30 years | చిన్న లక్షణాలను నిర్లక్ష్యం చేస్తే… పెద్ద సమస్యలకు దారితీయొచ్చు!
30 years | చిన్న లక్షణాలను నిర్లక్ష్యం చేస్తే… పెద్ద సమస్యలకు దారితీయొచ్చు!
30 years | వెబ్డెస్క్, ఆంధ్రప్రభ : మహిళల ఆరోగ్యంలో గర్భాశయం కీలకమైన అవయవం. అయితే నేటి జీవనశైలి, ఒత్తిడి, హార్మోన్ల అసమతుల్యత, ఆలస్యమైన వివాహాలు, ఆహారపు అలవాట్ల మార్పులు వంటి అనేక కారణాలతో గర్భాశయ సంబంధిత సమస్యలు పెరుగుతున్నాయి. ముఖ్యంగా చాలామంది మహిళలు మొదట కనిపించే చిన్న చిన్న లక్షణాలను సాధారణమే అని భావించి నిర్లక్ష్యం చేస్తుంటారు. కానీ కొన్ని అనారోగ్య సంకేతాలను ముందుగానే గుర్తిస్తే పెద్ద సమస్యలను నివారించే అవకాశం ఉంటుంది.
సాధారణంగా గర్భాశయ సమస్యలలో ఫైబ్రాయిడ్స్, పాలిసిస్టిక్ సమస్యలు, ఇన్ఫెక్షన్లు, ఎండోమెట్రియోసిస్, గర్భాశయ గడ్డలు, సర్వికల్ సమస్యలు వంటి అనేక రకాల ఇబ్బందులు కనిపిస్తాయి. వీటి ప్రారంభ సంకేతాలు చాలా సార్లు స్పష్టంగా కనిపించకపోయినా… శరీరం మాత్రం ముందుగానే హెచ్చరికలు ఇస్తుంది.
30 years | గర్భాశయ సమస్యల ప్రధాన రకాలు
అందులో ముఖ్యమైనది ఋతుచక్రంలో మార్పులు. నెలసరి చాలా రోజుల పాటు కొనసాగడం, ఎక్కువ రక్తస్రావం, అసాధారణమైన నొప్పి, నెలసరి తేదీలు పూర్తిగా మారిపోవడం వంటి లక్షణాలు ఉంటే నిర్లక్ష్యం చేయకూడదు. కొందరికి మధ్య మధ్యలో కూడా బ్లీడింగ్ కనిపించొచ్చు. ఇవి హార్మోన్ల మార్పుల వల్ల కావచ్చు… లేదా గర్భాశయ సమస్యలకు సంకేతం కావచ్చు.
కడుపు కింది భాగంలో తరచూ నొప్పి, ఒత్తిడి అనిపించడం, నడుము నొప్పి, శరీరం త్వరగా అలసిపోవడం వంటి లక్షణాలు కూడా గమనించాలి. కొందరికి పొట్ట ఉబ్బినట్టుగా అనిపించడం, తరచూ మూత్రం రావడం వంటి సమస్యలు ఫైబ్రాయిడ్స్ కారణంగా ఉండొచ్చు.
వైట్ డిశ్చార్జ్ ఎక్కువగా రావడం, దుర్వాసన, దురద, అసౌకర్యం వంటి లక్షణాలు ఉంటే వెంటనే వైద్యులను సంప్రదించడం మంచిది. ఇవి ఇన్ఫెక్షన్లకు సంకేతాలు కావచ్చు. కొన్ని సందర్భాల్లో గర్భాశయ ముఖద్వారానికి సంబంధించిన సమస్యలు ప్రారంభ దశలో ఎలాంటి నొప్పి లేకుండానే అభివృద్ధి చెందుతాయి. అందుకే రెగ్యులర్ చెకప్లు చాలా అవసరం.
ప్రత్యేకంగా 30 ఏళ్లు దాటిన మహిళలు పాప్స్మియర్ టెస్ట్, స్కానింగ్ వంటి పరీక్షలను వైద్యుల సూచన మేరకు చేయించుకుంటే మంచిది. కుటుంబంలో ఇలాంటి సమస్యల చరిత్ర ఉంటే మరింత జాగ్రత్త అవసరం.
ఆహారం కూడా ఇందులో కీలక పాత్ర పోషిస్తుంది. ఆకుకూరలు, పండ్లు, ఐరన్, ఫైబర్ ఎక్కువగా ఉండే ఆహారం తీసుకోవాలి. నీళ్లు ఎక్కువగా తాగడం, వ్యాయామం చేయడం, బరువు నియంత్రణలో ఉంచుకోవడం వల్ల హార్మోన్ల సమతుల్యత మెరుగుపడుతుంది. ఒత్తిడి తగ్గించుకోవడం కూడా చాలా ముఖ్యం.
ముఖ్యంగా మహిళలు తమ ఆరోగ్యం విషయంలో సంకోచం, నిర్లక్ష్యం రెండూ వద్దు. “ఇది సాధారణమే” అని వాయిదా వేయకుండా… చిన్న మార్పు కనిపించినా వైద్యులను సంప్రదించడం ఉత్తమం. ఎందుకంటే ముందుగానే గుర్తించిన సమస్యలకు చికిత్స సులభంగా, ఫలితాలు మెరుగ్గా ఉంటాయి.
(ఈ వ్యాసం కేవలం సమస్య పట్ల పాఠకుల్లో ప్రాధమిక అవగాహన కలిగించడానికే. సమస్య తీవ్రంగా ఉనదనిపించినప్పుడు వెంటనే వైద్యులను కలవడం తప్పనిసరి)
