డీఎస్సీ స్కాంపై సీబీఐ విచారణే పరిష్కారం
- బాధ్యత మంత్రి నారా లోకేష్ రాజీనామా చేయాలి
- ఫీజు రీయింబర్స్మెంట్ బకాయిలు విడుదల చేయాలి
- నిరుద్యోగ భృతి అమలు చేయాలి
- న్యాయం జరిగే వరకు వైఎస్సార్సీపీ పోరాటం
- సీబీఐ దర్యాప్తుతోనే వాస్తవాలు వెలుగులోకి వస్తాయి
- జిల్లా వ్యాప్తంగా ఉద్యమాలను మరింత ఉధృతం చేస్తాం
- వైసీపీ ఎన్టీఆర్ జిల్లా అధ్యక్షుడు దేవినేని అవినాష్
విజయవాడ, ఆంధ్రప్రభ: డీఎస్సీ–2025 నియామకాల్లో చోటుచేసుకున్నట్లు ఆరోపిస్తున్న అక్రమాలపై కేంద్ర దర్యాప్తు సంస్థ (సీబీఐ)తో విచారణ జరిపించాలని, విద్యాశాఖ మంత్రి నారా లోకేష్ నైతిక బాధ్యత వహిస్తూ రాజీనామా చేయాలని వైఎస్సార్సీపీ ఎన్టీఆర్ జిల్లా అధ్యక్షుడు, విజయవాడ తూర్పు నియోజకవర్గ ఇన్చార్జి దేవినేని అవినాష్ డిమాండ్ చేశారు. డీఎస్సీ అభ్యర్థులకు న్యాయం జరిగే వరకు పార్టీ ఆధ్వర్యంలో ఉద్యమాన్ని మరింత ఉధృతం చేస్తామని ప్రకటించారు.
విజయవాడలోని ఎం–కన్వెన్షన్ హాల్లో సోమవారం వైఎస్సార్సీపీ ఆధ్వర్యంలో నిర్వహించిన టౌన్హాల్ సమావేశంలో దేవినేని అవినాష్ మాట్లాడుతూ, కూటమి ప్రభుత్వ హయాంలో విద్యార్థులు, నిరుద్యోగులు తీవ్ర అన్యాయానికి గురవుతున్నారని ఆరోపించారు. డీఎస్సీ–2025 నియామక ప్రక్రియపై అభ్యర్థులు వ్యక్తం చేస్తున్న అభ్యంతరాలను ప్రభుత్వం పట్టించుకోవడం లేదని విమర్శించారు. డీఎస్సీ నియామకాల్లో జరిగినట్లు ఆరోపిస్తున్న అక్రమాలపై సీబీఐతో దర్యాప్తు జరిపించాలని, మంత్రి నారా లోకేష్ బాధ్యత వహిస్తూ వెంటనే రాజీనామా చేయాలని డిమాండ్ చేశారు.
ఫీజు రీయింబర్స్మెంట్ బకాయిలను తక్షణమే విడుదల చేయడంతో పాటు ఎన్నికల హామీ మేరకు నెలకు రూ.3 వేల నిరుద్యోగ భృతిని అమలు చేయాలని ప్రభుత్వాన్ని కోరారు. రాష్ట్ర భవిష్యత్తు కోసం విద్యార్థులు, యువత పోరాడుతున్నారని, వారికి వైఎస్సార్సీపీ అండగా నిలుస్తుందని చెప్పారు.
సమావేశంలో మాజీ మంత్రి వెల్లంపల్లి శ్రీనివాస్ మాట్లాడుతూ.. డీఎస్సీ వ్యవహారంపై ప్రభుత్వం సమగ్ర సమాధానం చెప్పాలని, ఆరోపణలు నిరాధారమైతే సీబీఐ విచారణకు ఎందుకు ముందుకు రావడం లేదని ప్రశ్నించారు. మాజీ ఎమ్మెల్యే మల్లాది విష్ణు మాట్లాడుతూ డీఎస్సీతో పాటు ఫీజు రీయింబర్స్మెంట్, విద్యార్థుల సంక్షేమ పథకాల అమలులో ప్రభుత్వం విఫలమైందని విమర్శించారు.
రాష్ట్ర విద్యార్థి విభాగం అధ్యక్షుడు పానుగంటి చైతన్య, వర్కింగ్ ప్రెసిడెంట్ రవిచంద్ర, జిల్లా యువజన నాయకులు, డీఎస్సీ అభ్యర్థులు రాణి, రోషి బాబు తదితరులు మాట్లాడుతూ.. నియామకాల్లో జరిగినట్లు ఆరోపిస్తున్న అక్రమాలపై సీబీఐ విచారణ చేపట్టి బాధిత అభ్యర్థులకు న్యాయం చేయాలని డిమాండ్ చేశారు. సమస్యలు పరిష్కారమయ్యే వరకు ఉద్యమాన్ని కొనసాగిస్తామని ప్రకటించారు. సమావేశంలో మాజీ మంత్రి వెల్లంపల్లి శ్రీనివాస్, మాజీ ఎమ్మెల్యే మల్లాది విష్ణు, డిప్యూటీ మేయర్ బెల్లం దుర్గ, రాష్ట్ర విద్యార్థి, యువజన, సోషల్ మీడియా విభాగాల నాయకులు, డీఎస్సీ అభ్యర్థులు, పార్టీ శ్రేణులు పెద్ద సంఖ్యలో పాల్గొన్నారు.
