Handri-Neeva | ఒకే కుటుంబంలో ఇద్దరు…
Handri-Neeva | ఒకే కుటుంబంలో ఇద్దరు…
Handri-Neeva | సత్యసాయి బ్యూరో, ఆంధ్రప్రభ : సత్యసాయి జిల్లా కదిరి పరిధిలో జరిగిన విషాదకర ఘటన స్థానికులను తీవ్ర దిగ్భ్రాంతికి గురిచేసింది. నల్లచెరువు మండలం బందార్లపల్లి సమీపంలోని హంద్రీనీవా కాలువలో ప్రమాదవశాత్తూ ఒకే కుటుంబానికి చెందిన తండ్రి, కుమారుడు గల్లంతవ్వడం హృదయ విదారకంగా మారింది. ఆదివారం వెలుగు చూసిన ఈ ఘటనలో తండ్రి మృతదేహం లభించగా, చిన్నారి ఆచూకీ ఇంకా తెలియకపోవడం మరింత విషాదాన్ని మిగిల్చింది. స్థానిక సమాచారం ప్రకారం, రాము (40) అతని కుమారుడు చిన్నోడు (8) అనుకోకుండా కాలువలో పడిపోయారు.
కాలువలో ప్రవాహం తీవ్రంగా ఉండటంతో ఇద్దరూ గల్లంతయ్యారు. సమాచారం అందుకున్న వెంటనే పోలీసులు, అగ్నిమాపక సిబ్బంది సంఘటనా స్థలానికి చేరుకుని గాలింపు చర్యలు ప్రారంభించారు. కొద్ది సేపటికే రాము మృతదేహాన్ని వెలికితీసినా, చిన్నారి ఆచూకీ మాత్రం ఇంకా తెలియకపోవడంతో కుటుంబ సభ్యులు, గ్రామస్తులు ఆందోళనలో మునిగిపోయారు. ఈ ఘటనపై బీజేపీ నేత విష్ణువర్ధన్ రెడ్డి తీవ్ర ఆవేదన వ్యక్తం చేశారు. ఒకే కుటుంబంలో ఇద్దరు ఈ విధంగా ప్రమాదానికి గురవ్వడం చాలా బాధాకరమని ఆయన పేర్కొన్నారు.
Handri-Neeva | చిన్నారి కోసం గాలింపు చర్యరు
తండ్రి మృతదేహం లభించగా, చిన్నారి ఇంకా కనిపించకపోవడం హృదయ విదారకమని తెలిపారు. చిన్నారి కోసం జరుగుతున్న గాలింపు చర్యలను మరింత వేగవంతం చేసి, వీలైనంత త్వరగా అతని ఆచూకీ కనుగొనాలని సంబంధిత అధికారులను ఆయన కోరారు. అలాగే ఈ ఘటనలో బాధిత కుటుంబాన్ని ప్రభుత్వం వెంటనే ఆదుకోవాలని ఆయన విజ్ఞప్తి చేశారు. ఆర్థికంగా ఇబ్బందులు ఎదుర్కొంటున్న కుటుంబానికి తక్షణ సహాయం అందించి, వారికి భరోసా కల్పించాల్సిన అవసరం ఉందని అన్నారు. ముఖ్యమంత్రి వ్యక్తిగతంగా స్పందించి కుటుంబానికి న్యాయం జరిగేలా చర్యలు తీసుకోవాలని కూడా ఆయన కోరారు. ఇదిలా ఉండగా, గ్రామంలో విషాద వాతావరణం నెలకొంది. చిన్నారి సురక్షితంగా లభించాలని గ్రామస్తులు దేవుడిని ప్రార్థిస్తున్నారు.
Handri-Neeva | ప్రభుత్వం ఆదుకోవాలి…
కుటుంబ సభ్యులు కన్నీటి పర్యంతమవుతూ చిన్నారి కోసం ఎదురుచూస్తున్నారు. గాలింపు చర్యలు కొనసాగుతున్నప్పటికీ, కాలువలో నీటి ప్రవాహం అధికంగా ఉండటం సిబ్బందికి సవాల్గా మారింది. ఈ ఘటన స్థానికంగా భద్రతా చర్యలపై కూడా ప్రశ్నలు లేవనెత్తుతోంది. కాలువల వద్ద సరైన రక్షణ చర్యలు, హెచ్చరిక బోర్డులు లేకపోవడం వల్ల ఇటువంటి ప్రమాదాలు జరుగుతున్నాయనే విమర్శలు వినిపిస్తున్నాయి. భవిష్యత్తులో ఇలాంటి ఘటనలు పునరావృతం కాకుండా అధికారులు తగిన చర్యలు తీసుకోవాలని ప్రజలు కోరుతున్నారు. మొత్తంగా ఈ దుర్ఘటన ఒక కుటుంబాన్ని తీవ్ర విషాదంలో ముంచేసింది. చిన్నారి ఆచూకీ త్వరగా లభించాలని అందరూ ఆకాంక్షిస్తున్నారు.
