Identity | ఏపీలో ప్రతి ఇంటికి ఒక గుర్తింపు
- ఫ్యామిలీ బెనిఫిట్ కార్డుతో కొత్త పాలన
Identity| చిత్తూరు బ్యూరో, ఆంధ్రప్రభ : ఆంధ్రప్రదేశ్‌లో ప్రతి కుటుంబాన్ని ఒకే వేదికపైకి తీసుకురావడానికి, వారికి అందుతున్న అన్ని ప్రభుత్వ పథకాలను ఒకే గుర్తింపులో చూపించడానికి రాష్ట్ర ప్రభుత్వం ఫ్యామిలీ బెనిఫిట్ కార్డు (ఎఫ్‌బీసీ)ను అమలు చేయాలని నిర్ణయించింది. అర్హులైన ప్రతి కుటుంబానికి ప్రభుత్వ సేవలు, పథకాలు, సబ్సిడీలు ఎటువంటి అడ్డంకులు లేకుండా చేరాలనే సంకల్పంతో ఈ కార్డు రూపుదిద్దుకుంటోంది.
రాష్ట్రంలోని వేలాది కుటుంబాల వద్ద ఉన్న రేషన్, ఆధార్‌, భూమి రికార్డులు, ఆదాయం, విద్య, ఆరోగ్య వివరాలు, పెన్షన్లు, సబ్సిడీలు ఇలా వివిధ శాఖల వద్ద ఉన్న సమాచారాన్ని ఒక్కచోట సమీకరించి, కుటుంబానికి ప్రత్యేక గుర్తింపు సంఖ్య కేటాయించి అందించటం ఈ ప్రణాళిక ప్రధాన ఉద్దేశ్యం. ఏ కుటుంబానికి ఏ పథకం అందుతోంది? ఇంకా ఏ ప్రయోజనం అవసరమో? అన్నది స్పష్టంగా కనిపించేలా ఈ వ్యవస్థ రూపొందుతోంది.
కుటుంబ ఆర్థిక స్థితిని గుర్తించి, అందుతున్న ప్రభుత్వ పథకాలను విశ్లేషించి, వారికి ఇంకా ఏ పథకాలు అవసరమో ఆటోమేటిక్‌గా సూచించే విధంగా ఇది పనిచేస్తుంది. కుటుంబ సభ్యుల అభివృద్ధికి సరైన పథకాలు ఎంపికచేసే సామర్థ్యంతో ఈ వ్యవస్థ రూపొందించబడింది. పేదరికం లేని సమాజం దిశగా ప్రభుత్వం తీసుకున్న చర్యల్లో ఇదొక భారీ అడుగుగా భావిస్తున్నారు. రాబోయే జూన్‌ నుంచి రాష్ట్రవ్యాప్తంగా ఎఫ్‌బీసీ అమలు చేయాలని ప్రభుత్వం ఇప్పటికే సన్నాహాలు ప్రారంభించింది.
మొబైల్ యాప్‌ ద్వారా ప్రతి కుటుంబ సభ్యుడు తమ వివరాలు, పథకాల సమాచారాన్ని, సేవల ప్రయోజనాలను, బిల్లులను, భూమి రికార్డులను ఒకే చోట వీక్షించే అవకాశం కలుతుంది. వలస వెళ్లినప్పుడు చిరునామా మార్చుకునే సదుపాయం కూడా యాప్‌లోనే ఉంటుంది. ఎఫ్‌బీసీ అమలు విషయంపై ముఖ్యమంత్రి నారా చంద్రబాబు నాయుడు డిసెంబర్‌ 2న సచివాలయంలో ఉన్నతాధికారులతో సమీక్ష జరపనున్నారు. ప్రతి శాఖ వద్ద ఉన్న కుటుంబ వివరాల ఏకీకరణ, సాంకేతిక వ్యవస్థల అనుసంధానం వంటి అంశాలపై సూచనలు సేకరించనున్నారు.
2019లో అప్పటి మంత్రిగా ఉన్న నారా లోకేశ్‌ ఫ్యామిలీ కార్డు ప్రణాళికకు రూపకల్పన చేసి, ప్రపంచ బ్యాంకుకు ప్రజంటేషన్‌ ఇచ్చారు. రాష్ట్ర డేటా సెంటర్‌లోని వివిధ శాఖల వివరాలను అనుసంధానించేందుకు చర్యలు తీసుకున్నారు. తరువాతి పాలనలో ఈ ప్రణాళిక నిలిచిపోయినప్పటికీ, ఇప్పుడు తిరిగి మరింత విస్తృత రూపంలో అమలు కానుంది. పౌరసరఫరాల శాఖ వద్ద రేషన్ కార్డులు, సెర్ప్‌ వద్ద పెన్షన్లు, మహిళా సంఘాల వివరాలు, గ్రామ/వార్డు సచివాలయాల వద్ద కుటుంబ సమాచారం, పంచాయతీ రాజ్‌ వద్ద గృహనిర్మాణ వివరాలు, సీఎఫ్‌ఎంఎస్‌ వద్ద ఉద్యోగుల వివరాలు ఉన్నట్లు ప్రభుత్వం పేర్కొంది.
ఈ సమస్త డేటాను ఎఫ్‌బీసీ ద్వారా ఏకీకరించడం ద్వారా అర్హులైన కుటుంబాలకు మాత్రమే ప్రయోజనాలు చేరేలా పారదర్శక వ్యవస్థ ఏర్పడనుంది. రైతుల భూమి రికార్డులు, పంట నమోదు, పెట్టుబడి సాయం, అందిన ప్రభుత్వ సహాయం వంటి వివరాలన్నీ ఇందులో పొందుపరచబడతాయి. కుటుంబానికి సంబంధించిన నెలవారీ విద్యుత్‌, నీటి బిల్లుల వివరాలు కూడా కనిపిస్తాయి. స్వర్ణాంధ్ర–2047 సాధనలో ఈ కార్డు కీలక పాత్ర పోషించనుందని ప్రభుత్వం భావిస్తోంది. పథకాల పంపిణీ, లబ్ధిదారుల ఎంపిక, అభివృద్ధి ప్రణాళిక ఇవన్నీ ఒక్క వేదికపైకి రావడం ద్వారా పరిపాలన మరింత వేగవంతం కానుంది.
