పేదల సంక్షేమమే కూటమి ప్రభుత్వ లక్ష్యం..
ఇంటింటికీ సంక్షేమం.. ప్రజల్లోకి కూటమి నేతలు
రౌడూరులో ఎన్టీఆర్ భరోసా పెన్షన్ల పంపిణీ.
హామీల అమలుతో ప్రజల విశ్వాసం నిలబెట్టుకున్న ప్రభుత్వం
మంత్రాలయం, ఆగస్టు 1, ఆంధ్రప్రభ : ప్రతి పేద కుటుంబానికి సంక్షేమ పథకాల ఫలాలు చేరేలా కూటమి ప్రభుత్వం చిత్తశుద్ధితో పనిచేస్తోందని, ప్రజలకు ఇచ్చిన హామీలను ఒక్కొక్కటిగా అమలు చేస్తూ అభివృద్ధి, సంక్షేమాన్ని గ్రామాల గడప దాకా తీసుకెళ్తోందని కర్నూలు జిల్లా తెలుగుదేశం పార్టీ అధ్యక్షురాలు గుడిసె ఆది కృష్ణమ్మ పేర్కొన్నారు.
పేదల సంక్షేమమే కూటమి ప్రభుత్వ ప్రధాన లక్ష్యమని, ప్రతి అర్హ కుటుంబానికి ప్రభుత్వ పథకాల ప్రయోజనాలు అందేలా ముఖ్యమంత్రి నారా చంద్రబాబు నాయుడు నాయకత్వంలో ప్రభుత్వం చిత్తశుద్ధితో పనిచేస్తోందని కర్నూలు జిల్లా తెలుగుదేశం పార్టీ అధ్యక్షురాలు గుడిసె ఆది కృష్ణమ్మ అన్నారు.
మంత్రాలయం నియోజకవర్గంలోని రౌడూరు గ్రామంలో శనివారం నిర్వహించిన పేదల సేవలో ఎన్టీఆర్ భరోసా పెన్షన్ల పంపిణీ కార్యక్రమంతో పాటు ఇంటింటికి సంక్షేమం – రెండేళ్ల అభివృద్ధి కార్యక్రమంలో ఆమె ముఖ్య అతిథిగా పాల్గొన్నారు. మంత్రాలయం నియోజకవర్గ ఇన్చార్జి రాఘవేంద్ర రెడ్డి కూడా కార్యక్రమంలో పాల్గొన్నారు.
ఈ సందర్భంగా లబ్ధిదారులకు ఎన్టీఆర్ భరోసా పెన్షన్లు పంపిణీ చేసిన నాయకులు, గత రెండేళ్లలో కూటమి ప్రభుత్వం అమలు చేసిన సంక్షేమ, అభివృద్ధి కార్యక్రమాలను ప్రజలకు వివరించారు. ఎన్నికల సమయంలో ఇచ్చిన హామీలను ప్రభుత్వం దశలవారీగా అమలు చేస్తూ ప్రజల విశ్వాసాన్ని నిలబెట్టుకుంటోందని పేర్కొన్నారు.
ప్రభుత్వ సంక్షేమ పథకాలు సమాజంలోని అన్ని వర్గాలకు చేరేలా అధికారులు, పార్టీ శ్రేణులు సమన్వయంతో పనిచేయాలని గుడిసె ఆది కృష్ణమ్మ సూచించారు. ప్రతి గ్రామంలో అభివృద్ధి ఫలాలు ప్రజలకు కనిపించేలా ప్రభుత్వం చర్యలు చేపడుతోందని తెలిపారు.
అనంతరం నాయకులు గ్రామంలో ఇంటింటికీ వెళ్లి ప్రజలను కలుసుకుని, ప్రభుత్వ సంక్షేమ పథకాలపై అవగాహన కల్పించారు. ప్రజల సమస్యలను నేరుగా తెలుసుకుని, వాటి పరిష్కారానికి ప్రభుత్వం కట్టుబడి ఉందని భరోసా ఇచ్చారు.
కార్యక్రమంలో ఎల్ఎల్సీ చైర్మన్ టిప్పు సుల్తాన్, టీడీపీ సీనియర్ నాయకుడు ఉలిగయ్య, కౌతాళం మండల అధ్యక్షుడు సురేష్ నాయుడు, శివ, బుడదయ్య, రమేష్, రాజు, ఉసేని, మహమ్మద్, నాయక్, మనూరు, స్థానిక ప్రజాప్రతినిధులు, పార్టీ నాయకులు, కార్యకర్తలు, గ్రామ పెద్దలు, మహిళలు, యువకులు, గ్రామస్తులు పెద్ద సంఖ్యలో పాల్గొన్నారు.
