Police | దొంగలు దొరికారు..
మూడు వారాల్లో మేడికొండూరు దొంగతనం కేసు చేధించిన పోలీసులు
ముగ్గురు అంతర్జిల్లా దొంగలు అరెస్ట్
రూ. 12 లక్షల సొత్తు స్వాధీనం
గుంటూరు ఎస్పీ వకుల్ జింతాల్ వెల్లడి..
Police | గుంటూరు బ్యూరో, ఆంధ్రప్రభ : మేడికొండూరు పోలీస్ స్టేషన్ పరిధిలో జరిగిన దొంగతన కేసును కేవలం 20 రోజుల్లోనే ఛేదించి, ముగ్గురు (Three) అంతర్జిల్లా దొంగలను అరెస్టు చేసినట్టు గుంటూరు ఎస్పీ వకుల్ జిందల్ వెల్లడించారు. నిందితుల వద్ద నుంచి సుమారు రూ. 12 లక్షల విలువైన బంగారం, వెండి, సెల్ ఫోన్లు, పల్సర్ బైక్‌ను స్వాధీనం చేసుకున్నట్టు తెలిపారు. నవంబర్ 3న రాత్రి 9 గంటల నుంచి నవంబర్ 4 ఉదయం 3:45 గంటల మధ్యలో ఫిర్యాదిదారు ఇంటి తలుపు తాళాన్ని పగులగొట్టి, బీరువా తెరిచి 86 గ్రాముల బంగారం, 150 గ్రాముల వెండి, రూ.40 వేల నగదును దొంగలు ఎత్తుకెళ్లినట్టు ఫిర్యాదు వచ్చిందని ఎస్పీ తెలిపారు. ఫిర్యాదు అందుకున్న వెంటనే సీ ఐ షేక్ నాగూర్ మీరా ప్రత్యేక బృందాలు సీసీ కెమెరాల ఫుటేజీలు, సాంకేతిక విశ్లేషణ, ముఖ్యంగా FRS (Face Recognition System) ద్వారా నిందితుల కదలికలను గుర్తించినట్టు ఎస్పీ వెల్లడించారు. నవంబర్ 28న ఖచ్చితమైన సమాచారంతో పేరేచర్ల పలకలూరు రోడ్డులో వాహన తనిఖీలు నిర్వహించిన మేడికొండూరు పోలీసులు, పల్సర్ బైక్‌పై ప్రయాణిస్తున్న ముగ్గురు వ్యక్తులను అదుపులోకి తీసుకుని విచారించగా, వారు దొంగతనానికి పాల్పడ్డట్టు అంగీకరించారన్నారు.
జైలులో ఏర్పడ్డ గ్యాంగ్
విచారణలో నిందితులు ముగ్గురికి పూర్వ నేరచరిత్ర ఉన్నదే కాకుండా, జైలులో (Prison) ఒకరితో ఒకరు పరిచయం అయి, బయటకు వచ్చిన తర్వాత నర్సరావుపేట పల్నాడు బస్ స్టాండ్ వద్ద హోటల్ గదిలో ఉండి దొంగతనాలకు ప్రణాళికలు వేసుకున్నట్టు ఎస్పీ వివరించారు. పగటిపూట రెక్కీలు చేసి, రాత్రిళ్లు దొంగతనాలు చేస్తూ వచ్చిన డబ్బును జల్సాలకు ఖర్చు చేస్తున్నట్లు విచారణలో వెల్లడైందని చెప్పారు.
దొంగిలించిందంతా స్వాధీనం..
నిందితులు దొంగిలించిన సొత్తు మొత్తాన్ని రికవరీ చేసినట్లు ఎస్పీ వకుల్ (SP Vakul) తెలిపారు. చైన్, నల్లపూసల గొలుసులు, చెవి దుద్దులు కలిపి 88 గ్రాముల బంగారం, 82 గ్రాముల వెండి వస్తువులు, రెండు మొబైల్ ఫోన్లు, పల్సర్ బైక్ స్వాధీనం చేసుకున్నట్లు చెప్పారు. నిందితుల్లో దేవరకొండ రాంబాబు పై తెలంగాణ, ఆంధ్రప్రదేశ్‌లలో 120కి పైగా ఇంటిదొంగతనాలు పాయకాపురం, పెదకాకాని, కొత్తపేట, నల్లపాడు, మంగళగిరి స్టేషన్లలో కేసులు ఉన్నట్లు ఎస్పీ వకుల్ జిందాల్ తెలిపారు. మరో నిందితుడు తుపాకుల వెంకటేష్ బైక్ దొంగతనాల్లో నిపుణుడు అని చిలకలూరిపేట, పిడుగురాళ్లు, మిర్యాలగూడ, నల్గొండ, భువనగిరి, సూర్యాపేట పరిధుల్లో సుమారు 50 కేసులు అతనిపై ఉన్నాయన్నారు. బొమ్మల విజయ్ అనే మూడో నిందితుడు మీద మర్డర్, దొంగనోట్లు, దొంగతనాలు కలిపి 8 కేసులు మార్టూరు, వట్టిచెరుకూరు, నర్సరావుపేట పరిధిలో క్రిమినల్ చరిత్ర ఉందన్నారు. ఈ కేసును సమర్థవంతంగా ఛేదించిన తుళ్ళూరు ఎస్డీపీఓ టీ. మురళీకృష్ణ, సీ ఐ షేక్ నాగూర్ మీరా, యస్ ఐ ఖాజీ బాబు, సిబ్బంది సాదిక్, సైదా, ప్రవీణ్, సురేష్, ఐటీ కోర్ కానిస్టేబుళ్లు సిల్వెస్టర్, ఉపేంద్రలను ఎస్పీ ప్రశంసించి, ప్రశంసాపత్రాలు అందజేశారు.
