మెగా డీఎస్సీపై దుష్ప్రచారం ఫలించదు!

148 రోజుల్లో 16,347 ఉద్యోగాలు..

దేశానికే ఆదర్శంగా నియామక ప్రక్రియ: మంత్రి నిమ్మల

కర్నూలు, ఆంధ్రప్రభ బ్యూరో: రాష్ట్రంలో కూటమి ప్రభుత్వం అధికారంలోకి వచ్చిన రెండేళ్ల కాలంలో అభివృద్ధి, సంక్షేమం, ఉద్యోగ కల్పన రంగాల్లో గణనీయమైన పురోగతి సాధించిందని జిల్లా ఇన్‌చార్జి మంత్రి నిమ్మల రామానాయుడు పేర్కొన్నారు. కర్నూలులో నిర్వహించిన “రెండేళ్ల నమ్మకం – అభివృద్ధి, సంక్షేమం” కార్యక్రమంలో ఆయన పాల్గొని మాట్లాడారు. ఈ కార్యక్రమంలో కూటమి పార్టీల ఎమ్మెల్యేలు, జిల్లా అధ్యక్షులు, ముఖ్య నాయకులు పాల్గొన్నారు.

ఈ సందర్భంగా మంత్రి ప్రతిపక్ష వైసీపీపై తీవ్ర విమర్శలు గుప్పించారు. ప్రజలకు మేలు చేసే కార్యక్రమాల కంటే కుట్రలు, కుతంత్రాలతో రాజకీయాలు చేయడమే ఆ పార్టీ లక్ష్యంగా పెట్టుకుందని ఆరోపించారు. ముఖ్యంగా మెగా డీఎస్సీ-2025పై చేస్తున్న ఆరోపణలు, దుష్ప్రచారం ఆ పార్టీ వైఖరిని మరోసారి బహిర్గతం చేస్తున్నాయని అన్నారు.

డీఎస్సీని అడ్డుకునేందుకు 32 కేసులు

మెగా డీఎస్సీ-2025 నిర్వహణ ప్రక్రియను ప్రారంభ దశలోనే అడ్డుకోవాలనే ఉద్దేశంతో అప్పటి ప్రతిపక్షం వివిధ స్థాయిల్లో 32 కేసులు వేసి నియామకాలను నిలిపివేయాలని ప్రయత్నించిందని మంత్రి ఆరోపించారు. యువత భవిష్యత్తును దెబ్బతీయడమే లక్ష్యంగా ఈ చర్యలు చేపట్టారని పేర్కొన్నారు. అయితే ప్రభుత్వం న్యాయపరమైన అడ్డంకులను అధిగమిస్తూ నియామక ప్రక్రియను విజయవంతంగా పూర్తి చేసిందని చెప్పారు.

దేశంలోనే అతిపెద్ద ఉపాధ్యాయ నియామక ప్రక్రియ

కూటమి ప్రభుత్వం అధికారంలోకి వచ్చిన వెంటనే ముఖ్యమంత్రి నారా చంద్రబాబు నాయుడు తొలి ఫైల్‌గా 16,347 ఉపాధ్యాయ పోస్టుల భర్తీకి ఆమోదం తెలిపారని మంత్రి గుర్తు చేశారు. ఈ నోటిఫికేషన్‌కు రాష్ట్రవ్యాప్తంగా 5.77 లక్షల దరఖాస్తులు అందగా, 3.36 లక్షల మంది అభ్యర్థులు పరీక్షల్లో పోటీపడ్డారని వివరించారు.

నోటిఫికేషన్ జారీ నుంచి నియామకాల వరకు మొత్తం ప్రక్రియను కేవలం 148 రోజుల్లో పూర్తి చేయడం ప్రభుత్వ నిబద్ధతకు నిదర్శనమని అన్నారు. 2019 నుంచి 2024 వరకు ఒక్క మెగా డీఎస్సీ కూడా నిర్వహించని వారు, ఇప్పుడు దేశంలోనే అతిపెద్ద ఉపాధ్యాయ నియామక ప్రక్రియను విమర్శించడం ఆశ్చర్యకరమన్నారు.

పారదర్శకతకు పెద్దపీట

మెగా డీఎస్సీ-2025 పూర్తిగా పారదర్శకంగా, అత్యాధునిక సాంకేతిక భద్రతా ప్రమాణాలతో నిర్వహించబడిందని మంత్రి స్పష్టం చేశారు. కోర్టు ఆదేశాలు, ప్రభుత్వ నిబంధనలను పూర్తిగా అనుసరించి ప్రక్రియ చేపట్టినట్లు తెలిపారు.

అభ్యర్థుల ఎంపికలో మానవ జోక్యానికి తావులేకుండా కంప్యూటర్ ఆధారిత విధానాన్ని అమలు చేశామని చెప్పారు. ఎవరికి ఉద్యోగం రావాలో, ఎవరికి రాకూడదో కంప్యూటర్ వ్యవస్థే నిర్ణయించిందని, ఇందులో అధికారులు లేదా ప్రజాప్రతినిధుల జోక్యానికి అవకాశం లేకుండా చర్యలు తీసుకున్నామని పేర్కొన్నారు.

ఉద్యోగాలు, పరిశ్రమలు రెండింటిపైనా దృష్టి

ముఖ్యమంత్రి నారా చంద్రబాబు నాయుడు, విద్యాశాఖ మంత్రి నారా లోకేశ్ ఒకవైపు ప్రభుత్వ ఉద్యోగాలను భర్తీ చేస్తూనే, మరోవైపు పెట్టుబడులను ఆకర్షించి పరిశ్రమలు తీసుకువస్తూ యువతకు ఉద్యోగ, ఉపాధి అవకాశాలు కల్పిస్తున్నారని మంత్రి తెలిపారు.

ఈ అభివృద్ధిని చూసి ఓర్వలేక కొందరు దుష్ప్రచారం చేస్తున్నారని ఆరోపించారు. డీఎస్సీ వంటి సంక్లిష్టమైన నియామక ప్రక్రియను నారా లోకేశ్ సమర్థవంతంగా నిర్వహించారని ప్రశంసించారు. ప్రభుత్వంపై అసత్య ఆరోపణలు చేస్తూ యువతలో గందరగోళం సృష్టించే ప్రయత్నాలను ప్రజలు గమనిస్తున్నారని అన్నారు.

సంక్షేమంలో కొత్త దిశ

గత ప్రభుత్వ హయాంలో రాష్ట్ర ఆర్థిక పరిస్థితి తీవ్ర ఒత్తిడికి గురైందని, ప్రస్తుతం కూటమి ప్రభుత్వం ఆర్థిక వ్యవస్థను గాడిలో పెట్టేందుకు కృషి చేస్తోందని మంత్రి తెలిపారు.

సంక్షేమ పథకాల అమలులో కొత్త విధానాలు తీసుకువచ్చామని పేర్కొంటూ, గతంలో ‘అమ్మ ఒడి’ పథకం ఒకే బిడ్డకు పరిమితమైతే, ప్రస్తుతం ‘తల్లికి వందనం’ ద్వారా ఇంట్లో ఉన్న అర్హులైన ప్రతి విద్యార్థికి ప్రయోజనం చేకూరేలా చర్యలు తీసుకుంటున్నామని వివరించారు.

యువత ఆశయాలను నెరవేర్చేందుకు ఉద్యోగాల భర్తీ, విద్యా రంగ బలోపేతం, సంక్షేమ పథకాల విస్తరణకు ప్రభుత్వం కట్టుబడి ఉందని మంత్రి నిమ్మల రామానాయుడు స్పష్టం చేశారు. అభివృద్ధి, సంక్షేమం, ఉపాధి కల్పన అనే మూడు ప్రధాన లక్ష్యాలతో కూటమి ప్రభుత్వం ముందుకు సాగుతోందని, ప్రజల విశ్వాసమే తమకు ప్రధాన బలమని పేర్కొన్నారు.