Hair Loss | యువతలో జుట్టు రాలడానికి ప్రధాన 10 కారణాలు.. ఇవే జాగ్రత్తలు!
Hair Loss | యువతలో జుట్టు రాలడానికి ప్రధాన 10 కారణాలు.. ఇవే జాగ్రత్తలు!
Hair Loss | ఆంధ్రప్రభ, వెబ్డెస్క్: ఇప్పుడున్న యువతలో దాదాపుగా 30 ఏళ్లు దాటకుండానే జుట్టు రాలడం అనే సమస్య తీవ్ర ఆందోళన కలిగిస్తోంది. జుట్టు రాలడం వారిలో ఆత్మవిశ్వాసాన్ని దెబ్బతీస్తోంది. ఈ సమస్యను పరిష్కరించేందుకు ఆసుపత్రుల చుట్టూ తిరగడం.. వేలల్లో డబ్బులు ఖర్చు చేయడం చేస్తూ ఉంటారు. అసలు సమస్యను పరిష్కరించడానికి, ఆ సమస్య ఎందుకు వస్తోందో తెలుసుకుంటే దానికి నివారణ మార్గాల ద్వారా జుట్టు రాలే సమస్యకు చెక్ పెట్టవచ్చు.. అసలు యువకుల్లో ఈ సమస్య ఎందుకు వస్తుంది.. దీనికి గల ప్రధాన కారణాలు ఏంటో తెలుసుకుందామా..?
యువకులలో జుట్టు రాలడానికి గల 10 కారణాలు..
1) జన్యుపరమైన కారణాలు:
ఇది ఒక సాధారణ కారణంగా చెప్పవచ్చు. వంశపారంపర్యంగా అంటే కుటుంబంలో ఎవరికైనా ఈ సమస్య ఉంటే బట్టతల రావడం అనేది సహజం. దీనికి కారణం DHT (dihydrotestosterone) అనే హార్మోన్ జుట్టు కుదుళ్లను క్రమంగా దెబ్బతీస్తుంది, తద్వారా జుట్టు క్రమంగా పల్చబడి బట్టతల ఏర్పడుతుంది.
2) పని ఒత్తిడి:
ప్రస్తుత కాలంలో బిజినెస్, సాఫ్ట్వేర్ కంపెనీలలో పనిచేసేవారు తీవ్రమైన ఒత్తిడికి లోనవుతుంటారు. దీర్ఘకాలిక ఒత్తిడి కార్టిసాల్ స్థాయిలను పెంచుతుంది. ఇది జుట్టు కుదుళ్లను విశ్రాంతి దశలోకి నెట్టడం ద్వారా జుట్టు రాలడాన్ని ప్రేరేపిస్తుంది.
3) పోషకాహార లోపం:
ప్రస్తుత బిజీ లైఫ్లో ఏం తింటున్నామో, ఎంత తింటున్నామో, ఎలాంటి ఆహారం తింటున్నామో అనే విషయాన్ని అసలు పట్టించుకోవడం లేదు. దీంతో ప్రోటీన్, ఇనుము, జింక్, బయోటిన్, విటమిన్ డి వంటి అవసరమైన పోషకాల లోపం జుట్టును బలహీనపరుస్తుంది. ఇది జుట్టు రాలడానికి కారణమవుతుంది.
4) నిద్రలేమి:
యువకులకు రోజుకు దాదాపు 6 నుంచి 7 గంటల నిద్ర అవసరం. కానీ ప్రస్తుత కాలంలో నిద్రను మరిచి ఫోన్లకే పరిమితమవుతున్నారు. దీంతో సరిపడా నిద్ర లేకపోవడం వల్ల హార్మోన్ల సమతుల్యత దెబ్బతింటుంది. జుట్టు పెరుగుదలకు అవసరమైన హార్మోన్ల ఉత్పత్తి తగ్గుతుంది.
5) హార్మోన్ల అసమతుల్యత:
ఆండ్రోజెన్లు, థైరాయిడ్ లేదా ఇతర హార్మోన్ల అసమతుల్యత జుట్టు అధికంగా రాలడానికి దోహదం చేస్తుంది.
6) విటమిన్ లోపాలు:
ఇనుము, విటమిన్ డి, విటమిన్ బి12, జింక్, బయోటిన్ లోపం జుట్టు బలహీనపడటానికి, రాలడానికి దారితీస్తుంది.
7) హెయిర్ ప్రొడక్ట్స్ అధిక వినియోగం:
కఠినమైన రసాయనాలు, జెల్లు, స్ప్రేలు మరియు స్టైలింగ్ ఉత్పత్తుల వాడకం జుట్టు స్కాల్ప్ను దెబ్బతీసి, జుట్టు రాలడానికి దారితీస్తుంది.
8) పర్యావరణ కాలుష్యం:
ధూళి, కాలుష్యం మరియు యూవీ (UV) కిరణాలు జుట్టును దెబ్బతీస్తాయి, మూలాలను బలహీనపరుస్తాయి మరియు జుట్టు పెరుగుదలను నెమ్మదిస్తాయి.
9) ధూమపానం, మద్యం:
ఇవి స్కాల్ప్కు రక్త ప్రసరణను తగ్గిస్తాయి, పోషకాలను క్షీణింపజేస్తాయి మరియు జుట్టు పెరుగుదలకు అడ్డుపడతాయి.
10) వైద్య పరిస్థితులు, మందులు:
థైరాయిడ్, పీసీఓఎస్ (PCOS), స్కాల్ప్ ఇన్ఫెక్షన్లు, కొన్ని రకాల మందుల వాడకం జుట్టు రాలడానికి కారణం కావచ్చు.
ఈ చిట్కాలతో జుట్టు రాలడాన్ని అరికట్టు..
ప్రోటీన్, ఇనుము, జింక్, బయోటిన్ మరియు విటమిన్లు అధికంగా ఉండే సమతుల్య ఆహారాన్ని తీసుకోండి. బయటి తిండ్లను పూర్తిగా మానేయడం వంటి ఆహార మార్పులతో జుట్టు రాలడాన్ని అరికట్టవచ్చు. అలాగే పనిలో ఒత్తిడి తగ్గడానికి ప్రతిరోజూ వ్యాయామం, ధ్యానం, హాబీల ద్వారా అలవాటు చేసుకోండి. రోజుకు కనీసం 8 గంటల నిద్ర తప్పనిసరి. జుట్టుకు హాని చేసే కెమికల్ పదార్థాలను వాడకండి. జుట్టు రాలడం ఇలాగే కొనసాగితే చర్మ వైద్యుడిని (Dermatologist) సంప్రదించండి.
నిపుణుల సలహా…
యుక్తవయస్సులో జుట్టు రాలడం అనేది త్వరగా గుర్తించి, సరైన జాగ్రత్తలు తీసుకుంటే నయం చేయగల సమస్య. దీని సంకేతాలను నిర్లక్ష్యం చేయకండి. ఈ రోజు తీసుకునే జాగ్రత్తే రేపటి ఆరోగ్యకరమైన జుట్టుకు బాటలు వేస్తుంది.
