విద్యా రంగ సమస్యలు పరిష్కరించాలి: ఏబీవీపీ
కలెక్టరేట్ ముట్టడికి యత్నం.. పోలీసుల అడ్డగింత
హనుమకొండ, ఆంధ్రప్రభ: విద్యా రంగ సమస్యలను తక్షణమే పరిష్కరించాలని డిమాండ్ చేస్తూ అఖిల భారతీయ విద్యార్థి పరిషత్ (ఏబీవీపీ) ఆధ్వర్యంలో విద్యార్థులు సోమవారం హనుమకొండ అంబేడ్కర్ జంక్షన్లో నిరసన కార్యక్రమం నిర్వహించారు.
అనంతరం కలెక్టరేట్ వరకు ర్యాలీగా వెళ్లేందుకు ప్రయత్నించగా పోలీసులు వారిని అడ్డుకున్నారు. దీంతో విద్యార్థి నాయకులు, పోలీసుల మధ్య స్వల్ప తోపులాట చోటుచేసుకుని కొద్దిసేపు ఉద్రిక్త పరిస్థితులు నెలకొన్నాయి.
శాంతియుతంగా చేపట్టిన నిరసన కార్యక్రమాన్ని అడ్డుకోవడం ప్రజాస్వామ్య స్ఫూర్తికి విరుద్ధమని ఏబీవీపీ నాయకులు ఆరోపించారు. విద్యా రంగానికి సంబంధించిన సమస్యలను ప్రభుత్వం వెంటనే పరిష్కరించాలని డిమాండ్ చేశారు.
పరిస్థితి ఉద్రిక్తంగా మారడంతో పోలీసులు అదనపు బలగాలను మోహరించి భద్రతా చర్యలు చేపట్టారు. అనంతరం పరిస్థితి అదుపులోకి రావడంతో అక్కడ సాధారణ పరిస్థితులు నెలకొన్నాయి.
