మేఘమా… కరుణించుమా..!

• వాన కోసం ఆకాశం వైపు ఆశగా ఎదురు చూస్తున్న అన్నదాత

భీమ్‌గల్ టౌన్, ఆంధ్రప్రభ : ఖరీఫ్ సీజన్ ప్రారంభమై చాలా రోజులు గడుస్తున్నా భీమ్‌గల్ మండలంతో పాటు పరిసర ప్రాంతాల్లో ఇప్పటి వరకు ఒక్క మోస్తరు వర్షం కూడా కురవకపోవడంతో రైతాంగం తీవ్ర ఆందోళనకు గురవుతోంది. సాధారణంగా ఈ సమయానికి పొలాలు పచ్చని పంటలతో కళకళలాడాల్సి ఉండగా, ప్రస్తుతం ఎండిన నేలలు, వర్షం కోసం ఎదురుచూస్తున్న రైతులే కనిపిస్తున్నారు. వరుణ దేవుడి కరుణ కోసం రైతులు రోజూ ఆకాశం వైపు ఆశగా చూస్తున్నారు. ఈ సీజన్‌లో పత్తి, సోయాబీన్, మొక్కజొన్న, వరి, కంది తదితర పంటలు సాగు చేసేందుకు రైతులు ఇప్పటికే విత్తనాలు, ఎరువులు, పురుగుమందులు కొనుగోలు చేశారు.

కొందరు రైతులు ప్రైవేట్ అప్పులు చేసి, మరికొందరు బ్యాంకుల నుంచి రుణాలు తీసుకుని పెట్టుబడులు పెట్టారు. ప్రారంభంలో ఒకటి, రెండు సార్లు చిరుజల్లులు కురవడంతో ఆశలు చిగురించి విత్తనాలు వేశారు. అయితే ఆ తర్వాత వర్షాలు పూర్తిగా ముఖం చాటేయడంతో నేలలో తేమ లేక విత్తనాలు మొలకెత్తకపోవడం, మొలకెత్తిన పంటలు ఎండిపోవడం రైతులను తీవ్ర నిరాశకు గురిచేస్తోంది. భీమ్‌గల్ ప్రాంతంలో ఎక్కువ శాతం వ్యవసాయం పూర్తిగా వర్షాధారంగానే సాగుతుంది. చెరువులు, కుంటలు, వాగుల్లో నీటి నిల్వలు లేకపోవడం, భూగర్భ జలాలు కూడా తగ్గుముఖం పట్టడంతో బోర్‌వెల్‌లపై ఆధారపడే పరిస్థితి లేదు. దీంతో ప్రత్యామ్నాయంగా సాగునీరు అందించే అవకాశం కూడా రైతులకు లేకుండా పోతోంది.

ఇప్పటికే పగటి ఉష్ణోగ్రతలు 35 నుంచి 38 డిగ్రీల వరకు నమోదవుతుండటంతో నేలలోని తేమ వేగంగా ఆవిరైపోతోంది. వర్షం ఆలస్యమైతే రెండోసారి విత్తనాలు వేయాల్సిన పరిస్థితి వస్తుందని, దీనివల్ల పెట్టుబడి మరింత పెరిగి ఆర్థికంగా తీవ్ర నష్టాలు ఎదుర్కోవాల్సి వస్తుందని రైతులు ఆవేదన వ్యక్తం చేస్తున్నారు. వ్యవసాయ పనులపై ఆధారపడే కూలీల పరిస్థితి కూడా దయనీయంగా మారింది. పొలాల్లో పనులు లేకపోవడంతో ఉపాధి కోల్పోయిన వ్యవసాయ కూలీలు ఇతర ప్రాంతాలకు వలస వెళ్లే పరిస్థితులు నెలకొంటున్నాయని గ్రామస్తులు చెబుతున్నారు.

పశువులకు మేత కొరత ఏర్పడే ప్రమాదం కూడా రైతులను కలవరపెడుతోంది. వాతావరణంలో మేఘాలు కనిపిస్తున్నప్పటికీ వర్షం కురవకపోవడం, ఎల్‌నీనో ప్రభావంతో వర్షపాతం అస్థిరంగా ఉండడం రైతుల్లో మరింత ఆందోళన కలిగిస్తోంది. మరో వారం రోజుల్లో మంచి వర్షాలు కురవకపోతే ఖరీఫ్ సాగు తీవ్రంగా దెబ్బతినే అవకాశం ఉందని వ్యవసాయ నిపుణులు అభిప్రాయపడుతున్నారు.

ఈ నేపథ్యంలో వ్యవసాయ శాఖ అధికారులు గ్రామాల్లో పర్యటించి రైతులకు పరిస్థితులకు అనుగుణంగా పంటల ఎంపిక, ప్రత్యామ్నాయ పంటలు, విత్తనాల వినియోగంపై అవగాహన కల్పించాలని రైతులు కోరుతున్నారు. అవసరమైతే ప్రభుత్వం ప్రత్యేక సహాయ చర్యలు ప్రకటించి, విత్తనాల రాయితీ, పంట బీమా, పంట నష్టపరిహారం వంటి అంశాల్లో రైతులను ఆదుకోవాలని కోరుతున్నారు. “అన్నదాత బాగుంటేనే దేశం బాగుంటుంది… ఒక్క మంచి వర్షం కురిస్తేనే రైతు ముఖంలో చిరునవ్వు కనిపిస్తుంది. మేఘమా… కరుణించుమా!” అంటూ భీమ్‌గల్ ప్రాంత రైతులు వరుణ దేవుడిని వేడుకుంటున్నారు.