సీఎం చంద్రబాబు బిగ్ భరోసా

• రైతుల భూములకు సంపూర్ణ రక్షణే ప్రభుత్వ లక్ష్యం
• భూ సమస్యలను పరిష్కరించి హక్కులకు భరోసా కల్పిస్తాం: సీఎం చంద్రబాబు
• “మీ భూమి – మీ హక్కు” కార్యక్రమంలో రైతులతో ముఖాముఖి

కలిదిండి (ఏలూరు బ్యూరో), ఆంధ్రప్రభ: రైతుల భూములకు సంపూర్ణ రక్షణ కల్పించడంతో పాటు, భూ సమస్యలను సత్వరమే పరిష్కరించి ప్రతి రైతుకు తన భూమిపై పూర్తి హక్కు కల్పించడమే కూటమి ప్రభుత్వ లక్ష్యమని రాష్ట్ర ముఖ్యమంత్రి నారా చంద్రబాబు నాయుడు అన్నారు. కలిదిండి మండల కేంద్రంలో సోమవారం నిర్వహించిన “మీ భూమి – మీ హక్కు” కార్యక్రమంలో ఆయన రైతులతో ముఖాముఖిగా మాట్లాడారు. రైతుల సమస్యలను నేరుగా అడిగి తెలుసుకుని, అధికారులను అక్కడికక్కడే వివరాలు అడిగి తెలుసుకున్నారు.

ఈ సందర్భంగా సీఎం చంద్రబాబు మాట్లాడుతూ.. రైతుకు భూమి అత్యంత విలువైన ఆస్తి అని అన్నారు. తరతరాలుగా రైతులు సాగు చేసుకుంటున్న భూములకు సంబంధించి ఎలాంటి వివాదాలు, రికార్డుల్లో తప్పులు, సరిహద్దు సమస్యలు ఉన్నా వాటిని పరిష్కరించాల్సిన బాధ్యత ప్రభుత్వంపై ఉందన్నారు. భూమికి సంబంధించిన రికార్డులు స్పష్టంగా, పారదర్శకంగా ఉంటే రైతులకు అనేక సమస్యలు తొలగిపోతాయని చెప్పారు.

భూ రికార్డుల్లో చిన్నపాటి తప్పులు కూడా రైతులను కార్యాలయాల చుట్టూ తిరిగేలా చేస్తున్నాయని సీఎం పేర్కొన్నారు. ఇకపై అలాంటి పరిస్థితి ఉండకూడదని స్పష్టం చేశారు. రైతులు తమ భూమి కోసం అధికారుల చుట్టూ తిరగకుండా, ప్రభుత్వమే వారి వద్దకు వెళ్లి సమస్యలను పరిష్కరించే విధంగా వ్యవస్థను రూపొందిస్తున్నామని తెలిపారు.

భూ రికార్డుల ప్రక్షాళన..

రాష్ట్రవ్యాప్తంగా భూ రికార్డులను సమగ్రంగా పరిశీలించి, అవసరమైన చోట రికార్డుల ప్రక్షాళన చేపడుతున్నామని చంద్రబాబు తెలిపారు. భూమి ఎవరిది, ఎంత విస్తీర్ణం ఉంది, సరిహద్దులు ఏమిటి అనే అంశాల్లో స్పష్టత ఉండేలా చర్యలు తీసుకుంటామని చెప్పారు. రికార్డులలో తప్పులు ఉంటే వాటిని సరిచేసి రైతులకు ఇబ్బందులు లేకుండా చేస్తామన్నారు.

భూముల విషయంలో వివాదాలకు ప్రధాన కారణంగా మారుతున్న సరిహద్దు సమస్యలపై కూడా ప్రత్యేక దృష్టి సారించాల్సిన అవసరం ఉందన్నారు. సర్వే ప్రక్రియను మరింత పారదర్శకంగా నిర్వహించి, భూ యజమానులకు వారి భూమిపై స్పష్టమైన హక్కులు కల్పించేందుకు చర్యలు తీసుకుంటామని చెప్పారు.

రైతుల సమస్యలను నేరుగా విన్న సీఎం..

కార్యక్రమంలో పలువురు రైతులు తమ భూములకు సంబంధించిన సమస్యలను ముఖ్యమంత్రి దృష్టికి తీసుకువచ్చారు. పట్టాదారు పాస్‌బుక్‌లు, భూ రికార్డుల్లో పేర్ల మార్పులు, వారసత్వ హక్కులు, భూముల సరిహద్దులు, సర్వేలు తదితర అంశాలపై రైతులు సీఎంకు వివరించారు. రైతులు చెప్పిన సమస్యలను సీఎం చంద్రబాబు శ్రద్ధగా విని, సంబంధిత అధికారులను వివరాలు అడిగి తెలుసుకున్నారు.

ప్రతి సమస్యను నిబంధనల ప్రకారం పరిశీలించి పరిష్కరించాలని అధికారులను ఆదేశించారు. రైతులకు న్యాయం జరిగేలా అధికారులు బాధ్యతతో పనిచేయాలని సూచించారు. ప్రజలకు, రైతులకు ప్రభుత్వ కార్యాలయాల్లో అనవసర ఇబ్బందులు కలగకుండా సేవలు అందించాలని స్పష్టం చేశారు.

భూమి హక్కులకు సాంకేతిక భద్రత..

ఆధునిక సాంకేతిక పరిజ్ఞానాన్ని ఉపయోగించుకుని భూ రికార్డులను మరింత పటిష్టంగా నిర్వహించాల్సిన అవసరం ఉందని సీఎం అన్నారు. భూముల వివరాలు డిజిటల్ రూపంలో అందుబాటులో ఉండేలా చర్యలు తీసుకోవడంతో పాటు, భూ రికార్డుల్లో మార్పులు, చేర్పుల విషయంలో పారదర్శకత పాటించాలన్నారు.

రైతుల భూములకు సంబంధించిన సమాచారం భద్రంగా ఉండాలని, అక్రమ మార్పులకు అవకాశం లేకుండా వ్యవస్థను పటిష్టం చేయాలని అధికారులకు సూచించారు. రైతు తన భూమి విషయంలో ఎవరినీ ఆశ్రయించాల్సిన అవసరం లేకుండా, తన హక్కులను సులభంగా నిర్ధారించుకునే పరిస్థితి రావాలన్నదే ప్రభుత్వ ఉద్దేశమని చెప్పారు.

అధికారులు బాధ్యతగా పనిచేయాలి..

భూ సమస్యలు పరిష్కరించడంలో రెవెన్యూ, సర్వే, పంచాయతీరాజ్ తదితర శాఖల అధికారులు సమన్వయంతో పనిచేయాలని సీఎం సూచించారు. ఒక రైతు సమస్య ఒక కార్యాలయం నుంచి మరో కార్యాలయానికి తిరిగే పరిస్థితి ఉండకూడదన్నారు. దరఖాస్తుల పరిష్కారంలో జాప్యం చేయకుండా నిర్ణీత సమయంలో చర్యలు తీసుకోవాలని ఆదేశించారు.

భూ వివాదాల కారణంగా రైతులు కోర్టుల చుట్టూ తిరిగే పరిస్థితిని సాధ్యమైనంత వరకు తగ్గించేందుకు ముందుగానే సమస్యలను గుర్తించి పరిష్కరించాలని సూచించారు. ప్రజలకు న్యాయం చేయడమే ప్రభుత్వ యంత్రాంగం ప్రధాన బాధ్యత అని సీఎం చంద్రబాబు అన్నారు.

రైతుల సంక్షేమానికి ప్రభుత్వం పెద్దపీట…

రైతుల సంక్షేమానికి కూటమి ప్రభుత్వం అత్యంత ప్రాధాన్యత ఇస్తోందని చంద్రబాబు తెలిపారు. వ్యవసాయ రంగం బలోపేతం అయితేనే గ్రామీణ ఆర్థిక వ్యవస్థ బలపడుతుందని అన్నారు. రైతులకు పెట్టుబడి, సాగునీరు, మార్కెట్, సాంకేతిక పరిజ్ఞానం వంటి అంశాల్లో అండగా నిలవడంతో పాటు, వారి భూమికి పూర్తి భద్రత కల్పించాల్సిన అవసరం ఉందన్నారు.

రైతు సంతోషంగా ఉంటేనే రాష్ట్రం అభివృద్ధి చెందుతుందని సీఎం పేర్కొన్నారు. రైతు భూమికి సంబంధించి ఏ సమస్య వచ్చినా ప్రభుత్వం దృష్టికి తీసుకురావాలని, సంబంధిత అధికారులు వాటిని పరిష్కరించేందుకు చర్యలు తీసుకుంటారని చెప్పారు.

“మీ భూమి – మీ హక్కు”కు ప్రత్యేక ప్రాధాన్యం..

“మీ భూమి – మీ హక్కు” కార్యక్రమం కేవలం భూ రికార్డుల పరిశీలన కార్యక్రమం మాత్రమే కాదని, రైతుల హక్కులను పరిరక్షించే సమగ్ర కార్యక్రమమని సీఎం చంద్రబాబు వివరించారు. భూమిపై హక్కు విషయంలో ప్రతి రైతుకు ప్రభుత్వం అండగా ఉంటుందని భరోసా ఇచ్చారు.

రైతుల నుంచి వచ్చిన సూచనలు, సమస్యలను పరిగణనలోకి తీసుకుని అవసరమైన చోట విధానపరమైన మార్పులు తీసుకొస్తామని చెప్పారు. భూ పరిపాలనలో పారదర్శకత, జవాబుదారీతనం పెంచి ప్రజలకు మెరుగైన సేవలు అందించేందుకు ప్రభుత్వం నిరంతరం కృషి చేస్తుందని తెలిపారు.

“రైతు తన భూమిపై హక్కు కోసం ఇబ్బంది పడకూడదు. తన భూమి తనదేనన్న పూర్తి భరోసాతో ఉండాలి. భూమి విషయంలో రైతుకు ఎలాంటి అన్యాయం జరగకుండా ప్రభుత్వం అండగా ఉంటుంది” అని సీఎం చంద్రబాబు స్పష్టం చేశారు.