సికింద్రాబాద్ రైల్వే స్టేషన్ నిర్మాణం

₹714.73 కోట్లతో పునరాభివృద్ధి పనులు..
ఇప్పటికే 64 శాతం పూర్తి

ఆంధ్రప్రభ వెబ్‌డెస్క్ : దక్షిణ మధ్య రైల్వే పరిధిలో అత్యంత కీలకమైన సికింద్రాబాద్ రైల్వే స్టేషన్ ప్రపంచ స్థాయి రైల్వే కేంద్రంగా రూపాంతరం చెందుతోంది. ప్రయాణికులకు మెరుగైన సౌకర్యాలు, ఆధునిక మౌలిక వసతులు, సురక్షిత ప్రయాణ అనుభవం అందించే లక్ష్యంతో స్టేషన్ పునరాభివృద్ధి పనులు వేగంగా కొనసాగుతున్నాయి.

సికింద్రాబాద్ రైల్వే స్టేషన్ పునరాభివృద్ధి ప్రాజెక్టు మొత్తం వ్యయం ₹714.73 కోట్లు. ఇప్పటివరకు ప్రాజెక్టు పనులు 64 శాతం పూర్తయినట్లు అధికారులు వెల్లడించారు. స్టేషన్ భవనాలు, ఎయిర్ కాన్‌కోర్స్, బహుళ స్థాయి పార్కింగ్, ఫుట్ ఓవర్ బ్రిడ్జ్‌లు, మెట్రో స్కైవాక్‌లు తదితర ప్రధాన పనులు శరవేగంగా పురోగమిస్తున్నాయి.

ఆధునిక రూపంతో కొత్త స్టేషన్ భవనాలు

పునరాభివృద్ధిలో భాగంగా సికింద్రాబాద్ రైల్వే స్టేషన్‌కు విశిష్టమైన కొత్త భవనాలను నిర్మిస్తున్నారు. భవిష్యత్తులో పెరగనున్న ప్రయాణికుల రద్దీని దృష్టిలో ఉంచుకొని, విశాలమైన ప్రవేశ ద్వారాలు, విస్తృతమైన వేచి ఉండే ప్రదేశాలు, సులభమైన ప్రయాణ మార్గాలు ఏర్పాటు చేస్తున్నారు.

రెండు స్థాయిల ఎయిర్ కాన్‌కోర్స్

ప్రయాణికుల సౌకర్యార్థం రెండు స్థాయిల ఎయిర్ కాన్‌కోర్స్‌ను నిర్మిస్తున్నారు. దీని ద్వారా ప్లాట్‌ఫామ్‌ల మధ్య ప్రయాణికుల రాకపోకలు మరింత సులభం కానున్నాయి. రద్దీ సమయాల్లో కూడా ప్రయాణికులు ఇబ్బందులు పడకుండా ఉండేలా ఈ నిర్మాణాన్ని రూపకల్పన చేస్తున్నారు.

బహుళ స్థాయి పార్కింగ్‌ సదుపాయం

స్టేషన్‌కు వచ్చే ప్రయాణికులు, వాహనదారుల కోసం బహుళ స్థాయి పార్కింగ్‌ను ఏర్పాటు చేస్తున్నారు. దీని ద్వారా స్టేషన్ పరిసరాల్లో ట్రాఫిక్ ఒత్తిడి తగ్గడంతో పాటు, వాహనాల పార్కింగ్‌కు క్రమబద్ధమైన సౌకర్యం అందుబాటులోకి రానుంది.

26 లిఫ్ట్‌లు.. 32 ఎస్కలేటర్లు

వృద్ధులు, దివ్యాంగులు, చిన్నారులతో ప్రయాణించే కుటుంబాలు సులభంగా రాకపోకలు సాగించేందుకు స్టేషన్‌లో 26 లిఫ్ట్‌లు, 32 ఎస్కలేటర్లు ఏర్పాటు చేయనున్నారు. ఈ సదుపాయాలతో ప్రయాణికులకు ప్లాట్‌ఫామ్‌లు, కాన్‌కోర్స్, ఇతర విభాగాలకు చేరుకోవడం మరింత సౌకర్యవంతం కానుంది.

మెట్రో కనెక్టివిటీకి స్కైవాక్‌లు

సికింద్రాబాద్ రైల్వే స్టేషన్‌ను మెట్రో స్టేషన్‌తో అనుసంధానించేలా స్కైవాక్‌ల నిర్మాణం జరుగుతోంది. దీని ద్వారా రైల్వే, మెట్రో ప్రయాణాల మధ్య కనెక్టివిటీ మరింత మెరుగుపడుతుంది. రహదారి ట్రాఫిక్‌ను దాటకుండా ప్రయాణికులు సురక్షితంగా మెట్రోకు చేరుకునే వీలు కలుగుతుంది.

సౌర విద్యుత్, ఈవీ ఛార్జింగ్ సదుపాయాలు

పర్యావరణహిత విధానాలకు ప్రాధాన్యతనిస్తూ స్టేషన్‌లో సౌర విద్యుత్ వినియోగాన్ని పెంచనున్నారు. అలాగే ఎలక్ట్రిక్ వాహనాల కోసం ఈవీ ఛార్జింగ్ సదుపాయాలను కూడా ఏర్పాటు చేస్తున్నారు. భవిష్యత్ అవసరాలకు అనుగుణంగా గ్రీన్ స్టేషన్‌గా అభివృద్ధి చేయడమే లక్ష్యంగా పనులు కొనసాగుతున్నాయి.

అధునాతన సీసీటీవీ భద్రత

ప్రయాణికుల భద్రతను దృష్టిలో ఉంచుకుని అధునాతన సీసీటీవీ కెమెరాలను ఏర్పాటు చేయనున్నారు. స్టేషన్ పరిసరాలు, ప్లాట్‌ఫామ్‌లు, ప్రవేశ ద్వారాలు, పార్కింగ్ ప్రాంతాలు నిరంతర పర్యవేక్షణలో ఉండేలా భద్రతా వ్యవస్థను బలోపేతం చేస్తున్నారు. పునరాభివృద్ధి పనులు పూర్తయితే సికింద్రాబాద్ రైల్వే స్టేషన్ ప్రయాణికులకు అత్యాధునిక సౌకర్యాలతో కూడిన ప్రపంచ స్థాయి రైల్వే కేంద్రంగా మారనుంది. హైదరాబాద్ నగర రవాణా వ్యవస్థలో ఈ స్టేషన్ మరింత కీలక పాత్ర పోషించనుంది.