351 devotees |ఇంద్రకీలాద్రికి పోటెత్తిన భక్తజనం

351 devotees | ఇంద్రకీలాద్రికి పోటెత్తిన భక్తజనం

బుధవారం 42,957 మంది అమ్మవారి దర్శనం
రూ.3.39 లక్షలకుపైగా హుండీ ఆదాయం
బాలకృష్ణ జన్మదినం సందర్భంగా ఉచిత జ్యూట్ బ్యాగుల పంపిణీ
అన్నదాన సేవలను పొందిన 7,929 మంది భక్తులు

351 devotees | ఇంద్రకీలాద్రి, ఆంధ్రప్రభ : విజయవాడ ఇంద్రకీలాద్రిపై కొలువై ఉన్న శ్రీ దుర్గా మల్లేశ్వరస్వామి వారి దేవస్థానంలో బుధవారం భక్తుల రద్దీ విశేషంగా కనిపించింది. రాష్ట్రంలోని వివిధ ప్రాంతాల నుంచి తరలివచ్చిన భక్తులు కనకదుర్గమ్మను దర్శించుకుని ప్రత్యేక పూజలు, సేవల్లో పాల్గొన్నారు. ఆలయ ప్రాంగణం ఉదయం నుంచే భక్తులతో కిక్కిరిసిపోయింది. దేవస్థానం గణాంకాల ప్రకారం బుధవారం మొత్తం 42,957 మంది భక్తులు అమ్మవారిని దర్శించుకోగా, 6,163 దర్శన టికెట్లు విక్రయించబడ్డాయి. అమ్మవారి ప్రసాదంగా 68,537 లడ్డూలు విక్రయించగా, హుండీ మరియు విరాళాల రూపంలో రూ.3,39,686 ఆదాయం లభించింది. వివిధ ఆర్జిత సేవల్లో 351 మంది భక్తులు పాల్గొన్నారు. మొక్కుబడులు తీర్చుకునేందుకు 2,465 మంది తలనీలాలు సమర్పించగా, 7,929 మంది భక్తులు నిత్య అన్నదాన సేవలను స్వీకరించారు.

ఇంద్రకీలాద్రిపై బాలకృష్ణ పుట్టిన రోజు వేడుకలు..

ఇదిలా ఉండగా, హిందూపురం ఎమ్మెల్యే, ప్రముఖ సినీనటుడు నందమూరి బాలకృష్ణ జన్మదినాన్ని పురస్కరించుకుని దుర్గగుడి ట్రస్ట్ బోర్డు ఆధ్వర్యంలో భక్తులకు ఉచితంగా జ్యూట్ బ్యాగులను పంపిణీ చేశారు. ప్లాస్టిక్ వినియోగాన్ని తగ్గించి పర్యావరణ పరిరక్షణకు ప్రోత్సాహం కల్పించే లక్ష్యంతో ఈ కార్యక్రమాన్ని నిర్వహించారు. దుర్గగుడి ట్రస్ట్ బోర్డు చైర్మన్ బొర్రా గాంధీ ఆధ్వర్యంలో ఆలయం పరిసర ప్రాంతాల్లో, భక్తుల రద్దీ ఎక్కువగా ఉండే ప్రాంతాల్లో జ్యూట్ బ్యాగులను పంపిణీ చేశారు. ఈ సందర్భంగా భక్తులు ట్రస్ట్ బోర్డు చేపట్టిన పర్యావరణ హిత కార్యక్రమాన్ని అభినందించారు.

విస్తృత ఏర్పాట్లు..

భక్తుల రద్దీకి అనుగుణంగా దర్శనం, ప్రసాదాల పంపిణీ, అన్నదానం, తలనీలాల సమర్పణ తదితర విభాగాల్లో దేవస్థానం ప్రత్యేక ఏర్పాట్లు చేయడంతో ఎలాంటి ఇబ్బందులు లేకుండా దర్శనాలు కొనసాగాయి.