‘జననాయగన్’కు గ్రీన్ సిగ్నల్.. ‘A’ సర్టిఫికెట్తో విడుదలకు సిద్ధం!
ఆంధ్రప్రభ, వెబ్ డెస్క్: తమిళ స్టార్ హీరో విజయ్ ప్రధాన పాత్రలో నటించిన ప్రతిష్టాత్మక చిత్రం ‘జననాయగన్’ ఎట్టకేలకు సెన్సార్ ప్రక్రియను పూర్తి చేసుకుంది. చిత్రానికి సెన్సార్ బోర్డు ‘A’ సర్టిఫికెట్ జారీ చేయడంతో విడుదలకు ఉన్న కీలక అడ్డంకులు తొలగిపోయాయి. దీంతో ఈ నెల 24న సినిమా విడుదలకు చిత్రబృందం వేగంగా ఏర్పాట్లు చేస్తున్నట్లు తెలుస్తోంది.
సుమారు 2 గంటల 24 నిమిషాల నిడివితో తెరకెక్కిన ఈ సినిమాకు సెన్సార్ బోర్డు కొన్ని స్వల్ప మార్పులను సూచించినట్లు సమాచారం. ఆ మార్పులు పూర్తి చేసిన అనంతరం చిత్రానికి అధికారికంగా ‘A’ సర్టిఫికెట్ లభించింది. యాక్షన్కు ప్రాధాన్యత ఉన్న కొన్ని సన్నివేశాల కారణంగానే ఈ సర్టిఫికెట్ ఇచ్చినట్లు సినీ వర్గాల్లో చర్చ జరుగుతోంది.
ఇప్పటికే విడుదలైన పోస్టర్లు, గ్లింప్స్ సినిమాపై మంచి ఆసక్తిని పెంచాయి. విజయ్ను పవర్ఫుల్ లుక్లో చూపించిన ప్రచార కంటెంట్ అభిమానులను ఆకట్టుకుంది. తాజాగా సెన్సార్ పూర్తవడంతో సినిమా విడుదలకు మార్గం సుగమమైంది.
ఇది విజయ్ నటుడిగా చేస్తున్న చివరి సినిమా కావచ్చనే ప్రచారం కూడా ఈ చిత్రానికి ప్రత్యేక ఆకర్షణగా మారింది. దీంతో ‘జననాయగన్’ విడుదల కోసం అభిమానులు ఎంతో ఆసక్తిగా ఎదురుచూస్తున్నారు. త్వరలోనే ట్రైలర్తో పాటు విడుదల తేదీకి సంబంధించిన అధికారిక ప్రచారాన్ని మరింత వేగవంతం చేసే అవకాశం ఉందని సినీ వర్గాలు భావిస్తున్నాయి.
