24thaprilsplstory | రాజధాని పునర్జన్మ దిశగా అడుగులు

24thaprilsplstory | రాజధాని పునర్జన్మ దిశగా అడుగులు

24thaprilsplstory | సామూహిక గృహప్రవేశం స్ఫూర్తి అమరావతికి అవసరం
పూర్తికి దగ్గరలో ఉన్న భవనాలు.. వినియోగం ఎప్పుడు?
అధికారులు నివాసం ప్రారంభిస్తే అభివృద్ధికి ఊపిరి
అనుమానాలకు చెక్.. జీవన నగరంగా మారితేనే సమాధానం
గృహ మహోత్సవం ద్వారా అమరావతి పునఃప్రారంభం

24thaprilsplstory | ఇటీవలి కాలంలో రాష్ట్ర ప్రభుత్వం ఒకే రోజు రెండు లక్షల ఇళ్లలో సామూహిక గృహప్రవేశం నిర్వహించి పేదవాడి సొంతింటి కలను ఏ విధంగా గౌరవించిందో, అదే స్ఫూర్తి ఇప్పుడు అమరావతి నిర్మాణాల విషయంలోనూ పునరావృతం కావాలి. అదే స్ఫూర్తిని రాజధాని అమరావతిలో కూడా ప్రతిబింబింప చేయాల్సిన అవసరం ఉంది. అదే కార్యదక్షతతో అమరావతిలో ఉన్న 3,000 పైచిలుకు మంత్రులు, ఐఏఎస్, గెజిటెడ్ మరియు ఎన్జీవో క్వార్టర్లపై కూడా చూపిస్తే, రాజధాని అమరావతి రూపురేఖలే మారిపోతాయి.

అమరావతిలో ఇప్పటికే వేల కోట్లు ఖర్చు చేసి 80 నుంచి 90 శాతం పూర్తయిన భవనాలు ఉన్నాయి. మిగిలిన 10-15 శాతం పనులను పూర్తి చేయడానికి అవసరమైన నిధులను కేటాయిస్తే, ప్రభుత్వానికి వేల కోట్ల ఆస్తి తిరిగి ఉత్పాదకతలోకి వస్తుంది. సచివాలయం, అసెంబ్లీ, హైకోర్టుకు సంబంధించిన సుమారు 20,000 మంది ఉద్యోగులు, వారి కుటుంబాలు అమరావతిలో నివాసం ప్రారంభిస్తే, ఆ ప్రాంతంలో రోజువారీ కనీసం రూ.5 నుంచి రూ.8 కోట్ల ఆర్థిక లావాదేవీలు జరిగే అవకాశం ఉంది.

ఒకేసారి వందలాది మంది అధికారులు, నేతలు గృహ మహోత్సవం చేయడం ద్వారా అమరావతి పునర్నిర్మాణం పట్ల ప్రభుత్వానికి ఉన్న చిత్తశుద్ధిని ప్రపంచానికి చాటి చెప్పవచ్చు. అధికారులు, ప్రజాప్రతినిధులు, ఉద్యోగులు ఒకే వేదికపైకి వచ్చి నిర్మించిన క్వార్టర్స్‌లో సామూహికంగా గృహమహోత్సవం చేస్తే, అమరావతి పునఃప్రారంభానికి సంకేతంగా నిలుస్తుంది. పచ్చని తోరణాలతో రాజధాని వీధులు కళకళలాడటం ఇప్పుడు ప్రతి ఆంధ్రుడి అసలైన ఆకాంక్ష. ఆ ఆకాంక్షకు సామూహిక గృహోత్సవం ద్వారా ప్రభుత్వం ప్రాణం పోయాలి.

భూములిచ్చిన రైతులు రాజధాని అమరావతి వెలుగులీనాలని కోరుకుంటున్నారు. అధికారులు అక్కడ నివసించడం ప్రారంభిస్తేనే ఆ ప్రాంతం అభివృద్ధి చెందుతుందని వారి నమ్మకం.ఒకే రోజున 2 లక్షల ఇళ్లకు గృహప్రవేశం నిర్వహించడం సాధారణ విషయం కాదు. అది ఒక ప్రభుత్వానికి ఉన్న నిర్వహణ సామర్థ్యాన్ని, సంకల్పాన్ని చూపించిన సంఘటన. అంత భారీ కార్యక్రమాన్ని ఒకే తేదీన అమలు చేసిన విధంగానే, అదే సంకల్పం, ఉత్సాహంతో అమరావతిని నిజమైన రాజధానిగా నిలబెట్టడం సాధ్యమే.

అమరావతి గృహ మహోత్సవానికి టిడ్కో ఇళ్ల తరహాలోనే అమరావతి క్వార్టర్ల పూర్తికి ప్రణాళిక ప్రకటించాలి. ఒక నిర్దిష్ట తేదీ ప్రకటిస్తే, ఆ తేదీ లోపు పెండింగ్‌లో ఉన్న విద్యుత్, నీరు, డ్రైనేజీ పనులను యుద్ధప్రాతిపదికన పూర్తి చేయడానికి యంత్రాంగం కదులుతుంది. ఒక నిర్ణీత తేదీని ప్రకటించడం వల్ల అధికారులపై సానుకూల ఒత్తిడి పెరుగుతుంది.

అలాగే కేంద్ర ప్రభుత్వ సహకారంతో నిర్మిస్తున్న బహుళార్ధక సాధక పోలవరం ప్రాజెక్టును కూడా 2027 జూన్ నాటికి పూర్తి చేస్తామని ప్రభుత్వం ప్రకటించగలిగినప్పుడు, అమరావతిలో పూర్తి కావాల్సిన భవనాలను పూర్తి చేయడానికి కూడా ఒక స్పష్టమైన తేదీని ప్రకటించి, అదే రోజున ప్రజాప్రతినిధులు, ఉన్నతాధికారులు, సిబ్బంది అందరూ తమ క్వార్టర్స్‌లో గృహమహోత్సవం చేసే విధంగా కార్యక్రమం రూపొందించి అమలు చేయవచ్చు.

అమరావతి మీద అనుమానాలు, విమర్శలు, రాజకీయ వాదనలు చేస్తున్న కొందరికి ఒకే సమాధానం—అమరావతిని జీవన నగరంగా మార్చడం. ఒకే రోజున మంత్రులు, ఉన్నతాధికారులు, సిబ్బంది అందరూ అమరావతిలో నివాసం ప్రారంభిస్తే, వ్యాపారాలు అక్కడికి వస్తాయి. ప్రజలు, అధికారులు, ప్రజాప్రతినిధుల కదలికలతో అమరావతి జనంతో కళకళలాడుతుంది.

అప్పుడు అమరావతి నిజంగా లైవ్ సిటీగా మారుతుంది. ఇది ఒక రాజకీయ సంకల్పం. ఇది ఒక భవిష్యత్తు దిశ. ఇప్పటివరకు అమరావతి చుట్టూ రాజకీయాలు తిరిగాయి. జనజీవనం ప్రారంభమైతే, అమరావతి అభివృద్ధిపై చర్చలు మొదలవుతాయి. అమరావతిలో గృహ మహోత్సవానికి ధైర్యంగా ముందడుగు వేసి ఒక తేదీ ప్రకటిస్తే చరిత్ర మారుతుంది. అమరావతి జనజీవనం కోసం ఎదురుచూస్తోంది. ఒక నిర్ణయం తీసుకుని ఒక తేదీ ప్రకటించి అమరావతికి జీవం పోయాలి. భవనాలు ఉన్నాయి కానీ వెలుగు లేదు. రోడ్లు ఉన్నాయి కానీ రాకపోకలు లేవు. క్వార్టర్స్ ఉన్నాయి కానీ నివాసం లేదు. నగరం ఉంది కానీ జీవనం లేదు. ఇక ఆలస్యం చేయవద్దు.

వేగంగా అమరావతిలో జనం నివాసం ప్రారంభం కావాలి. అది జరిగితే అమరావతి కేవలం మ్యాప్‌పై ఉన్న నగరం కాదు, దేశం చూస్తున్న జనజీవన రాజధానిగా మారుతుంది. పాలకుల నివాసంతోనే రాజధానికి హృదయ స్పందన మొదలవుతుంది. ముఖ్యమంత్రి నుంచి సామాన్య ఉద్యోగి వరకు అందరూ ఒకే ప్రాంతంలో నివసించడం రాష్ట్ర ప్రజల్లో ప్రభుత్వంపై విశ్వాసాన్ని పెంచుతుంది. నిశ్శబ్దంగా ఉన్న భవన సముదాయాలకు గృహప్రవేశాల ద్వారా వేగంగా జీవం పోయాలి.

గృహప్రవేశానికి ముందే స్కూళ్లు, ఆసుపత్రులు, రవాణా సదుపాయాలను మెరుగుపరచడం ద్వారా ఉద్యోగులలో ఉన్న భయాందోళనలు తొలగించాలి. పేదవాడికి సొంతింటి కల నెరవేర్చిన ప్రభుత్వం, రాష్ట్రానికి తలమానికమైన రాజధానిలో కూడా నివాసాలను పూర్తి చేసి అమరావతిని సజీవ నగరంగా మార్చాలి.

టిడ్కో ఇళ్ల విజయం ఒక ఆరంభం మాత్రమే. అమరావతిలో సామూహిక గృహప్రవేశం నవ్యాంధ్ర ప్రగతికి సంపూర్ణత్వం కావాలి. పాలనా యంత్రాంగం కోసం నిర్మించిన భవనాలకు కూడా గృహోత్సవం నిర్వహించాలి. అమరావతి వీధుల్లో అధికారుల అడుగుజాడలు, ప్రజాప్రతినిధుల కదలికలు మొదలైనప్పుడే ప్రజా రాజధాని అన్న మాటకు నిజమైన సార్థకత లభిస్తుంది. ఈ దిశగా ముందడుగు వేయడం రాష్ట్ర భవిష్యత్తుకు అత్యంత కీలకం. అమరావతిలో సామూహిక గృహప్రవేశం చారిత్రాత్మక అవసరం. జన నివాసం మొదలైతేనే అమరావతి నిజమైన రాజధానిగా విరాజిల్లుతుంది.

• నీరుకొండ ప్రసాద్
  9849625610