ప్రజల సమస్యల పరిష్కారమే ప్రభుత్వ లక్ష్యం

ప్రజల సమస్యల పరిష్కారమే ప్రభుత్వ లక్ష్యం

• జిల్లా కలెక్టర్ డాక్టర్ ఏ. సిరి.

కర్నూలు బ్యూరో, ఆంధ్రప్రభ:
ప్రజల సమస్యల సత్వర పరిష్కారమే ప్రభుత్వ ప్రధాన లక్ష్యమని, ప్రభుత్వ ఆదేశాల మేరకు ప్రతి నియోజకవర్గంలో ప్రజా సమస్యల పరిష్కార వేదిక కార్యక్రమాన్ని నిర్వహిస్తూ ప్రజల సమస్యలను పరిష్కరిస్తున్నట్లు జిల్లా కలెక్టర్ డాక్టర్ ఏ. సిరి తెలిపారు. శుక్రవారం పాణ్యం నియోజకవర్గంలోని కల్లూరు మండల పరిషత్ అభివృద్ధి అధికారి కార్యాలయంలో నిర్వహించిన ప్రజా సమస్యల పరిష్కార వేదిక కార్యక్రమంలో జిల్లా కలెక్టర్ డాక్టర్ ఏ. సిరి, పాణ్యం శాసనసభ్యురాలు గౌరు చరితారెడ్డి ప్రజల నుంచి ఫిర్యాదులు, వినతిపత్రాలు స్వీకరించారు.

ప్రజలు ఎదుర్కొంటున్న సమస్యలను శ్రద్ధగా విని సంబంధిత అధికారులకు తక్షణ చర్యలు తీసుకోవాలని ఆదేశించారు. ఈ సందర్భంగా జిల్లా కలెక్టర్ మాట్లాడుతూ.. ముఖ్యమంత్రి నిర్వహించిన కలెక్టర్ల సమావేశంలో ఇచ్చిన ఆదేశాల మేరకు జిల్లాలో ప్రతి శుక్రవారం నియోజకవర్గ స్థాయిలో ప్రజా సమస్యల పరిష్కార వేదిక కార్యక్రమాన్ని నిర్వహిస్తున్నట్లు తెలిపారు.

నియోజకవర్గ పరిధిలోని ప్రతి మండలంలో ఈ కార్యక్రమాన్ని నిర్వహించడం జరుగుతుందని పేర్కొన్నారు. అందులో భాగంగానే తొలిసారిగా పాణ్యం నియోజకవర్గంలో ఈ కార్యక్రమాన్ని చేపట్టినట్లు వెల్లడించారు. ప్రతి సోమవారం జిల్లా కేంద్రంలో నిర్వహించే ఫిర్యాదుల స్వీకరణ కార్యక్రమానికి అధిక సంఖ్యలో ప్రజలు హాజరవుతున్నారని, ఇది జిల్లా పరిపాలనపై ప్రజలకు ఉన్న విశ్వాసానికి నిదర్శనమని అన్నారు.

మండల స్థాయిలోనే పరిష్కరించాల్సిన అనేక సమస్యలు జిల్లా స్థాయికి వస్తున్న నేపథ్యంలో ప్రజలకు మరింత చేరువ కావాలనే ఉద్దేశంతో ప్రభుత్వం ఈ ప్రత్యేక వ్యవస్థను ప్రారంభించిందన్నారు. ప్రజలు జిల్లా కేంద్రానికి వచ్చే అవసరం లేకుండా స్థానికంగానే సమస్యలు వేగంగా పరిష్కరించేలా అధికారులు పనిచేయాలని సూచించారు.

ఒకవేళ సమస్య పరిష్కారం అయ్యే అవకాశం లేకపోతే ఎందుకు సాధ్యం కాదో స్పష్టంగా ప్రజలకు తెలియజేయాలని అధికారులను ఆదేశించారు. పారదర్శకంగా వ్యవహరించడం ద్వారా ప్రజలు పదేపదే కార్యాలయాల చుట్టూ తిరగాల్సిన అవసరం ఉండదన్నారు. “అధికారులు స్పందించడం లేదు”, “అధికారులు అందుబాటులో లేరు” అనే ఫిర్యాదులు రాకుండా అధికారులు ప్రజలకు స్పష్టమైన సమాధానాలు ఇవ్వాలని సూచించారు.

సమస్య పరిష్కారం అవుతుందా లేదా, సాధ్యం కాకపోతే దానికి గల కారణాలను కూడా బాధ్యతగా వివరించాలని తెలిపారు. అలా చేయడం ద్వారా మధ్యవర్తుల చేత మోసపోయే ఘటనలు కూడా తగ్గుతాయని పేర్కొన్నారు. కొన్ని సమస్యలు జిల్లా స్థాయిలోనే పరిష్కరించగలమని, మరికొన్ని అంశాలు ఉన్నత స్థాయిలో పరిష్కారం కావాల్సి ఉంటుందని కలెక్టర్ తెలిపారు.

ముఖ్యంగా రహదారులు, వంతెనలు, భారీ వ్యయంతో కూడిన అభివృద్ధి పనుల వంటి అంశాలను ప్రభుత్వ దృష్టికి తీసుకెళ్లి నిధులు మంజూరు అయిన వెంటనే అమలు చేస్తామని చెప్పారు. ప్రతి ఫిర్యాదుకు పరిష్కారం చూపడమే లక్ష్యమని పాణ్యం శాసనసభ్యురాలు గౌరు చరితారెడ్డి అన్నారు. ఈ సందర్భంగా పాణ్యం శాసనసభ్యురాలు గౌరు చరితారెడ్డి మాట్లాడుతూ.. ప్రతి సోమవారం కలెక్టరేట్ , మండల స్థాయిలో ప్రజా సమస్యల పరిష్కార కార్యక్రమాలు నిర్వహించడం ఆనవాయితీగా కొనసాగుతోందన్నారు.

అలాగే ప్రతి శుక్రవారం నియోజకవర్గ స్థాయిలో ప్రజల సమస్యలను నేరుగా స్వీకరించి పరిష్కారానికి చర్యలు తీసుకుంటున్నామని తెలిపారు. ముఖ్యమంత్రి ఆదేశాల మేరకు నాలుగు వారాల పాటు ఈ కార్యక్రమాన్ని నిర్వహిస్తూ ప్రజలకు మెరుగైన పరిపాలన అందించాలనే ఉద్దేశంతో ప్రభుత్వం ముందుకు సాగుతోందన్నారు. అందులో భాగంగా జిల్లాలో తొలిసారిగా పాణ్యం నియోజకవర్గాన్ని ఎంపిక చేసి కార్యక్రమాన్ని నిర్వహిస్తున్న జిల్లా కలెక్టర్‌కు ప్రత్యేక ధన్యవాదాలు తెలిపారు.

ప్రజా సమస్యల పరిష్కారంపై ముఖ్యమంత్రి ప్రత్యేక దృష్టి సారిస్తున్నారని, “ఎన్ని సమస్యలు వచ్చాయి” అన్న దానికంటే “ఎన్ని సమస్యలు పూర్తిస్థాయిలో పరిష్కారం అయ్యాయి” అన్న అంశంపైనే ప్రభుత్వం సమీక్ష చేస్తోందన్నారు. కొన్ని నియోజకవర్గాల్లో 70 నుంచి 75 శాతం సమస్యలు పరిష్కారం అయినప్పటికీ, మిగిలిన సమస్యలు ఎందుకు పరిష్కారం కాలేదని ముఖ్యమంత్రి స్వయంగా సమీక్షిస్తున్నారని తెలిపారు.

పాణ్యం నియోజకవర్గంలో నిర్వహించిన కార్యక్రమంలో 300కు పైగా వినతిపత్రాలు అందాయని చెప్పారు. కాలనీలు, మురుగునీటి కాల్వలు, తాగునీరు, రహదారులు, పింఛన్లు, ఆదాయ శాఖ, ఆన్‌లైన్ నమోదు సమస్యలను ప్రజలు అధికారుల దృష్టికి తీసుకువచ్చారని పేర్కొన్నారు. ప్రజా సమస్యల పరిష్కారమే ప్రభుత్వ లక్ష్యమని, అధికారులు వెంటనే స్పందించి సమస్యలను పరిష్కరించాలని ఆదేశించారు.

వచ్చే శుక్రవారం కూడా ఇదే విధంగా కార్యక్రమాన్ని నిర్వహించనున్నట్లు తెలిపారు. కార్యక్రమాన్ని విజయవంతం చేసిన అధికారులకు, సిబ్బందికి ప్రత్యేక ధన్యవాదాలు తెలిపారు. ఈ కార్యక్రమంలో సంయుక్త కలెక్టర్ నూరుల్ ఖమర్, జిల్లా ఆదాయ అధికారి వెంకటనారాయణమ్మ, కర్నూలు రెవెన్యూ విభాగ అధికారి (ఇన్‌చార్జి) అనురాధ, కర్నూలు పురపాలక కమిషనర్ చల్లా ఓబులేసు, జిల్లా పరిషత్ ప్రధాన కార్యనిర్వహణాధికారి రమణారెడ్డి తదితర అధికారులు పాల్గొన్నారు.