ఎండలు మండిపోతున్నాయి.. కానీ అంతకంటే ఎక్కువగా ఎన్నికల వేడి రగులుకుంటోంది. ముఖ్యంగా దక్షిణాది కోటను ఎలాగైనా బద్దలు కొట్టాలని చూస్తున్న పార్టీలు, తమిళనాడు ఎన్నికల క్షేత్రంలో ‘మేనిఫెస్టో’ అస్త్రాలను ప్రయోగిస్తున్నాయి. ఏకంగా మూడు ఉచిత సిలిండర్లు, మహిళలకు నెలకు రెండు వేలు అంటూ కురిపిస్తున్న హామీల జల్లులు ఇప్పుడు చర్చనీయాంశంగా మారాయి.

గ్యాస్ మీద ‘ఓటు’ ముద్ర రాజకీయ విన్యాసం. కార్టూన్‌లో గ్యాస్ సిలిండర్ల మీద “మీ ఓటు-మాకే” అని రాసి ఉండటం, మధ్యలో పార్టీ గుర్తు మెరిసి పోవడం చూస్తుంటే.. “వంట్ల గదిలోకి చొరబడితేనే గాని ఓట్ల గదిలోకి వెళ్లలేం” అని పార్టీలు ఫిక్స్ అయిపోయినట్లు కనిపిస్తోంది. కింద ఉన్న సామాన్య మహిళ ఆ మేనిఫెస్టోను చూస్తూ.. “అమ్మో! మూడు సిలిండర్లా? గ్యాస్ రేట్లు ఆకాశాన్ని అంటుతున్న ఈ కాలంలో ఇది నిజంగా మంత్రమే” అన్నట్లుగా ఆశ్చర్య పోవడం ప్రస్తుత ఓటరు సందిగ్ధ స్థితికి అద్దం పడుతోంది.

ఇన్నాళ్లూ సిలిండర్ రేట్లు పెరిగినప్పుడల్లా ‘గ్యాస్’ పోయిన సామాన్యుడికి, ఇప్పుడు ఎన్నికల పుణ్యమా అని ‘ఉచితం’ అనే ఆక్సిజన్ అందుతోంది.

నిత్యావసర ధరలతో సతమతమవుతున్న సామాన్యుడికి ఏకంగా మూడు సిలిండర్లు ఫ్రీ అంటే.. అది ‘గ్యాస్’ హామీనా లేక ‘గాలి’ హామీనా అని జనం గుసగుసలాడుకుంటున్నారు.

అటు నగదు, ఇటు సిలిండర్లు.. మొత్తానికి మహిళా ఓటర్ల మనసు గెలుచుకోవడానికి పార్టీలు గట్టిగానే ‘వంట’ వండుతున్నాయి.

ఎన్నికల సమయంలో ప్రచారానికి ఏ చిన్న అంశాన్నీ వదలకుండా, గ్యాస్ బండలను కూడా ‘ప్రచార రథాలు’గా మార్చేయడం రాజకీయ వ్యూహకర్తల తెలివితేటలకు పరాకాష్ట.

ఎన్నికలొస్తేనే కదా.. ప్రేమ పుట్టేది!
సాధారణ రోజుల్లో జనం కష్టాలు పట్టించుకోని వారు సైతం, సరిగ్గా ఓట్ల పండగ రాగానే ‘హామీల’ రూపంలో ప్రేమను కురిపిస్తున్నారు. ప్రచారానికి ఏ ఒక్క అంశాన్నీ వదలకుండా ఉపయోగించుకుంటారన్న విషయాన్ని ఈ కార్టూన్ ఎంతో చాకచక్యంగా ఎండగట్టింది. మరి ఈ ఉచిత సిలిండర్ల సెగ ప్రత్యర్థి పార్టీలకు తగులుతుందో లేదో, ఓటరు దేవుడు ఎవరికి పట్టం కడతాడో వేచి చూడాలి!
ఆంధ్రప్రభ కార్టూన్ ఇది. గత రెండు దశాబ్దాలుగా ఆంధ్రప్రభ పాఠకులను, కార్టూన్ ఇష్టులను అలరిస్తోన్న కార్టూన్ ఫీచర్ ఔరా.