Visakhapatnam అమరావతి రాయల్స్ మూడో విజయం

Visakhapatnam అమరావతి రాయల్స్ మూడో విజయం

• ఆల్‌రౌండ్ ప్రదర్శనతో ఆకట్టుకున్న శశికాంత్
• చివరి వరకు ఉత్కంఠగా సాగిన మ్యాచ్.. 8 పరుగుల తేడాతో గెలుపు
• భీమవరం బుల్స్‌కి స్వల్ప లక్ష్య ఛేదనలో పరాజయం

విశాఖపట్నం (Visakhapatnam), ఆంధ్రప్రభ: ఏపీఎల్ 2026 సీజన్ 5లో భాగంగా విశాఖపట్నం వేదికగా జరిగిన ఆరవ రోజు తొలి మ్యాచ్‌లో క్యాపిటల్ అమరావతి రాయల్స్ జట్టు భీమవరం బుల్స్‌పై 8 పరుగుల తేడాతో విజయం సాధించింది. ఈ విజయంతో అమరావతి రాయల్స్ సీజన్‌లో మూడో విజయాన్ని నమోదు చేసింది. టాస్ గెలిచిన అమరావతి రాయల్స్ జట్టు మొదట బ్యాటింగ్ ఎంచుకుంది. అయితే ఓపెనర్లు తక్కువ పరుగులకే పెవిలియన్ చేరడంతో జట్టుకు శుభారంభం లభించలేదు. మిడిల్ ఆర్డర్ బ్యాట్స్‌మెన్‌లు ఇన్నింగ్స్‌ను నిలబెట్టారు.

వర్షం కారణంగా కొంతసేపు ఆటకు అంతరాయం ఏర్పడటంతో అంపైర్లు ఒక ఓవర్ తగ్గించి 19 ఓవర్ల మ్యాచ్‌గా నిర్ణయించారు. అమరావతి రాయల్స్ 18.4 ఓవర్లలో 169 పరుగులకు ఆలౌట్ అయ్యింది.

మిడిల్ ఆర్డర్ మెరుపులు

వన్‌డౌన్ బ్యాట్స్‌మెన్ వెంకట రాహుల్ 20 బంతుల్లో 43 పరుగులు (3 ఫోర్లు, 4 సిక్సర్లు)తో మెరుపు ఇన్నింగ్స్ ఆడాడు. కరెన్ షిండే 23 బంతుల్లో 33 పరుగులు, మరో బ్యాటర్ 24 బంతుల్లో 38 పరుగులు చేసి జట్టుకు గౌరవప్రదమైన స్కోరు అందించారు. భీమవరం బుల్స్ బౌలర్లలో సత్యనారాయణ రాజు 3 వికెట్లు, సాయి శ్రవణ్ 2 వికెట్లు తీశారు.

భీమవరం బుల్స్ పోరాటం

లక్ష్య ఛేదనలో భీమవరం బుల్స్ ఓపెనర్ హేమంత్ రెడ్డి అద్భుత ఇన్నింగ్స్ ఆడాడు. 38 బంతుల్లో 59 పరుగులు (4 ఫోర్లు, 3 సిక్సర్లు)తో జట్టును ముందుకు నడిపించాడు. వన్‌డౌన్ బ్యాటర్ సాయి శ్రవణ్ 26 బంతుల్లో 40 పరుగులు చేశాడు. అయితే ఇతర బ్యాట్స్‌మెన్‌లు రాణించకపోవడంతో భీమవరం జట్టు నిర్ణీత 19 ఓవర్లలో 9 వికెట్ల నష్టానికి 163 పరుగులు మాత్రమే చేయగలిగింది. దీంతో అమరావతి రాయల్స్ 8 పరుగుల తేడాతో విజయం సాధించింది.

ప్లేయర్ ఆఫ్ ది మ్యాచ్

అద్భుత ఆల్‌రౌండ్ ప్రదర్శనతో కోడి వెంకట శశికాంత్ ప్లేయర్ ఆఫ్ ది మ్యాచ్‌గా ఎంపికయ్యాడు.