Kouthalam Case | ఆరోపణలు ఎదుర్కొన్న తల్లి మృతి..
Kouthalam Case | ఆరోపణలు ఎదుర్కొన్న తల్లి మృతి..
హైకోర్టు ఆదేశాలతో వెలుగులోకి వచ్చిన హత్య కేసు
సిట్ విచారణ అనంతరం మహిళ మృతిపై వివాదం
లాకప్ డెత్ ఆరోపణలు.. పోలీసుల ఖండన
కౌతాళం కేసులో కొత్త ప్రశ్నలు
Kouthalam Case | కర్నూలు బ్యూరో, ఆంధ్రప్రభ : కుమారుడు కనిపించడం లేదంటూ పోలీసులకు ఫిర్యాదు చేసిన తల్లి.. అనంతరం అదే కుమారుడి ఆచూకీ కోసం హైకోర్టును ఆశ్రయించడం.. ఆ కేసు దర్యాప్తులో ఆమెపై కుమారుడి హత్యకు సంబంధించిన ఆరోపణలు వెలుగులోకి రావడం.. ఆ తర్వాత ప్రత్యేక దర్యాప్తు బృందం (సిట్) విచారణ కొనసాగుతున్న సమయంలో ఆమె మృతి చెందడం.. ఇప్పుడు ఆ మరణంపై భిన్నాభిప్రాయాలు వ్యక్తమవడం.. కర్నూలు జిల్లా కౌతాళం మండలంలో చోటుచేసుకున్న ఈ ఘటన రాష్ట్రవ్యాప్తంగా చర్చనీయాంశంగా మారింది. మొదట మిస్సింగ్ కేసుగా నమోదైన ఈ వ్యవహారం, అనంతరం హత్యారోపణలు, హైకోర్టు జోక్యం, సిట్ దర్యాప్తు, చివరకు ప్రధాన నిందితురాలిగా ఆరోపణలు ఎదుర్కొన్న మహిళ మృతి వరకు పలు మలుపులు తిరిగింది.
మిస్సింగ్ కేసు వెనుక హత్యారోపణలు
ఆదోని మండలం జి.హోసళ్లి గ్రామానికి చెందిన మాల గంగమ్మ తన కుమారుడు వీరేంద్ర కనిపించడం లేదంటూ 2024 నవంబర్లో కౌతాళం పోలీస్ స్టేషన్లో ఫిర్యాదు చేశారు. ఈ మేరకు పోలీసులు మిస్సింగ్ కేసు నమోదు చేశారు. అయితే దర్యాప్తు ఆశించిన స్థాయిలో జరగలేదని భావించిన గంగమ్మ హైకోర్టును ఆశ్రయించారు. దీనిపై స్పందించిన హైకోర్టు కేసును సమగ్రంగా విచారించాలని పోలీసు ఉన్నతాధికారులను ఆదేశించింది.
సిట్ దర్యాప్తులో వెలుగులోకి వచ్చిన అంశాలు
హైకోర్టు ఆదేశాల మేరకు ప్రత్యేక దర్యాప్తు బృందం (సిట్) ఏర్పాటు చేశారు. సాంకేతిక ఆధారాలు, కాల్ డేటా, స్థానికుల వాంగ్మూలాలు, కుటుంబ సభ్యుల సమాచారాన్ని పరిశీలిస్తూ సిట్ దర్యాప్తు చేపట్టింది.
దర్యాప్తులో భాగంగా గంగమ్మకు తన బంధువు బేగారి దర్గప్పతో సన్నిహిత సంబంధాలు ఉన్నట్లు గుర్తించినట్లు విచారణ వర్గాల సమాచారం. ఈ సంబంధాన్ని కుమారుడు వీరేంద్ర వ్యతిరేకించాడని, ఈ నేపథ్యంలో విభేదాలు నెలకొన్నాయని సిట్ దర్యాప్తులో వెల్లడైనట్లు తెలుస్తోంది.
వీరేంద్ర హత్యకు సంబంధించి గంగమ్మ, దర్గప్ప పాత్ర ఉందనే అనుమానాలపై సిట్ దర్యాప్తు కొనసాగించింది. అయితే ఈ అంశాలపై తుది నిర్ణయం న్యాయస్థాన పరిధిలోనే ఉంటుందని అధికారులు స్పష్టం చేస్తున్నారు.
మృతదేహం వెలికితీత
దర్యాప్తు సందర్భంగా లభించిన సమాచారం ఆధారంగా జి.హోసళ్లి గ్రామ శ్మశానవాటిక ప్రాంతంలో తవ్వకాలు చేపట్టారు. అక్కడ లభించిన మృతదేహ అవశేషాలను స్వాధీనం చేసుకుని పోస్టుమార్టం నిర్వహించారు. అనంతరం వీరేంద్ర హత్య కేసుకు సంబంధించి పోలీసులు తదుపరి చర్యలు చేపట్టారు.
కొత్త మలుపు తిరిగిన కేసు
వీరేంద్ర హత్య కేసు దర్యాప్తు కొనసాగుతున్న సమయంలో గంగమ్మ మృతి చెందడం కేసును మరోసారి వార్తల్లోకి తెచ్చింది.
పోలీసుల కథనం ప్రకారం, గంగమ్మ అనారోగ్యానికి గురై ఆస్పత్రిలో చికిత్స పొందుతూ మృతి చెందారు. మరోవైపు ఆమె బాత్రూంలో జారి పడటంతో గాయాలపాలై ఆస్పత్రికి తరలించినట్లు కూడా సమాచారం వినిపిస్తోంది.
అయితే ఈ ఘటనపై కుటుంబ సభ్యులు, గ్రామస్తులు, కొందరు హక్కుల సంఘాల ప్రతినిధులు సందేహాలు వ్యక్తం చేస్తున్నారు.
లాకప్ డెత్ ఆరోపణలు
సిట్ విచారణ సందర్భంగా గంగమ్మపై ఒత్తిడి తెచ్చారనే ఆరోపణలు కొందరు వ్యక్తులు చేస్తున్నారు. విచారణలో భాగంగా జరిగిన పరిణామాల వల్లే ఆమె ఆరోగ్యం క్షీణించిందని ఆరోపిస్తున్నారు.
అయితే ఈ ఆరోపణలను పోలీసులు ఖండిస్తున్నారు. గంగమ్మ అనారోగ్య కారణాలతోనే మృతి చెందినట్లు అధికారిక వర్గాలు చెబుతున్నాయి. ప్రస్తుతం ఈ ఆరోపణలకు సంబంధించి అధికారికంగా ఎలాంటి నిర్ధారణ వెలువడలేదు.
సమాధానం కోసం ఎదురుచూస్తున్న ప్రశ్నలు
గంగమ్మ మరణానికి అసలు కారణం ఏమిటి? పోస్టుమార్టం నివేదికలో ఏమి తేలింది? విచారణ సమయంలో ఎలాంటి ఒత్తిడి లేదా ఇతర పరిణామాలు చోటుచేసుకున్నాయా? లాకప్ డెత్ ఆరోపణల్లో వాస్తవం ఎంత? వంటి పలు ప్రశ్నలకు అధికారిక సమాధానాలు రావాల్సి ఉంది.
సంచలనంగా మారిన కౌతాళం కేసు
కుమారుడు కనిపించడం లేదంటూ తల్లే ఫిర్యాదు చేయడం.. అనంతరం హైకోర్టును ఆశ్రయించడం.. కోర్టు ఆదేశాల మేరకు సిట్ దర్యాప్తు జరగడం.. ఆ తర్వాత ఆమెపైనే హత్య ఆరోపణలు రావడం.. దర్యాప్తు కొనసాగుతుండగానే ఆమె మృతి చెందడం.. ఈ పరిణామాలన్నీ కలిపి కౌతాళం కేసును రాష్ట్రవ్యాప్తంగా చర్చనీయాంశంగా మార్చాయి.
వీరేంద్ర హత్య కేసుతో పాటు గంగమ్మ మరణానికి సంబంధించిన అన్ని అంశాలపై పూర్తి స్థాయి వాస్తవాలు వెలుగులోకి తీసుకురావాలని స్థానికులు, ప్రజా సంఘాలు కోరుతున్నాయి. ప్రస్తుతం కేసుకు సంబంధించిన దర్యాప్తు కొనసాగుతోంది.
