30 అడుగుల రోడ్డు.. ఆక్రమణలతో 3 అడుగులకు కుదింపు

30 అడుగుల రోడ్డు.. ఆక్రమణలతో 3 అడుగులకు కుదింపు

• అధికారుల నిర్లక్ష్యంపై విమర్శలు

శ్రీ సత్యసాయి బ్యూరో, ఆంధ్రప్రభ: శ్రీ సత్య సాయి జిల్లా కదిరి పట్టణంలో మరోసారి అక్రమ నిర్మాణాల సమస్య బహిర్గతమైంది. ఒకప్పుడు 30 అడుగుల వెడల్పుతో ప్రజల రాకపోకలకు ఉపయోగపడిన రోడ్డు, ప్రస్తుతం కేవలం 3 అడుగులకే పరిమితమవడం తీవ్ర ఆందోళనకు గురిచేస్తోంది. ఈ ఘటన కదిరి బైపాస్ రోడ్డుకు అనుసంధానంగా పోలీస్ లైన్ ప్రాంతంలో చోటుచేసుకుంది. ఈ రహదారి ద్వారా పోలీస్ స్టేషన్, పశువుల ఆసుపత్రి, సబ్ జైలు, పోలీస్ క్వార్టర్స్ వంటి కీలక ప్రభుత్వ కార్యాలయాలకు వెళ్లేందుకు ప్రజలు, పోలీసు సిబ్బంది విస్తృతంగా వినియోగించేవారు. అయితే క్రమంగా జరిగిన ఆక్రమణల వల్ల ఈ రహదారి తన అసలు రూపాన్ని కోల్పోయింది.

ప్రస్తుతం పరిస్థితి చూస్తే, రహదారిలో 3 అడుగుల స్థలం డ్రైనేజీ కోసం, మరో 3 అడుగులు చెట్ల కోసం, ఇంకో 3 అడుగులు పాదాచారుల కోసం మిగిలినట్లు కనిపిస్తోంది. కానీ మిగతా మొత్తం స్థలాన్ని అక్రమంగా ఆక్రమించి షాపులు, గదులు నిర్మించడం జరిగింది. ఈ నిర్మాణాలను కొందరు వ్యాపారులు అద్దెలకు ఇచ్చుకుంటూ లాభాలు పొందుతున్నారని స్థానికులు ఆరోపిస్తున్నారు. స్థానికుల ప్రకారం, ఈ ఆక్రమణలు ఒక్కరోజులో జరగలేదు. కొంతకాలంగా దశలవారీగా నిర్మాణాలు పెరుగుతూ వచ్చాయని, కానీ అధికారుల నుంచి ఎలాంటి చర్యలు లేకపోవడం వల్ల పరిస్థితి ఇంత దారుణంగా మారిందని విమర్శిస్తున్నారు.

ముఖ్యంగా పోలీస్ లైన్ వంటి సున్నిత ప్రాంతంలో ఇలాంటి ఆక్రమణలు జరగడం భద్రతపరమైన సమస్యలకు దారి తీస్తుందని వారు ఆందోళన వ్యక్తం చేస్తున్నారు. పోలీస్ క్వార్టర్స్‌లో నివసిస్తున్న సిబ్బంది కూడా ఈ సమస్యతో తీవ్ర ఇబ్బందులు పడుతున్నారు. సబ్ జైలు, పోలీస్ స్టేషన్, ఫారెస్ట్ ఆఫీస్ వంటి కార్యాలయాలకు వెళ్లేందుకు సరైన మార్గం లేకపోవడం వల్ల రోజువారీ పనుల్లో ఆటంకాలు ఎదురవుతున్నాయి. అత్యవసర పరిస్థితుల్లో ఈ మార్గం వినియోగించలేని స్థితి ఉండటం మరింత ప్రమాదకరంగా మారింది.

ఇప్పటికైనా అధికారులు స్పందించి ఆక్రమణలను తొలగించాలని ప్రజలు డిమాండ్ చేస్తున్నారు. రహదారిని అసలు వెడల్పుకు తీసుకురావడం ద్వారా ప్రజలకు, పోలీసులకు సౌకర్యవంతమైన రాకపోకలు కల్పించాలని కోరుతున్నారు. లేకపోతే భవిష్యత్తులో మరింత తీవ్ర సమస్యలు తలెత్తే అవకాశం ఉందని హెచ్చరిస్తున్నారు. అధికారులు ఈ అంశాన్ని ఎంత త్వరగా గుర్తించి చర్యలు తీసుకుంటారో చూడాలి. ప్రజల సౌకర్యం, భద్రత దృష్ట్యా ఆక్రమణలపై కఠిన చర్యలు తీసుకోవడం అవసరమని నిపుణులు సూచిస్తున్నారు.

ప్రస్తుతం ఉన్న పరిస్థితి చూస్తే, ఇది కేవలం రహదారి సమస్య కాకుండా పరిపాలనా వైఫల్యానికి నిదర్శనంగా మారిందని స్థానికులు అభిప్రాయపడుతున్నారు. కొసమేరుపు…. సుమారు రెండున్నర దశాబ్దాల క్రితమే అప్పటి ఎమ్మెల్యే జొన్నా సూర్యనారాయణ ఆధ్వర్యంలో వికలాంగుల కోసం ప్రభుత్వం తరఫున నిర్మించిన వికలాంగుల శాశ్వత భవనం ఇక్కడే ఉంది. అందులో కదిరి చుట్టుపక్కల గల 12 మండలాలకు చెందిన వికలాంగులు ఇక్కడికి తరచూ తమ పనుల నిమిత్తం వచ్చి అవసరమైన వారు విశ్రాంతి తీసుకుని తమ పనులు ముగించుకొని తమ సొంత గ్రామాలకు వెళ్లడం జరుగుతుంది. ఆర్టీసీ బస్టాండ్ కు వెళ్లాలంటే ఈ మూడు అడుగుల దారిలో వికలాంగులకు కష్టంగా ఉంది. అధికారులు స్పందించి మూడు అడుగుల రహదారిని 30 అడుగుల రహదారిగా మార్చి అన్ని వర్గాల వారికి రహదారి సౌకర్యం కల్పించాలని డిమాండ్ చేస్తున్నారు.