294seats | బెంగాల్ రెండో దశ ఎన్నికల్లో ట్వీస్ట్
294seats | బెంగాల్ రెండో దశ ఎన్నికల్లో ట్వీస్ట్
294seats | ఈవీఎంలపై సంచలనం రేపిన ఆరోపణలు
బీజేపీ vs టీఎంసీ.. రాజకీయ యుద్ధం ముదురింది
ఎన్నికల కమిషన్ కఠిన చర్యలు
రీ-పోలింగ్ హెచ్చరికతో టెన్షన్
294seats | ఆంధ్రప్రభ, వెబ్ డెస్క్ : పశ్చిమ బెంగాల్ ఎన్నికల పోలింగ్ వేళ ఈవీఎం యంత్రాల చుట్టూ రాజకీయ యుద్ధం నడుస్తోంది. ముఖ్యంగా బీజేపీ గుర్తు ‘కమలం’ ఓటర్లకు కనిపించకుండా అడ్డుకుంటున్నారనే ఆరోపణలు సంచలనం రేపుతున్నాయి. పశ్చిమ బెంగాల్లోని 294 సీట్లకు గానూ ఏప్రిల్ 23న 152 సీట్లకు, నేడు (ఏప్రిల్ 29) మిగిలిన 142 సీట్లకు పోలింగ్ జరుగుతోంది.
ఈవీఎం బటన్లపై సిరా, టేపులు..
మొదటి దశలో ఉత్తర దినాజ్పూర్ జిల్లాలోని చోప్రా నియోజకవర్గంలో, అలాగే రఘునాథ్పూర్ వంటి ప్రాంతాల్లో ఈవీఎంలపై బీజేపీ గుర్తుకు ఎవరో కావాలనే సున్నం, సిరా పూశారని బీజేపీ నేతలు ఆరోపించారు. దీనివల్ల ఓటర్లకు కమలం గుర్తు స్పష్టంగా కనిపించడం లేదని వారు ఫిర్యాదు చేశారు.
నేడు జరుగుతున్న రెండో దశలో కూడా డయామండ్ హార్బర్ నియోజకవర్గ పరిధిలోని ఫాల్టా వద్ద బీజేపీ బటన్పై టేపులు అంటించారని, దీనివల్ల ఓటర్లు ఆ బటన్ నొక్కలేకపోతున్నారని బీజేపీ ఐటీ సెల్ హెడ్ అమిత్ మాలవీయ ఆరోపించారు. దీనిని ఆయన “డయామండ్ హార్బర్ మోడల్” అని విమర్శించారు.
టీఎంసీ ప్రతిదాడి..
తృణమూల్ కాంగ్రెస్ (TMC) కూడా ప్రతిదాడి చేస్తూ.. బీజేపీ నేతలు అధికారులతో కుమ్మక్కై ఈవీఎంలను ప్రభావితం చేస్తున్నారని, కొన్ని చోట్ల బీజేపీ గుర్తు పక్కన ప్రత్యేక గుర్తులు (Ink Marks) ఉన్నాయని ఆరోపించింది.
ఎన్నికల కమిషన్ స్పందన..
ఈ వివాదాలపై ఎన్నికల కమిషన్ చాలా కఠినంగా స్పందించింది. గుర్తుపై సిరా పూసినట్లు ఫిర్యాదు రాగానే, కేంద్ర బలగాల సమక్షంలో వెంటనే ఆ యంత్రాలను శుభ్రం చేయించారు. ఓటింగ్ నిరంతరాయంగా సాగేలా చర్యలు తీసుకున్నారు.
రీ-పోలింగ్ హెచ్చరిక..
పశ్చిమ బెంగాల్ చీఫ్ ఎలక్టోరల్ ఆఫీసర్ (CEO) స్పందిస్తూ.. “ఏదైనా బూత్లో ఈవీఎం బటన్పై టేపులు వేసినట్లు నిర్ధారణ అయితే, అక్కడ కచ్చితంగా రీ-పోలింగ్ (తిరిగి ఎన్నిక) నిర్వహిస్తాం” అని స్పష్టం చేశారు. విధుల్లో నిర్లక్ష్యం వహించినందుకు గాను ఇద్దరు అదనపు జిల్లా మేజిస్ట్రేట్లను ఎన్నికల కమిషన్ ఇప్పటికే విధుల నుండి తొలగించింది.
హింసాత్మక సంఘటనలు అక్కడక్కడా జరుగుతున్నప్పటికీ, ఓటర్లు భారీ సంఖ్యలో తరలివస్తున్నారు. మొదటి దశలో దాదాపు 91% పైగా ఓటింగ్ నమోదవ్వడం విశేషం. ఈ ఎన్నికల ఫలితాలు మే 4, 2026న విడుదల కానున్నాయి.
