మేడ్చల్లో ఘనంగా మే డే వేడుకలు
మేడ్చల్, ఆంధ్రప్రభ : సైబరాబాద్ మున్సిపల్ కార్పొరేషన్ మేడ్చల్ సర్కిల్ గుండ్ల పోచంపల్లి డివిజన్లో శుక్రవారం ప్రపంచ కార్మిక దినోత్సవాన్ని పురస్కరించుకుని అపెరల్ ఎక్స్పోర్ట్ పార్కులో మే డే వేడుకలు ఘనంగా నిర్వహించారు. ఈ సందర్భంగా ఐఎన్టీయూసీ (INTUC) జెండాను ఆవిష్కరించి, కార్మికుల సంక్షేమం కోసం నినాదాలు చేశారు.
కార్యక్రమానికి ముఖ్య అతిథిగా హాజరైన రాష్ట్ర ఐఎన్టీయూసీ నాయకులు కావేరి శేఖర్ ముదిరాజ్ మాట్లాడుతూ, సమాజ నిర్మాణంలో కార్మికుల పాత్ర వెలకట్టలేనిదని అన్నారు. కార్మికులకు కనీస వేతనాలు, పని ప్రదేశాల్లో భద్రత, గౌరవప్రదమైన జీవితం కల్పించడమే లక్ష్యంగా అందరూ ఐక్యంగా ముందుకు సాగాలని పిలుపునిచ్చారు. కార్మిక హక్కుల పరిరక్షణలో ఐఎన్టీయూసీ ఎల్లప్పుడూ ముందుంటుందని స్పష్టం చేశారు.
ఈ వేడుకల్లో కార్మికులు పెద్ద ఎత్తున పాల్గొని మే డే స్ఫూర్తిని చాటారు. కార్యక్రమంలో అమరం సురేష్ రెడ్డి (రాష్ట్ర ఐఎన్టీయూసీ నాయకులు), దొడ్ల మోహన్ ముదిరాజ్ (కాంగ్రెస్ సీనియర్ నాయకులు), మహిపాల్ రెడ్డి (ఐఎన్టీయూసీ నాయకులు), బట్టికాడి విజయ్ కుమార్ ముదిరాజ్ (గుండ్ల పోచంపల్లి కాంగ్రెస్ ఓబీసీ సెల్), శ్రీరంగవరం నవీన్ కుమార్ ముదిరాజ్ (మున్సిపాలిటీ యూత్ కాంగ్రెస్ అధ్యక్షులు) పాల్గొన్నారు. కార్మికులకు మిఠాయిలు పంపిణీ చేసి, ఒకరికొకరు శుభాకాంక్షలు తెలుపుకోవడంతో ఎక్స్పోర్ట్ పార్క్ ప్రాంగణంలో పండుగ వాతావరణం నెలకొంది.
