Minor Driving Crackdown | సిటీ క‌మిష‌న‌ర్ సీపీ సజ్జనార్

ర్యాంకుల కంటే విద్యార్థుల భద్రతే ముఖ్యం
పాఠశాలల వద్ద డ్రగ్స్, సిగరెట్ విక్రయాలపై కఠిన చర్యలు

Minor Driving Crackdown | హైదరాబాద్, ఆంధ్రప్రభ వెబ్‌డెస్క్ : నగరంలో మైనర్లు వాహనాలు నడుపుతున్న ఘటనలు పెరుగుతుండటంపై హైదరాబాద్ సిటీ పోలీస్ కమిషనర్ వీసీ సజ్జనార్ తీవ్ర ఆందోళన వ్యక్తం చేశారు. మైనర్ పిల్లలకు ద్విచక్ర, నాలుగు చక్రాల వాహనాలు ఇచ్చే తల్లిదండ్రులు ఇకపై చట్టపరమైన చర్యలను ఎదుర్కోవాల్సి ఉంటుందని హెచ్చరించారు. విద్యార్థుల భద్రత విషయంలో ఎలాంటి రాజీ ఉండదని స్పష్టం చేశారు.

మైనర్ డ్రైవింగ్‌పై ఉక్కుపాదం
నగరంలో ఇటీవల మైనర్లు వాహనాలు నడుపుతూ ప్రమాదాలకు కారణమవుతున్న ఘటనలు పెరుగుతున్న నేపథ్యంలో పోలీస్ శాఖ ప్రత్యేక దృష్టి సారించింది. ఈ సందర్భంగా సీపీ సజ్జనార్ మాట్లాడుతూ, మైనర్లు వాహనాలు నడిపితే వారిపై మాత్రమే కాకుండా వాహనాలు ఇచ్చిన తల్లిదండ్రులపై కూడా కేసులు నమోదు చేస్తామని తెలిపారు. పిల్లల భవిష్యత్, ప్రాణ భద్రతను దృష్టిలో ఉంచుకుని తల్లిదండ్రులు బాధ్యతాయుతంగా వ్యవహరించాలని సూచించారు.

ర్యాంకుల కంటే భద్రత ముఖ్యం
పాఠశాలలు, విద్యాసంస్థల యాజమాన్యాలకు సీపీ కీలక సూచనలు చేశారు. విద్యార్థులకు అత్యుత్తమ మార్కులు, ర్యాంకులు సాధించడమే కాకుండా వారి భద్రతకు కూడా సమాన ప్రాధాన్యం ఇవ్వాలని పేర్కొన్నారు. విద్యాసంస్థల్లో భద్రతా ప్రమాణాలు కచ్చితంగా పాటించాలని, విద్యార్థుల రక్షణ విషయంలో నిర్లక్ష్యం సహించబోమని హెచ్చరించారు.

సీసీ కెమెరాలు తప్పనిసరి
పాఠశాలల ప్రాంగణాలు, ప్రధాన ప్రవేశ ద్వారాలు, విద్యార్థుల రాకపోకలు జరిగే ప్రాంతాల్లో సీసీ కెమెరాలు ఏర్పాటు చేయాలని సీపీ ఆదేశించారు. విద్యార్థుల భద్రతకు సంబంధించిన అంశాల్లో సాంకేతిక పరిజ్ఞానాన్ని సమర్థవంతంగా వినియోగించుకోవాలని సూచించారు.

డ్రగ్స్, సిగరెట్ విక్రయాలపై కఠిన చర్యలు
విద్యాసంస్థల పరిసరాల్లో మాదకద్రవ్యాలు, సిగరెట్లు విక్రయించే వారిపై కఠిన చర్యలు తీసుకుంటామని సీపీ స్పష్టం చేశారు. ముఖ్యంగా పాఠశాలల నుంచి 100 మీటర్ల పరిధిలో పొగాకు ఉత్పత్తులు, సిగరెట్లు, మాదకద్రవ్యాల విక్రయాలు జరుగుతున్నట్లు గుర్తిస్తే సంబంధిత వ్యక్తులపై క్రిమినల్ కేసులు నమోదు చేస్తామని హెచ్చరించారు.

తల్లిదండ్రులు, పాఠశాలల పాత్ర కీలకం
విద్యార్థులను బాధ్యతాయుత పౌరులుగా తీర్చిదిద్దడంలో తల్లిదండ్రులు, ఉపాధ్యాయులు, విద్యాసంస్థల యాజమాన్యాల పాత్ర ఎంతో ముఖ్యమని సజ్జనార్ పేర్కొన్నారు. చిన్న వయస్సులోనే ట్రాఫిక్ నిబంధనలు, చట్టాలపై అవగాహన కల్పించడం ద్వారా ప్రమాదాలను నివారించవచ్చని సూచించారు.