500 percent | ఇరాన్లో.. ఆర్థిక సంక్షోభం !
500 percent | ఇరాన్లో.. ఆర్థిక సంక్షోభం !
యుద్ధం తర్వాత గడ్డు పరిస్థితులు
బియ్యం, గుడ్లు కూడా కొనలేని దుస్థితి
112 శాతానికి పైగా పెరిగిన ఆహార ద్రవ్యోల్బణం..
ఆకాశాన్నంటిన నిత్యావసరాల ధరలు
పాతాళానికి పడిపోయిన రియాల్ విలువ.. కోట్లలో నిరుద్యోగులు
చరిత్రలో తొలిసారిగా 8 వారాలుగా మూతపడిన టెహ్రాన్ స్టాక్ మార్కెట్
500 percent | న్యూఢిల్లీ, ఆంధ్రప్రభ : ఇటీవలి యుద్ధం తర్వాత ఇరాన్ తీవ్ర ఆర్థిక సంక్షోభంలో చిక్కుకుంది. దేశ ఆర్థిక వ్యవస్థ కుప్పకూలడంతో సామాన్య ప్రజల జీవనం అస్తవ్యస్తంగా మారింది. ఆకాశాన్నంటిన ధరలు, పాతాళానికి పడిపోయిన కరెన్సీ విలువ, భారీగా పెరిగిన నిరుద్యోగంతో దేశం అట్టుడుకుతోంది.
500 percent | వంట నూనెల ధర 200 శాతం పెరుగుదల
నిత్యావసర వస్తువుల ధరలు సామాన్యులకు అందనంత ఎత్తుకు చేరాయి. అధికారిక గణాంకాల ప్రకారం, ఆహార ద్రవ్యోల్బణం 112 శాతానికి పైగా పెరిగింది. వంట నూనెల ధరలైతే ఏకంగా 200 శాతం ఎగబాకాయి. బియ్యం, కోడిగుడ్లు వంటి సాధారణ ఆహార పదార్థాలు కూడా కొనలేని దుస్థితి నెలకొంది. చివరికి అంత్యక్రియల ఖర్చులు సైతం 40 శాతం పెరగడం పరిస్థితి తీవ్రతకు అద్దం పడుతోంది.
500 percent | ఉపాధి కోల్పోయిన లక్షల మంది
ఈ సంక్షోభం కారణంగా లక్షలాది మంది ఉపాధి కోల్పోయారు. అధికారిక లెక్కల ప్రకారం 10 లక్షల మంది ఉద్యోగాలు కోల్పోగా, అనధికారికంగా ఈ సంఖ్య 30 నుంచి 40 లక్షల వరకు ఉంటుందని అంచనా. దీంతో దాదాపు 1.5 కోట్ల మంది ప్రజలు ఆదాయం లేక అల్లాడుతున్నారు. మరోవైపు, ఇరాన్ కరెన్సీ రియాల్ విలువ చరిత్రలో ఎన్నడూ లేనంతగా పడిపోయింది. ప్రస్తుతం ఒక అమెరికన్ డాలర్కు దాదాపు 16 లక్షల రియాల్స్ వద్ద ట్రేడ్ అవుతోంది.
ఆధునిక కరువు
దేశంలో నెలకొన్న అనిశ్చితి కారణంగా టెహ్రాన్ స్టాక్ ఎక్స్ఛేంజ్ చరిత్రలో తొలిసారిగా వరుసగా 8 వారాలుగా మూతపడింది. మార్కెట్లో వస్తువులు ఉన్నప్పటికీ, వాటిని కొనుగోలు చేసే శక్తి ప్రజలకు లేకపోవడంతో ‘ఆధునిక కరువు’ వంటి పరిస్థితులు కనిపిస్తున్నాయని ఆర్థిక నిపుణులు విశ్లేషిస్తున్నారు. అమెరికా ఆంక్షలు, యుద్ధం వల్ల దెబ్బతిన్న కీలక పరిశ్రమల కారణంగానే ఈ దుస్థితి ఏర్పడింది. ఈ పరిస్థితి ఇలాగే కొనసాగితే, ద్రవ్యోల్బణం 500 శాతం వరకు పెరిగే ప్రమాదం ఉందని నిపుణులు హెచ్చరిస్తున్నారు.
CLICK HERE TO READ MORE : క్రీడా ప్రతిభ వెలికితీతకు.. కీలక అడుగు
