35minutes | మదినగూడలో ఘోర ప్రమాదం: నడిరోడ్డుపై అనాథగా మృతదేహం
35minutes | మదినగూడలో ఘోర ప్రమాదం: నడిరోడ్డుపై అనాథగా మృతదేహం
35minutes | మదినగూడలో విషాదం.. క్షణాల్లో ప్రాణాలు కోల్పోయిన మహిళ
35 నిమిషాలపాటు రోడ్డుపైనే మృతదేహం.. షాక్కు గురైన స్థానికులు
“ప్రాణాలతో ఉంటే కూడా ఇలాగే వదిలేసేవారా?”
యంత్రాంగం నిర్లక్ష్యంపై ప్రజల ఆగ్రహం
శేరిలింగంపల్లి, ఆంధ్రప్రభ: జీవితం ఎంత విలువైందో, మరణం కూడా అంతే గౌరవప్రదమైంది. కానీ, మహానగరపు వేగంలో మానవత్వం ఎంతలా మంట గలిసి పోతోందో, మనుషుల ప్రాణాలకు, కనీసం వారి మృతదేహాలకు కూడా విలువ లేకుండా పోతోందో చాటి చెప్పే అత్యంత హృదయ విదారక ఘటన ఇది. శేరిలింగంపల్లి మదినగూడలో జరిగిన ఆ ప్రమాదం కేవలం ఒక ప్రాణాన్ని బలి తీసుకోలేదు.. మన సమాజంలోని నిస్సహాయతను, ప్రభుత్వ యంత్రాంగాల నిర్లక్ష్యాన్ని నడిరోడ్డుపై నిలబెట్టింది.
అప్పటి వరకు ఎన్నో ఆశలతో, ఇంటి గురించిన ఆలోచనలతో ప్రయాణిస్తున్న ఆ మహిళ.. మరో కొన్ని నిమిషాల్లో గమ్యస్థానానికి చేరుకోవాల్సిన సమయంలో విధి రూపంలో వచ్చిన ప్రమాదం ఆమెను కబళించేసింది. హైదరాబాద్లోని శేరిలింగంపల్లి పరిధి మదినగూడ ప్రధాన రహదారిపై ఒక్కసారిగా పెద్ద శబ్దం.. అంతలోనే హాహాకారాలు. ఆ రోడ్డు ప్రమాదంలో తీవ్ర గాయాల పాలైన ఆ మహిళ, కనీసం ఆసుపత్రికి వెళ్లే అవకాశం కూడా లేకుండా, క్షణాల వ్యవధిలోనే ఘటనాస్థలంలోనే రక్తం మడుగులో ప్రాణాలు విడిచింది. ఒక పచ్చని కుటుంబంలో చీకట్లు నింపుతూ ఆ తల్లి అనంత లోకాలకు వెళ్ళిపోయింది.
35 నిమిషాల నరకం!
ప్రమాదం జరిగిన వెంటనే అక్కడ వందల మంది గుమిగూడారు. కానీ, ఆ తర్వాత జరిగిన దృశ్యమే ప్రతి ఒక్కరి గుండెలను పిండేసింది. ఆ మహిళ మృతదేహం సుమారు 35 నిమిషాల పాటు, మండుతున్న ఎండలో, నడి రోడ్డు పైనే అలాగే ఉండిపోయింది. వాహనాలు పక్కనుంచి వెళ్తున్నాయి.. జనం చూస్తూ నిలబడ్డారు.. కానీ, ఆ దేహాన్ని పక్కకు తీసి, కనీసం ఒక గుడ్డ కప్పే నాథుడు కరువయ్యాడు. సమాచారం అందినప్పటికీ నిమ్మకు నీరెత్తినట్లు వ్యవహరించిన అధికారులు, అంబులెన్స్ యంత్రాంగం తీరు స్థానికులను తీవ్ర దిగ్భ్రాంతికి గురిచేసింది.
ఒకవేళ ప్రాణంతో ఉంటే ఇలాగే వదిలేసేవారా?
అరగంటకు పైగా ఆగ్రామ్య స్థితిలో రోడ్డుపై పడి ఉన్న ఆ శవాన్ని చూసి స్థానికుల రక్తం మరిగింది. యంత్రాంగం నిర్లక్ష్యంపై ప్రజలు తీవ్ర ఆగ్రహం వ్యక్తం చేశారు. అక్కడే ఉన్న కొందరు మహిళలు, యువకులు అధికారుల తీరుపై విరుచుకుపడ్డారు.
“ఒకవేళ ఆ రక్తం మడుగులో పడి ఉన్న బాధితురాలు ప్రాణాలతో కొట్టుమిట్టాడుతూ ఉండి ఉంటే.. అప్పుడు కూడా అధికారులు ఇంతే నిర్లక్ష్యంగా స్పందించేవారా? అప్పుడు కూడా 35 నిమిషాల పాటు ఇలాగే రోడ్డుపై వదిలేసి తమాషా చూసేవారా? ప్రాణం పోయాక కనీసం ఆ పార్థివ దేహానికి ఇవ్వాల్సిన కనీస గౌరవం కూడా ఇవ్వరా?” అంటూ స్థానికులు కన్నీళ్లతో, ఆవేదనతో ప్రశ్నించారు.
నెలకొన్న ఉద్రిక్తత..
ఈ అమానవీయ ఘటనతో మదినగూడ ప్రాంతంలో కొంతసేపు తీవ్ర ఉద్రిక్త పరిస్థితులు నెలకొన్నాయి. రోడ్డుపై వెళ్లే వాహనదారులు సైతం నిలిచిపోయి అధికారుల వైఖరిని నిరసించారు. నిమిషాల వ్యవధిలో రావలసిన పోలీసులు, రెస్క్యూ టీమ్లు ఇంత ఆలస్యంగా రావడంపై ప్రజలు తీవ్ర అసహనం వ్యక్తం చేశారు.
ఈ ప్రమాదం ఎలా జరిగింది? ఎవరి నిర్లక్ష్యం వల్ల ఆ మహిళ బలయ్యింది? అనే పూర్తి వివరాలు ఇంకా తెలియాల్సి ఉన్నప్పటికీ.. కళ్లముందే ఒక తోటి మనిషి ప్రాణం పోయి, శవమై రోడ్డుపై పడి ఉంటే.. వ్యవస్థలు స్పందించిన తీరు మాత్రం మహానగరంలో మనుషుల మధ్య చచ్చిపోతున్న మానవత్వానికి అద్దం పడుతోంది. ఆ తల్లి ఆత్మకు శాంతి కలగాలని, ఇలాంటి నిర్లక్ష్యపు పునరావృతం కాకుండా అధికారులు మారాలని స్థానికులు కోరుకుంటున్నారు.
