bellampalli l రేపటితో ముగియనున్న ప్రచారం.. బెల్లంపల్లి టెన్షన్ టెన్షన్!

bellampalli l రేపటితో ముగియనున్న ప్రచారం.. బెల్లంపల్లి టెన్షన్ టెన్షన్!

సోమవారం సాయంత్రంతో మూగబోనున్న మైకులు..

173 మంది అభ్యర్థుల భవితవ్యం బ్యాలెట్ బాక్సుల్లో నిక్షిప్తం

– 34 వార్డులు.. 44,554 మంది ఓటర్లు.. ఫిబ్రవరి 11న అసలైన పరీక్ష

– గెలుపే లక్ష్యంగా పతాక స్థాయికి చేరిన ప్రచార హోరు..

అభ్యర్థుల రహస్య వ్యూహాలు షురూ

bellampalli l బెల్లంపల్లి, ఆంధ్రప్రభ: సింగరేణి గని ప్రాంతమైన బెల్లంపల్లి పట్టణంలో మున్సిపల్ ఎన్నికల పోరు తుది ఘట్టానికి చేరుకుంది. గత పదిహేను రోజులుగా పట్టణ వీధులను హోరెత్తించిన ప్రచార పర్వానికి రేపు (సోమవారం) సాయంత్రం 5 గంటలతో అధికారికంగా తెరపడనుంది. మైకులు మూగబోనున్న వేళ రాజకీయ వాతావరణం మాత్రం మరింత వేడెక్కింది. ప్రచార గడువు ముగియడంతో అభ్యర్థులు బహిరంగ సభల నుంచి రహస్య వ్యూహాల వైపు మళ్లుతున్నారు. గెలుపే లక్ష్యంగా ఇంటింటి ప్రచారం, వ్యక్తిగత భేటీలు, అంతర్గత ఒప్పందాలు, వ్యూహాత్మక కదలికలతో ‘సైలెంట్ క్యాంపెయిన్’ షురూ అయ్యింది. పట్టణ మున్సిపల్ పీఠం ఏ పార్టీ ఖాతాలోకి వెళ్లనుందన్న ఉత్కంఠ ఇప్పుడు నియోజకవర్గవ్యాప్తంగా చర్చనీయాంశంగా మారింది.

అభ్యర్థుల బలాబలాలు.. స్వతంత్రుల గుబులు
ఈ ఎన్నికల్లో కాంగ్రెస్, బీఆర్ఎస్ పార్టీలు అన్ని 34 వార్డుల్లోనూ అభ్యర్థులను రంగంలోకి దించాయి. బీజేపీ 20 స్థానాల్లో పోటీ చేస్తోంది. ఏకంగా 66 మంది స్వతంత్ర అభ్యర్థులు బరిలో ఉండటంతో ప్రధాన పార్టీలకు కంటిమీద కునుకు లేకుండా పోతోంది. ఈ స్వతంత్రుల వల్ల ఓట్ల చీలిక తప్పదన్న అంచనాలు రాజకీయ వర్గాల్లో జోరుగా సాగుతున్నాయి. బీఎస్పీ, సీపీఐ పార్టీలు తలా 6 చోట్ల పోటీ చేస్తూ తమ ప్రభావాన్ని చాటుకునే ప్రయత్నం చేస్తున్నాయి. మొత్తం మీద 173 మంది అభ్యర్థులు బెల్లంపల్లి మున్సిపల్ భవితవ్యాన్ని తేల్చే బరిలో ఉన్నారు.

వార్డుల వారీగా ఓటర్ల తీర్పు.. ప్రతి ఓటూ కీలకమే!
మున్సిపాలిటీలో మొత్తం 44,554 మంది ఓటర్లు అభ్యర్థుల రాజకీయ భవిష్యత్తును నిర్ణయించనున్నారు. ఇందులో మహిళా ఓటర్లు 23,002 మంది కాగా, పురుషులు 21,549 మంది ఉన్నారు. వార్డుల వారీగా ఓటర్ల వివరాలు అత్యంత ఆసక్తికరంగా ఉన్నాయి:

1 నుంచి 10 వార్డులు: 1వ వార్డులో 1406 మంది, 2వ వార్డులో 1475 మంది, 3వ వార్డులో 1363 మంది, 4వ వార్డులో 1377 మంది ఓటర్లు తమ హక్కును వినియోగించుకోనున్నారు. 5వ వార్డులో 1125 మంది, 6వ వార్డులో 1312 మంది, 7వ వార్డులో 1262 మంది, 8వ వార్డులో 1333 మంది, 9వ వార్డులో 1352 మంది ఓటర్లు తీర్పునివ్వనున్నారు. 10వ వార్డులో మున్సిపాలిటీలోనే అత్యల్పంగా 1056 మంది ఓటర్లు ఉన్నారు.

11 నుంచి 20 వార్డులు: 11వ వార్డులో 1277 మంది ఉండగా, 12వ వార్డులో అత్యధికంగా 1571 మంది ఓటర్లు ఉన్నారు. 13వ వార్డులో 1369 మంది, 14వ వార్డులో 1248 మంది, 15వ వార్డులో 1273 మంది, 16వ వార్డులో 1278 మంది, 17వ వార్డులో 1292 మంది ఓటర్లు భవితవ్యాన్ని తేల్చనున్నారు. 18వ వార్డులో 1393 మంది, 19వ వార్డులో 1339 మంది, 20వ వార్డులో 1370 మంది ఓటర్లు పోలింగ్ కేంద్రాలకు రానున్నారు.

21 నుంచి 34 వార్డులు: 21వ వార్డులో 1214 మంది, 22వ వార్డులో 1288 మంది, 23వ వార్డులో 1412 మంది, 24వ వార్డులో 1353 మంది, 25వ వార్డులో 1403 మంది ఓటర్లు ఉన్నారు. 26వ వార్డులో 1398 మంది, 27వ వార్డులో 1316 మంది, 28వ వార్డులో 1101 మంది, 29వ వార్డులో 1296 మంది, 30వ వార్డులో 1124 మంది ఓటర్లు తమ తీర్పును ఇవ్వనున్నారు. 31వ వార్డులో 1361 మంది, 32వ వార్డులో 1349 మంది, 33వ వార్డులో 1264 మంది, చివరి వార్డు అయిన 34వ వార్డులో 1204 మంది ఓటర్లు ఉన్నారు.

ఖర్చుకు వెనుకాడని అభ్యర్థులు.. రహస్య ప్రచారం జోరు
ప్రచార గడువు ముగియనున్న తరుణంలో అభ్యర్థుల దృష్టి రహస్య ప్రచారంపై కేంద్రీకృతమైంది. ప్రత్యర్థులకు అవకాశం ఇవ్వకూడదన్న ఉద్దేశంతో ఖర్చుకు వెనుకాడని పరిస్థితి కనిపిస్తోంది. పట్టణంలోని పలు ప్రాంతాల్లో మద్యం, చికెన్ పంపిణీ ఏర్పాట్లు జరిగినట్లు సమాచారం. రాత్రి వేళల్లో కుల సంఘాలు, సామాజిక వర్గాలతో సమావేశాలు నిర్వహిస్తూ మద్దతు కూడగట్టే ప్రయత్నాలు జోరుగా సాగుతున్నాయి. నగదు పంపిణీపై వినిపిస్తున్న గుసగుసలు ఎన్నికల వాతావరణాన్ని వేడెక్కిస్తున్నాయి.

ఫిబ్రవరి 13న తేలనున్న భవితవ్యం
సోమవారం బహిరంగ ప్రచారం ముగుస్తుండటంతో ఇకపై అభ్యర్థులు డోర్‌టు–డోర్ ప్రచారం ద్వారానే ఓటర్లను చేరుకునే వ్యూహాన్ని అమలు చేయనున్నారు. ఫిబ్రవరి 11న పోలింగ్ జరుగుతుంది. అనంతరం బ్యాలెట్ బాక్సులను స్ట్రాంగ్‌రూమ్‌లకు తరలిస్తారు. ఫిబ్రవరి 13న ఓట్ల లెక్కింపు పూర్తయ్యాక బెల్లంపల్లి మున్సిపల్ పీఠాన్ని అధిరోహించేది ఎవరన్నది తేలనుంది. మైకులు మూగబోయినా రాజకీయ ఉద్వేగం మాత్రం పట్టణంలో ఉప్పొంగుతూనే ఉంది.