రెండేళ్ల పాలన విజయోత్సవం..

అభివృద్ధి వేగం మరింత పెరుగుతుంది

ప్రభుత్వ పథకాలను ప్రతి ఇంటికీ చేర్చాలి: ఎమ్మెల్యే గొండు శంకర్

శ్రీకాకుళం, ఆంధ్రప్రభ : అభివృద్ధి, సంక్షేమ కార్యక్రమాలను మరింత విస్తృతంగా అమలు చేస్తూ ప్రజలకు ప్రభుత్వ సేవలను చేరువ చేయడమే లక్ష్యమని శ్రీకాకుళం ఎమ్మెల్యే గొండు శంకర్ అన్నారు. ప్రభుత్వ పథకాలను ప్రతి ఇంటికీ చేరవేసి ప్రజల్లో మరింత అవగాహన కల్పించాలని పార్టీ శ్రేణులకు పిలుపునిచ్చారు.

శ్రీకాకుళం నగరంలోని 80 ఫీట్ రోడ్డులో గల ఆనందమయి ఫంక్షన్ హాల్‌లో కూటమి ప్రభుత్వ రెండేళ్ల పాలన పూర్తయిన సందర్భంగా నిర్వహించిన విజయోత్సవ సభలో ఆయన ముఖ్య అతిథిగా పాల్గొని ప్రసంగించారు. ఈ కార్యక్రమంలో కూటమి పార్టీల నాయకులు, ప్రజాప్రతినిధులు, కార్యకర్తలు, మహిళలు, యువత, అభిమానులు పెద్ద సంఖ్యలో హాజరయ్యారు.

ప్రభుత్వ రెండేళ్ల పాలనలో సాధించిన విజయాలను ప్రతిబింబించేలా ఏర్పాటు చేసిన ప్రచార ప్రదర్శనలు, ఫ్లెక్సీలు, పోస్టర్లు సభకు ప్రత్యేక ఆకర్షణగా నిలిచాయి.

ఈ సందర్భంగా ఎమ్మెల్యే మాట్లాడుతూ, గత రెండేళ్లలో ప్రభుత్వం ప్రజా సంక్షేమం, అభివృద్ధికి అత్యంత ప్రాధాన్యతనిస్తూ అనేక పథకాలను అమలు చేసిందన్నారు. విద్య, వైద్యం, వ్యవసాయం, మౌలిక సదుపాయాలు, మహిళా సాధికారత, యువత ఉపాధి, సామాజిక భద్రత వంటి రంగాల్లో గణనీయమైన పురోగతి సాధించామని పేర్కొన్నారు.

ప్రజలకు ఇచ్చిన హామీలను నెరవేర్చేందుకు ప్రభుత్వం నిబద్ధతతో పనిచేస్తోందని, రానున్న రోజుల్లో మరిన్ని అభివృద్ధి కార్యక్రమాలను చేపట్టి ప్రతి కుటుంబానికి ప్రభుత్వ సేవలు అందేలా కృషి చేస్తామని తెలిపారు. ప్రజల విశ్వాసమే ప్రభుత్వానికి బలమని, అదే స్ఫూర్తితో మరింత పారదర్శకంగా పాలన కొనసాగిస్తామని అన్నారు.

అభివృద్ధి, సంక్షేమ కార్యక్రమాల అమలులో ప్రభుత్వం చూపుతున్న చిత్తశుద్ధి వల్ల అన్ని వర్గాల ప్రజలు లబ్ధి పొందుతున్నారని చెప్పారు. ప్రభుత్వ పథకాలను ప్రజలకు చేరవేసి, వారి సమస్యలను ఎప్పటికప్పుడు ప్రభుత్వ దృష్టికి తీసుకెళ్లే బాధ్యత పార్టీ కార్యకర్తలపై ఉందని సూచించారు.

రాష్ట్ర అభివృద్ధికి ప్రతి కార్యకర్త అంకితభావంతో పనిచేయాలని, ప్రజలతో నిరంతరం మమేకమై వారి సమస్యల పరిష్కారానికి కృషి చేయాలని పిలుపునిచ్చారు.

ఈ కార్యక్రమంలో కూటమి పార్టీల నాయకులు, కార్యకర్తలు, ప్రజలు అధిక సంఖ్యలో పాల్గొన్నారు.