Arjuna-Ranatunga-Visits : సత్యసాయి సన్నిధిలో రణతుంగ..
Arjuna-Ranatunga-Visits : సత్యసాయి సన్నిధిలో రణతుంగ..
- పుట్టపర్తిలో మహాసమాధికి ప్రత్యేక పూజలు
- మేనేజింగ్ ట్రస్టీ రత్నాకర్తో భేటీ
( శ్రీ సత్యసాయి , ఆంధ్రప్రభ ):
Arjuna-Ranatunga-Visits : శ్రీలంక మాజీ క్రికెట్ దిగ్గజం, భగవాన్ శ్రీ సత్యసాయి బాబా చిరకాల భక్తుడు అర్జున రణతుంగ మంగళవారం పుట్టపర్తికి విచ్చేసి ప్రశాంతి నిలయంలో స్వామి మహాసమాధిని దర్శించుకుని ప్రత్యేక ప్రార్థనలు నిర్వహించారు. స్వామి ఆశీస్సులు పొందేందుకు వచ్చిన ఆయన ఆధ్యాత్మిక వాతావరణంలో కొంతసేపు గడిపి భక్తిశ్రద్ధలతో ప్రార్థనలు చేశారు.
అనంతరం శాంతి భవన్లో శ్రీ సత్యసాయి సెంట్రల్ ట్రస్ట్ మేనేజింగ్ ట్రస్టీ ఆర్.జే. రత్నాకర్ను మర్యాదపూర్వకంగా కలిశారు. ఈ సందర్భంగా ఇద్దరూ ఆధ్యాత్మిక విలువలు, మానవతా సేవ, సమాజాభివృద్ధిలో సేవా కార్యక్రమాల ప్రాధాన్యత వంటి అంశాలపై సుదీర్ఘంగా చర్చించినట్లు తెలిసింది. ప్రపంచవ్యాప్తంగా శ్రీ సత్యసాయి బాబా సందేశాలను ప్రజల్లోకి తీసుకెళ్లడం, సేవా కార్యక్రమాలను మరింత విస్తరించడం వంటి అంశాలు కూడా వీరిద్దరి ప్రస్తావనకు వచ్చినట్లు సమాచారం.
అర్జున రణతుంగకు శ్రీ సత్యసాయి బాబాపై ఎంతోకాలంగా అపారమైన భక్తి ఉంది. అవకాశం దొరికినప్పుడల్లా పుట్టపర్తికి వచ్చి స్వామివారిని దర్శించుకోవడం ఆయన ఆనవాయితీగా కొనసాగిస్తున్నారు. ఈసారి కూడా వ్యక్తిగత ఆధ్యాత్మిక పర్యటనలో భాగంగా ప్రశాంతి నిలయాన్ని సందర్శించి ప్రత్యేక పూజలు నిర్వహించారు.
రణతుంగ పుట్టపర్తి పర్యటన సందర్భంగా ట్రస్ట్ ప్రతినిధులు ఆయనకు స్వాగతం పలికారు. అనంతరం ప్రశాంతి నిలయంలో జరుగుతున్న వివిధ సేవా కార్యక్రమాలు, విద్యా, వైద్య సేవల గురించి వివరించారు. పుట్టపర్తిలో గడిపిన ఈ పర్యటన తనకు ఎంతో ఆధ్యాత్మిక ప్రశాంతతను కలిగించిందని రణతుంగ పేర్కొన్నట్లు ట్రస్ట్ వర్గాలు వెల్లడించాయి. ఈ పర్యటన భక్తులు, క్రికెట్ అభిమానుల్లో ప్రత్యేక ఆసక్తిని రేకెత్తించింది.
