గాంధీ ఆస్పత్రి మార్చురీలో మెడికో విద్యార్థికి మంత్రి వాకిటి శ్రీహరి నివాళి
కుటుంబాన్ని ఓదార్చి.. బాధ్యులపై కఠిన చర్యలు తీసుకోవాలని డిమాండ్
ఇలాంటి ఘటనలు పునరావృతం కాకుండా కఠిన నిర్ణయాలు అవసరం: మంత్రి
హైదరాబాద్, ఆంధ్రప్రభ: మెడికో విద్యార్థిని ప్రియాంక మృతి ఘటనపై ప్రభుత్వం తీవ్రంగా స్పందించింది. గాంధీ ఆస్పత్రి మార్చురీలో ప్రియాంక భౌతికకాయాన్ని మంత్రి వాకిటి శ్రీహరి, మాజీ ఎమ్మెల్యే, ఏఐసీసీ కార్యదర్శి సంపత్కుమార్ సందర్శించి నివాళులర్పించారు. అనంతరం ప్రియాంక తండ్రిని పరామర్శించి ఓదార్చారు. ఈ విషాద సమయంలో కుటుంబానికి ప్రభుత్వం అండగా ఉంటుందని మంత్రి భరోసా ఇచ్చారు.
ప్రియాంక మరణం అత్యంత దురదృష్టకరమైన ఘటన అని మంత్రి వాకిటి శ్రీహరి పేర్కొన్నారు. ఆమె మృతికి కారణమైన వారిపై కఠిన చర్యలు తీసుకోవాల్సిన అవసరం ఉందన్నారు. బాధ్యులు చట్టంలోని లొసుగులను ఆసరాగా చేసుకుని తప్పించుకోకుండా చర్యలు ఉండాలని స్పష్టం చేశారు.
సీఎం వెంటనే స్పందించారు
ప్రియాంక ఘటనపై ముఖ్యమంత్రి రేవంత్రెడ్డి వెంటనే స్పందించారని మంత్రి తెలిపారు. ఘటనపై అవసరమైన చర్యలు తీసుకోవాలని తమకు, సంబంధిత అధికారులకు ముఖ్యమంత్రి ఆదేశాలు జారీ చేశారని చెప్పారు. బాధ్యులపై చట్టపరంగా చర్యలు తీసుకోవడంతో పాటు, భవిష్యత్లో ఇలాంటి ఘటనలు చోటుచేసుకోకుండా అవసరమైన కఠిన నిర్ణయాలు తీసుకోవాల్సిన ఆవశ్యకత ఉందన్నారు.
కుటుంబానికి ప్రభుత్వం అండగా..
కుమార్తెను కోల్పోయిన ప్రియాంక కుటుంబానికి ప్రభుత్వం అండగా ఉంటుందని మంత్రి హామీ ఇచ్చారు. కుటుంబ సభ్యులకు అవసరమైన సహకారం అందించడంతో పాటు ఘటనకు సంబంధించిన అంశాలపై సమగ్రంగా దృష్టి సారించాల్సిన అవసరం ఉందన్నారు. బాధ్యులను గుర్తించి చట్ట ప్రకారం చర్యలు తీసుకోవాలని ఆయన డిమాండ్ చేశారు.
ప్రియాంక కుటుంబాన్ని పరామర్శించిన మాజీ ఎమ్మెల్యే, ఏఐసీసీ కార్యదర్శి సంపత్కుమార్ కూడా ఘటనపై తీవ్ర విచారం వ్యక్తం చేశారు. యువ వైద్య విద్యార్థి మృతి కలచివేసిందని పేర్కొంటూ, బాధ్యులపై కఠిన చర్యలు తీసుకోవాలని కోరారు.
మెడికో విద్యార్థిని ప్రియాంక మృతి నేపథ్యంలో వైద్య విద్యార్థుల భద్రత, విద్యా సంస్థల్లో రక్షణ చర్యలు, ఇలాంటి ఘటనలపై యంత్రాంగం స్పందించే తీరుపై మరోసారి చర్చ మొదలైంది. భవిష్యత్లో ఇటువంటి విషాద ఘటనలు పునరావృతం కాకుండా ముందస్తు చర్యలు తీసుకోవాల్సిన అవసరం ఉందనే అభిప్రాయాలు వ్యక్తమవుతున్నాయి.
