వరంగల్ అర్బన్ కో-ఆపరేటివ్ బ్యాంక్ బ్రాంచ్ అడ్వైజర్గా గందె వెంకటేశ్వర్లు
- పరకాల శాఖ అభివృద్ధికి అనుభవం ఉపయోగపడుతుందన్న బ్యాంక్ యాజమాన్యం
పరకాల, ఆంధ్రప్రభ: వరంగల్ అర్బన్ కో-ఆపరేటివ్ బ్యాంక్ లిమిటెడ్ పరకాల శాఖకు బ్రాంచ్ అడ్వైజర్ (శాఖ సలహాదారు)గా పరకాల పట్టణానికి చెందిన ప్రముఖ సామాజికవేత్త, బ్యాంక్ ఖాతాదారుడు గందె వెంకటేశ్వర్లు నియమితులైనట్లు శాఖ మేనేజర్ కె. శ్రీనివాసరావు తెలిపారు.
బ్యాంక్ బోర్డ్ ఆఫ్ డైరెక్టర్స్ ఈ నెల 8న నిర్వహించిన సమావేశంలో తీసుకున్న నిర్ణయం మేరకు ఈ నియామకం చేపట్టినట్లు అధికారులు వెల్లడించారు. ఈ మేరకు బ్యాంక్ చీఫ్ ఎగ్జిక్యూటివ్ ఆఫీసర్ ఎం. సత్యనారాయణరావు జూన్ 10న అధికారిక ఉత్తర్వులు జారీ చేశారు.
అనంతరం పరకాల శాఖలో నిర్వహించిన కార్యక్రమంలో బ్రాంచ్ మేనేజర్ కె. శ్రీనివాసరావు గందె వెంకటేశ్వర్లును శాలువాతో ఘనంగా సత్కరించి, నియామక పత్రాన్ని అందజేశారు.
ఈ సందర్భంగా ఆయన మాట్లాడుతూ, గందె వెంకటేశ్వర్లుకు సమాజంలో ఉన్న విస్తృత పరిచయాలు, ప్రజల్లో ఉన్న మంచి పేరు ప్రతిష్టలు, బ్యాంకింగ్ రంగంపై ఉన్న అవగాహన బ్యాంక్ అభివృద్ధికి ఎంతో దోహదపడతాయన్నారు. పరకాల శ్రీ కుంకుమేశ్వర స్వామి దేవస్థానం చైర్మన్గా నాలుగు పర్యాయాలు సేవలందించడం, వైశ్య సంఘం కోశాధికారిగా, ఆర్యవైశ్య యువజన సంఘం అధ్యక్షుడిగా, పరకాల మండల ఫెర్టిలైజర్స్, పెస్టిసైడ్స్ అండ్ సీడ్స్ డీలర్స్ వెల్ఫేర్ అసోసియేషన్ అధ్యక్షుడిగా పనిచేసిన అనుభవం బ్యాంక్కు ఉపయోగపడుతుందని పేర్కొన్నారు.
బ్రాంచ్ అడ్వైజర్ హోదా పూర్తిగా గౌరవప్రదమైన హానరరీ పదవని ఆయన వివరించారు. కస్టమర్ సేవల మెరుగుదలకు సూచనలు ఇవ్వడం, బ్యాంకింగ్ సేవలను విస్తరించడం, స్థానిక వ్యాపారులు, రైతులు, మహిళా సంఘాలతో సంబంధాలను బలోపేతం చేయడం, ప్రజల అవసరాలకు అనుగుణంగా శాఖ కార్యకలాపాలకు మార్గదర్శకత్వం వహించడం వంటి బాధ్యతలను గందె వెంకటేశ్వర్లు నిర్వహించనున్నట్లు తెలిపారు.
ఈ సందర్భంగా గందె వెంకటేశ్వర్లు మాట్లాడుతూ, బ్యాంక్ యాజమాన్యం తనపై ఉంచిన నమ్మకాన్ని నిలబెట్టుకునేందుకు కృషి చేస్తానన్నారు. బ్రాంచ్ హెడ్, సిబ్బందితో సమన్వయంగా పనిచేస్తూ బ్యాంక్ ప్రతిష్టను మరింత పెంచేందుకు, ఖాతాదారులకు నాణ్యమైన సేవలు అందించేందుకు తన వంతు సహకారం అందిస్తానని చెప్పారు.
పరకాల ప్రాంతంలో బ్యాంకింగ్ సేవలను మరింత విస్తరించడంలో, ప్రజలకు చేరువ చేయడంలో ఈ నియామకం కీలక పాత్ర పోషిస్తుందని బ్యాంక్ యాజమాన్యం ఆశాభావం వ్యక్తం చేసింది.
