DSC అక్రమాలపై సీబీఐ విచారణకు డిమాండ్..

ఓడీసీలో వైఎస్సార్సీపీ రిలే నిరాహార దీక్షలు

శ్రీ సత్యసాయి బ్యూరో, ఆగస్టు 6 (ఆంధ్రప్రభ): రాష్ట్రంలో నిర్వహించిన DSC–2025 నియామక ప్రక్రియలో అక్రమాలు జరిగాయని ఆరోపిస్తూ వాటిపై కేంద్ర దర్యాప్తు సంస్థ (CBI)తో సమగ్ర విచారణ జరిపించాలని డిమాండ్ చేస్తూ శ్రీ సత్యసాయి జిల్లా పుట్టపర్తి నియోజకవర్గంలోని ఓడీసీ (ODC) మండల కేంద్రంలో వైఎస్సార్సీపీ ఆధ్వర్యంలో రిలే నిరాహార దీక్షలు చేపట్టారు. మండల తహసీల్దార్ (ఎంఆర్వో) కార్యాలయం సమీపంలో నిర్వహించిన ఈ దీక్షల్లో వైఎస్సార్సీపీ నాయకులు, డీఎస్సీ బాధిత అభ్యర్థులు, నిరుద్యోగ యువత పెద్ద సంఖ్యలో పాల్గొన్నారు.

ఈ సందర్భంగా నిరసనకారులు మాట్లాడుతూ, మాజీ ముఖ్యమంత్రి వై.ఎస్. జగన్ మోహన్ రెడ్డి ఆదేశాల మేరకు, వైఎస్సార్సీపీ నాయకుడు దుద్దుకుంట శ్రీధర్ రెడ్డి పిలుపు మేరకు ఈ ఆందోళన నిర్వహిస్తున్నట్లు తెలిపారు. డీఎస్సీ–2025 పరీక్షల నిర్వహణలో పారదర్శకత లోపించిందని, ప్రశ్నపత్రం లీకేజీ, అక్రమాలు, అవకతవకలపై అనేక అనుమానాలు వ్యక్తమవుతున్న నేపథ్యంలో రాష్ట్ర ప్రభుత్వం స్వతంత్ర దర్యాప్తుకు అవకాశం కల్పించాలని కోరారు.

డీఎస్సీలో జరిగినట్లు ఆరోపిస్తున్న అక్రమాలపై సీబీఐతో విచారణ జరిపించి వాస్తవాలను ప్రజల ముందుకు తీసుకురావాలని వారు డిమాండ్ చేశారు. పరీక్షలకు సిద్ధమవుతూ ఎన్నో సంవత్సరాలుగా కష్టపడిన నిరుద్యోగ యువత భవిష్యత్తుతో ప్రభుత్వం చెలగాటం ఆడుతోందని విమర్శించారు. నియామక ప్రక్రియపై పూర్తిస్థాయి స్పష్టత ఇచ్చే వరకు అభ్యర్థుల్లో ఉన్న అనుమానాలు తొలగవని పేర్కొన్నారు.

అలాగే రాష్ట్రంలో నిరుద్యోగ సమస్య తీవ్రంగా ఉందని, ఉద్యోగాల కోసం ఎదురుచూస్తున్న యువతకు ప్రభుత్వం ఇచ్చిన హామీలను అమలు చేయాలని కోరారు. ప్రతి నిరుద్యోగ యువకుడికి నెలకు రూ.3,000 చొప్పున నిరుద్యోగ భృతి వెంటనే మంజూరు చేయాలని డిమాండ్ చేశారు. ఉద్యోగ నోటిఫికేషన్లు ఆలస్యం కావడం వల్ల వేలాది మంది యువత తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు.
విద్యార్థులకు సంబంధించిన విద్యా దీవెన, వసతి దీవెన పథకాల బకాయిలను కూడా ప్రభుత్వం వెంటనే విడుదల చేయాలని ఆందోళనకారులు కోరారు. ఉన్నత విద్యను అభ్యసిస్తున్న విద్యార్థులు ఫీజులు చెల్లించలేక ఇబ్బందులు పడుతున్నారని, ప్రభుత్వం సంక్షేమ పథకాల అమలులో జాప్యం చేయడం వల్ల పేద కుటుంబాలపై ఆర్థిక భారం పెరుగుతోందని పేర్కొన్నారు.

డీఎస్సీ ప్రశ్నపత్రం లీకేజీకి నైతిక బాధ్యత వహిస్తూ రాష్ట్ర విద్యాశాఖ మంత్రి నారా లోకేష్ తన మంత్రి పదవికి రాజీనామా చేయాలని నిరసనకారులు డిమాండ్ చేశారు. విద్యా వ్యవస్థపై ప్రజల్లో విశ్వాసం నిలబెట్టాలంటే ప్రభుత్వం పారదర్శకంగా వ్యవహరించి ఆరోపణలపై నిష్పక్షపాత దర్యాప్తు చేపట్టాలని కోరారు.

దీక్షా శిబిరంలో పాల్గొన్న వైఎస్సార్సీపీ నాయకులు మాట్లాడుతూ, డీఎస్సీ అభ్యర్థులకు న్యాయం జరిగే వరకు తమ పోరాటం కొనసాగుతుందని స్పష్టం చేశారు. నిరుద్యోగ యువత, విద్యార్థుల సమస్యలను ప్రభుత్వం వెంటనే పరిష్కరించాలని, లేకపోతే రాష్ట్రవ్యాప్తంగా ఆందోళనలు మరింత ఉధృతం చేస్తామని హెచ్చరించారు. కార్యక్రమంలో పార్టీ నాయకులు, కార్యకర్తలు, డీఎస్సీ అభ్యర్థులు, నిరుద్యోగ యువత తదితరులు పాల్గొని ప్రభుత్వానికి వ్యతిరేకంగా నినాదాలు చేశారు.