5 workers Died| ప్రాణాలు తీసిన క్రేన్.. చేవెళ్ల నియోజకవర్గంలో పెను విషాదం
5 workers Died| ప్రాణాలు తీసిన క్రేన్.. చేవెళ్ల నియోజకవర్గంలో పెను విషాదం
ఆంధ్రప్రభ వెబ్ డెస్క్ : రంగారెడ్డి జిల్లా చేవెళ్ల నియోజకవర్గంలో ఘోర విషాదం చోటుచేసుకుంది. శంకర్పల్లి మండలం మహాలింగాపురం గ్రామ పరిధిలో ఉన్న ఎసీసీ సిమెంట్ బ్రిక్స్ కంపెనీలో సోమవారం భారీ ప్రమాదం సంభవించింది. కంపెనీ ఆవరణలో పని జరుగుతున్న సమయంలో అకస్మాత్తుగా భారీ క్రేన్ కుప్పకూలడంతో అక్కడ ఒక్కసారిగా భయానక పరిస్థితులు నెలకొన్నాయి.
పని నిమిత్తం అక్కడ ఉన్న కార్మికులు ఏం జరుగుతుందో అర్థం చేసుకునేలోపే క్రేన్ ఒక్కసారిగా విరిగి కిందపడింది. భారీ ఇనుప నిర్మాణం కింద పలువురు కార్మికులు చిక్కుకుపోయారు. అక్కడి నుంచి వినిపించిన కేకలు, ఆర్తనాదాలు స్థానికులను కలిచివేశాయి. సహచర కార్మికులు, స్థానికులు పరుగెత్తుకుంటూ వచ్చి శిథిలాల కింద చిక్కుకున్న వారిని బయటకు తీసే ప్రయత్నం చేశారు.
ఈ దుర్ఘటనలో ఐదుగురు అక్కడికక్కడే ప్రాణాలు కోల్పోయినట్లు సమాచారం. మరో 12 మంది తీవ్రంగా గాయపడ్డారు. గాయపడిన వారిలో ఇద్దరి పరిస్థితి అత్యంత విషమంగా ఉన్నట్లు వైద్యులు వెల్లడించారు. క్షతగాత్రులను వెంటనే సమీప ఆసుపత్రులకు తరలించి చికిత్స అందిస్తున్నారు. ప్రమాద వార్త తెలిసిన వెంటనే పోలీసులు, అగ్నిమాపక సిబ్బంది, రెస్క్యూ బృందాలు ఘటనాస్థలికి చేరుకుని సహాయక చర్య చేపట్టారు .
