Bellampalle | ప్రభుత్వ పాలిటెక్నిక్ కళాశాలలో ‘రోబోటిక్స్’ కోర్సు..
Bellampalle | ప్రభుత్వ పాలిటెక్నిక్ కళాశాలలో ‘రోబోటిక్స్’ కోర్సు..
- పారిశ్రామిక అవసరాలే లక్ష్యంగా అడుగులు!
- కళాశాలను సందర్శించిన ఉన్నత స్థాయి బృందం..
- కొత్త కోర్సుకు 60 సీట్లు కేటాయింపు..
- టాటా టెక్నాలజీస్ భాగస్వామ్యంతో అత్యాధునిక ల్యాబ్ల ఏర్పాటు!
Bellampalle | బెల్లంపల్లి, ఆంధ్రప్రభ : సాంకేతిక విద్యలో బెల్లంపల్లి ప్రభుత్వ పాలిటెక్నిక్ కళాశాల మరో కీలక మైలురాయిని అధిగమించబోతోంది. మారుతున్న పారిశ్రామిక అవసరాలకు అనుగుణంగా విద్యార్థులను తీర్చిదిద్దేందుకు 2026–27 విద్యాసంవత్సరం నుండి ‘డిప్లొమా ఇన్ ఆటోమేషన్ అండ్ రోబోటిక్స్’ అనే నూతన కోర్సును ప్రారంభించేందుకు సన్నద్ధమవుతోంది. ఈ ప్రతిపాదనపై సమీక్ష నిర్వహించేందుకు హైదరాబాద్ సీటీఈ అసిస్టెంట్ డైరెక్టర్ డా. పి. ఆనంద్ నేతృత్వంలోని ఉన్నత స్థాయి ఇన్స్పెక్షన్ బృందం మంగళవారం కళాశాలను సందర్శించింది.
మౌలిక వసతుల పరిశీలన
ఈ బృందంలో బెంగళూరు టీటీఎల్ (TTL) ప్రాజెక్ట్ మేనేజర్ పూర్ణచంద్ర తేజస్వి, బెల్లంపల్లి టీజీఈడబ్ల్యూఐడీసీ ఏఏఈ జి. వినయ్ కుమార్ పాల్గొన్నారు. కళాశాలలోని తరగతి గదులు, ప్రయోగశాలలు, వర్క్షాపులు మరియు హాస్టల్ వసతులను బృందం క్షుణ్ణంగా పరిశీలించింది. కొత్త కోర్సు నిర్వహణకు అవసరమైన సదుపాయాలపై సంతృప్తి వ్యక్తం చేస్తూనే, మరిన్ని మెరుగుదలలపై ప్రిన్సిపాల్ డా. మారం దేవేందర్తో చర్చించారు.
టాటా టెక్నాలజీస్ భాగస్వామ్యంతో ల్యాబ్లు
ప్రతిపాదిత ఈ కొత్త కోర్సుకు AICTE 60 సీట్లను కేటాయించింది. ఈ కోర్సులో భాగంగా టాటా టెక్నాలజీస్ లిమిటెడ్ (TTL) సహకారంతో అత్యాధునిక రోబోటిక్స్ ల్యాబ్, పీఎల్సీ & స్కాడా (PLC & SCADA) ల్యాబ్, ఇండస్ట్రియల్ ఆటోమేషన్ ల్యాబ్లను ఏర్పాటు చేయనున్నారు. విద్యార్థులకు కేవలం థియరీ మాత్రమే కాకుండా, పరిశ్రమలకు అవసరమైన ప్రత్యక్ష అనుభవం కల్పించేలా ఇంటర్న్షిప్ మరియు అప్రెంటిస్షిప్ అవకాశాలను కల్పించనున్నారు. ఇందుకోసం బోర్డ్ ఆఫ్ అప్రెంటిస్షిప్ ట్రైనింగ్ (BOAT), కాన్ఫెడరేషన్ ఆఫ్ ఇండియన్ ఇండస్ట్రీ (CII) వంటి సంస్థలతో సమన్వయం చేసుకోనున్నారు.
ఉపాధి అవకాశాలపై అధికారుల దిశానిర్దేశం
అనంతరం విద్యార్థులతో జరిగిన సమావేశంలో అధికారులు మాట్లాడుతూ.. ప్రస్తుతం ఆటోమేషన్, తయారీ రంగం, మైనింగ్ టెక్నాలజీ వంటి రంగాలలో నైపుణ్యం కలిగిన డిప్లొమా ఇంజినీర్లకు ప్రపంచవ్యాప్తంగా భారీ డిమాండ్ ఉందని వివరించారు. బెల్లంపల్లి ప్రాంతం సింగరేణి, ఎన్టీపీసీ, సిమెంట్ పరిశ్రమలకు చేరువలో ఉండటం వల్ల ఇక్కడి విద్యార్థులకు ప్రత్యక్ష పారిశ్రామిక అనుభవం (Industrial Exposure) పొందేందుకు గొప్ప అవకాశం లభిస్తుందని తెలిపారు.
ప్రస్తుతం కళాశాలలో కొనసాగుతున్న ఈఈఈ (EEE), ఈఐఈ (EIE), మరియు మైనింగ్ ఇంజినీరింగ్ కోర్సులతో పాటు, ఈ కొత్త కోర్సు రాకతో ఈ ప్రాంతం సాంకేతిక విద్యా కేంద్రంగా మారుతుందని ప్రిన్సిపాల్ డా. మారం దేవేందర్ ఆశాభావం వ్యక్తం చేశారు. పాలిసెట్ (POLYCET) ద్వారా ఈ కోర్సులో ప్రవేశాలు జరగనున్నాయని, ప్రభుత్వ ఫీజు మరియు స్కాలర్షిప్ సదుపాయాలతో పేద విద్యార్థులకు ఇది వరంగా మారుతుందని పేర్కొన్నారు.
