దాంపత్య బంధాల్లో పెరుగుతున్న హత్యలు..

హైదరాబాద్, ఆంధ్రప్రభ: రాష్ట్రంలో ఇటీవల వరుసగా వెలుగుచూస్తున్న కొన్ని దారుణ హత్యలు సమాజాన్ని తీవ్రంగా కలవరపెడుతున్నాయి. ఒకప్పుడు భార్యాభర్తల మధ్య విభేదాలు విడాకుల వరకు మాత్రమే వెళ్లేవి. కానీ ఇప్పుడు కొందరు వివాహేతర సంబంధాల మోజులో జీవిత భాగస్వామినే అడ్డంకిగా భావించి హత్యలకు పాల్పడుతున్న ఘటనలు ఆందోళన కలిగిస్తున్నాయి.

వివాహ బంధం అనేది నమ్మకం, ప్రేమ, పరస్పర గౌరవం మీద నిలబడుతుంది. అయితే ఆ బంధంలో మూడో వ్యక్తి ప్రవేశించినప్పుడు అనుమానాలు, గొడవలు, విభేదాలు పెరిగి చివరకు నేరాలకు దారితీస్తున్నాయి.

ఇటీవల తెలంగాణలో వెలుగుచూసిన కొన్ని కేసుల్లో భార్యలు తమ ప్రియులతో కలిసి భర్తలను హత్య చేసినట్లు పోలీసు దర్యాప్తులో బయటపడింది. ఈ పరిణామాలు కుటుంబ వ్యవస్థపై తీవ్ర ప్రభావం చూపుతున్నాయి.

ఇలాంటి చాలా సందర్భాల్లో హత్యను ప్రమాదంగా లేదా సహజ మరణంగా చిత్రీకరించేందుకు ప్రయత్నించినా, సాంకేతిక ఆధారాలు, మొబైల్ కాల్ డేటా, సీసీటీవీ ఫుటేజీలు, ఫోరెన్సిక్ ఆధారాలతో పోలీసులు అసలు నిజాలను వెలికితీస్తున్నారు. నేరం ఎంత తెలివిగా చేసినా చట్టం నుంచి తప్పించుకోవడం కష్టమేనని ఈ కేసులు మరోసారి స్పష్టం చేస్తున్నాయి. దీంతో నిందితులు జైళ్లపాలవగా, కన్న పిల్లల భవిష్యత్తు ప్రశ్నార్థకంగా మారుతోంది.

శరీరంలోకి టాయిలెట్ క్లీనర్ ఎక్కించి హత్య

హైదరాబాద్ నగరం మియాపూర్‌లో అక్రమ సంబంధానికి అడ్డుగా ఉన్నాడనే నెపంతో భర్తను ప్రియుడితో కలిసి హత్య చేసిన భార్య, మృతదేహాన్ని మహారాష్ట్ర సరిహద్దుల్లో పూడ్చిపెట్టింది. ఏమీ తెలియనట్లు నటిస్తూ ఏడు నెలల పాటు నాటకమాడి మిస్సింగ్ కేసు పెట్టిన ఈ దారుణాన్ని పోలీసులు కాల్ డేటా రికార్డులు, సీసీటీవీ ఫుటేజీ ఆధారంగా ఛేదించారు.

నిజామాబాద్ జిల్లా న్యాల్‌కల్‌లో వివాహేతర సంబంధం కోసం భర్త ప్రశాంత్‌ను భార్య సంధ్య, ప్రియుడు అనిల్‌తో కలిసి దారుణంగా హత్య చేసింది. హత్యకు ముందు భర్తకు అధికంగా మద్యం తాగించి, ఆ తర్వాత సిరంజి ద్వారా టాయిలెట్ క్లీనర్‌ను శరీరంలోకి ఎక్కించి చంపినట్లు పోలీసులు వెల్లడించారు.

ఇక మహబూబ్‌నగర్‌లో వివాహేతర సంబంధాల కారణంగా భార్య తన ప్రియుడితో కలిసి పథకం ప్రకారం భర్తను హత్య చేసిన మరో సంఘటన వెలుగుచూసింది. దీనిపై పోలీసుల దర్యాప్తు కొనసాగుతోంది.

సైకాలజిస్టులు ఏమంటున్నారు?

ఈ దారుణ ఘటనలకు సంబంధించి సైకాలజీ నిపుణుల అభిప్రాయం ప్రకారం ఇటువంటి దారుణ హత్యలు అకస్మాత్తుగా జరిగేవి కావు. ఇవి చాలా కాలంగా మనసులో పేరుకుపోయిన మానసిక వేదన, వైవాహిక బంధంలో పతనం, లేదా తీవ్రమైన వ్యక్తిత్వ లోపాల విషాదకరమైన పరాకాష్టగా భావిస్తున్నారు.

1. మనస్తత్వ విశ్లేషణ

బంధించబడ్డామనే భావన:
కొన్ని సందర్భాల్లో భార్య తానున్న వైవాహిక బంధంలో తీవ్రమైన వేధింపులు, నియంత్రణ, లేదా విషపూరిత వాతావరణం వల్ల పూర్తిగా బంధించబడినట్లు భావించవచ్చు. కాలక్రమేణా ఆలోచనలు వక్రీభవించి, భర్త లేకపోవడమే స్వేచ్ఛకు మార్గమనే ప్రమాదకరమైన ఆలోచన ఏర్పడే అవకాశం ఉందని నిపుణులు చెబుతున్నారు.

వివాహేతర బంధాల ప్రభావం:
మూడో వ్యక్తి ప్రమేయం ఉన్నప్పుడు ఇద్దరూ ఒకరి ఆలోచనలను మరొకరు బలపరుచుకుంటూ, భర్తను ఒక మనిషిగా కాకుండా తమ సంతోషానికి అడ్డంకిగా మాత్రమే చూడడం ప్రారంభించే పరిస్థితులు ఏర్పడవచ్చని వివరిస్తున్నారు.

వ్యక్తిత్వ లోపాలు:
కొన్ని ఘటనల్లో సానుభూతి లోపం, తీవ్రమైన స్వార్థం, క్రూరమైన ఆలోచనలు, కొన్ని రకాల వ్యక్తిత్వ రుగ్మతలు కూడా ప్రభావం చూపే అవకాశం ఉందని నిపుణులు చెబుతున్నారు.

సమర్థించుకోవడం:
హత్యకు పాల్పడే ముందు తామే బాధితులమని, చేస్తున్నది తప్పనిసరి అనే భావనతో తమ చర్యను తమలో తాము సమర్థించుకునే పరిస్థితి ఏర్పడుతుందని విశ్లేషిస్తున్నారు.

2. ప్రమాద సంకేతాలు

ఇలాంటి ఘటనలు ఒక్కసారిగా జరగవని, ముందుగానే కొన్ని ప్రమాద సంకేతాలు కనిపిస్తాయని నిపుణులు చెబుతున్నారు.

• దీర్ఘకాలిక గృహ హింస, ద్వేషం, పరిష్కారం కాని విభేదాలు.
• రహస్య జీవితాలు, వివాహేతర సంబంధాలపై అధిక మక్కువ.
• భర్త లేని జీవితంపై నిరంతర ఆలోచనలు.
• ఆస్తి, బీమా డబ్బులు వంటి ప్రయోజనాల కోసం ప్రణాళికలు.

చట్టపరమైన పరిష్కారాలే శ్రేయస్కరం

ప్రముఖ సైకాలజిస్టు డా. శ్రీపూజ సిద్ధంశెట్టి అభిప్రాయం ప్రకారం, హింస మాత్రమే ఏకైక మార్గం అని మనస్సు చెప్పే అబద్ధాన్ని నమ్మకూడదు. కష్టమైనా సరే చట్టబద్ధమైన, సురక్షితమైన మార్గాన్ని ఎంచుకోవడమే మానవత్వాన్ని, స్వేచ్ఛను, జీవితాన్ని కాపాడుతుందని పేర్కొన్నారు.

భర్తను హత్య చేయడానికి భార్య లేదా వివాహేతర సంబంధంలో ఉన్న వ్యక్తులు కుట్ర పన్నే ఘటనలు సమాజాన్ని కలవరపరుస్తున్నాయి. అయితే ప్రతి ఘటన వెనుక ఉన్న కారణాలు ఒకేలా ఉంటాయని భావించడం సరైంది కాదని ఆమె స్పష్టం చేశారు.

దీర్ఘకాలిక వైవాహిక విభేదాలు, తీవ్రమైన మానసిక ఒత్తిడి, వ్యక్తిత్వ సమస్యలు, లేదా ఇతర వ్యక్తిగత పరిస్థితులు కలిసి ఇలాంటి దారుణాలకు దారితీయవచ్చని పేర్కొన్నారు. ఏ పరిస్థితుల్లోనూ హత్యకు సమర్థన లేదని స్పష్టం చేశారు.

కుటుంబాల్లో తీవ్రమైన విభేదాలు, ద్వేషం లేదా ప్రమాదకర ఆలోచనలు కనిపించిన వెంటనే కౌన్సెలింగ్, మానసిక ఆరోగ్య నిపుణుల సహాయం, అలాగే చట్టబద్ధమైన మార్గాలను ఆశ్రయించడం ద్వారా ప్రాణనష్టాన్ని నివారించవచ్చని సూచించారు. సమస్యలను హింసతో కాదు, సంభాషణ మరియు చట్టపరమైన పరిష్కారాలతో ఎదుర్కోవడమే సమాజానికి శ్రేయస్కరం అని వివరించారు.