చౌటుప్పల్కు అరుదైన గుర్తింపు….
చౌటుప్పల్కు అరుదైన గుర్తింపు….
- జాతీయ వైస్ ప్రెసిడెంట్గా సురేందర్ రెడ్డి
చౌటుప్పల్, ఆంధ్రప్రభ ; యాదాద్రి భువనగిరి జిల్లా చౌటుప్పల్ మండలంలోని యెల్లగిరి గ్రామానికి చెందిన ప్రముఖ సామాజిక సేవకుడు, అడ్వకేట్, గ్రామ ఉప సర్పంచ్ కందకట్ల సురేందర్ రెడ్డి కి అరుదైన గౌరవం దక్కింది. “నేషనల్ హ్యూమన్ రైట్స్ యాంటీ కరెప్షన్ & యాంటీ క్రైమ్ బ్యూరో ఆఫ్ ఇండియా” (National Human Rights Anti Corruption & Anti Crime Bureau of India) సంస్థ జాతీయ వైస్ ప్రెసిడెంట్గా ఆయన నియమితులయ్యారు.
సేవా దృక్పథానికి గుర్తింపు
గత కొంతకాలంగా సామాజిక సేవ, మానవ హక్కుల పరిరక్షణ, అవినీతి వ్యతిరేక పోరాటంతో పాటు ప్రజా సంక్షేమ కార్యక్రమాల్లో సురేందర్ రెడ్డి చురుకైన పాత్ర పోషిస్తున్నారు. ఆయన చేస్తున్న విశిష్ట సేవలను గుర్తించి, సంస్థ జాతీయ అధ్యక్షులు డా. కె.ఎస్. జోతిశ్వర్ రెడ్డి ఈ కీలక బాధ్యతలను అప్పగిస్తూ నియామక ఉత్తర్వులు జారీ చేశారు.
మరింత బాధ్యతగా పనిచేస్తా సురేందర్ రెడ్డి
ఈ సందర్భంగా సురేందర్ రెడ్డి మాట్లాడుతూ.. తనపై నమ్మకం ఉంచి ఈ గౌరవప్రదమైన బాధ్యతను అప్పగించిన సంస్థ జాతీయ నాయకత్వానికి కృతజ్ఞతలు తెలిపారు. బాధితులకు న్యాయం జరిగేలా చూడటంలోనూ, సమాజంలో పేరుకుపోయిన అవినీతిపై పోరాడటంలోనూ తన వంతు కృషి చేస్తానని, ప్రజా హక్కుల పరిరక్షణే ధ్యేయంగా ముందుకు సాగుతానని ఆయన పేర్కొన్నారు.
శుభాకాంక్షల వెల్లువ
జాతీయ స్థాయి పదవికి సురేందర్ రెడ్డి ఎంపికవ్వడం పట్ల యెల్లగిరి గ్రామ ప్రజలు, పలువురు ప్రజాప్రతినిధులు, మిత్రులు, శ్రేయోభిలాషులు హర్షం వ్యక్తం చేస్తున్నారు. ఆయన మరిన్ని ఉన్నత శిఖరాలను అధిరోహించాలని ఆకాంక్షిస్తూ పెద్ద ఎత్తున అభినందనలు తెలియజేస్తున్నారు.
