బీమా పరిహారం వెంటనే చెల్లించాలి

• జిల్లా కలెక్టర్‌కు వైఎస్సార్సీపీ నేత ఆవుటాల రమణారెడ్డి వినతి

శ్రీ సత్యసాయి బ్యూరో, ఆంధ్రప్రభ: 2024–25 సంవత్సరానికి సంబంధించి మామిడి పంట బీమా ప్రీమియం చెల్లించిన రైతులకు ఇప్పటివరకు బీమా పరిహారం అందకపోవడంతో వెంటనే ప్రభుత్వం దృష్టికి ఈ సమస్యను తీసుకెళ్లి రైతులకు న్యాయం చేయాలని వైఎస్సార్సీపీ శ్రీ సత్యసాయి జిల్లా ప్రధాన కార్యదర్శి ఆవుటాల రమణారెడ్డి జిల్లా కలెక్టర్ ఎ. శ్యాం ప్రసాద్‌ను కోరారు. గురువారం పుట్టపర్తి కలెక్టరేట్‌లో రైతులతో కలిసి కలెక్టర్‌ను కలిసి వినతిపత్రం సమర్పించారు.

ఈ సందర్భంగా ఆవుటాల రమణారెడ్డి మాట్లాడుతూ.. శ్రీ సత్యసాయి జిల్లాలో 2024–25 సంవత్సరానికి సంబంధించి మొత్తం 2,353 మంది మామిడి రైతులు రూ.90.65 లక్షల ప్రీమియం చెల్లించినప్పటికీ ఇప్పటివరకు బీమా పరిహారం విడుదల కాలేదని తెలిపారు. రైతులు నిబంధనల ప్రకారం ప్రీమియం చెల్లించినప్పటికీ ప్రభుత్వం నుంచి పరిహారం అందక తీవ్ర ఆర్థిక ఇబ్బందులు ఎదుర్కొంటున్నారని ఆవేదన వ్యక్తం చేశారు.

గతంలో ఈ విషయంపై అగ్రికల్చరల్ ఇన్సూరెన్స్ కంపెనీ (ఏఐసీ) ప్రతినిధులను సంప్రదించగా, ప్రభుత్వం నుంచి అవసరమైన వర్షపాతం (రెయిన్‌ఫాల్) వివరాలు అందకపోవడంతో బీమా ప్రక్రియ పూర్తికాలేదని వారు తెలిపినట్లు రమణారెడ్డి వివరించారు. ఈ కారణంగా రైతులకు రావాల్సిన పరిహారం నెలల తరబడి పెండింగ్‌లో ఉండడం సరికాదని అన్నారు.

ప్రస్తుతం 2025 సంవత్సరానికి సంబంధించిన బీమా క్లెయిమ్‌ల చెల్లింపులను కూడా ఈ-క్రాప్ బుకింగ్ పూర్తయ్యే వరకు నిలిపివేయాలనే ప్రయత్నాలు జరుగుతున్నాయనే సమాచారం రైతుల్లో ఆందోళన కలిగిస్తోందని పేర్కొన్నారు. ఇప్పటికే జిల్లాలో వర్షాభావ పరిస్థితులు నెలకొనడంతో మామిడి తోటలపై కరువు ప్రభావం పడే ప్రమాదం ఉందని, ఇలాంటి సమయంలో పెండింగ్‌లో ఉన్న బీమా పరిహారం వెంటనే విడుదల చేయడం ద్వారా రైతులకు ఊరటనివ్వాలని కోరారు.

రైతుల సమస్యలను ఓపికగా విన్న జిల్లా కలెక్టర్ శ్యాం ప్రసాద్ ఈ అంశాన్ని ప్రభుత్వం దృష్టికి తీసుకెళ్లి తగిన చర్యలు తీసుకునేలా ప్రయత్నిస్తామని హామీ ఇచ్చినట్లు ఆవుటాల రమణారెడ్డి తెలిపారు. రైతుల సమస్యల పరిష్కారానికి పరిపాలనా స్థాయిలో అవసరమైన చర్యలు తీసుకోవాలని ఆయన విజ్ఞప్తి చేశారు.

మామిడి సాగు జిల్లాలో వేలాది కుటుంబాలకు ప్రధాన జీవనాధారమని, బీమా పరిహారం ఆలస్యం కావడం వల్ల రైతులు ఆర్థికంగా తీవ్ర ఇబ్బందులు ఎదుర్కొంటున్నారని నాయకులు పేర్కొన్నారు. ప్రభుత్వం వెంటనే స్పందించి పెండింగ్‌లో ఉన్న బీమా క్లెయిమ్‌లను విడుదల చేయాలని డిమాండ్ చేశారు.

ఈ కార్యక్రమంలో వైఎస్సార్సీపీ జిల్లా అధికార ప్రతినిధి సాయి, మాజీ కౌన్సిలర్ నారాయణరెడ్డి, రాష్ట్ర ఎస్సీ సెల్ జాయింట్ సెక్రటరీ నర్సింలు, ఎస్సీ నియోజకవర్గ జనరల్ సెక్రటరీ రామయ్య, బుక్కపట్నం మండల పార్టీ ఉపాధ్యక్షుడు రంగారెడ్డి, రైతు నాయకులు గోపాల్‌రెడ్డి, చిన్న గోపాల్‌రెడ్డి, చిన్నపరెడ్డి, వెంకటరెడ్డి, నాగప్రసాద్‌రెడ్డి, రాఘవరెడ్డి, దామోదర్‌రెడ్డి, శ్రీధర్‌రెడ్డి, చంద్రశేఖర్, పార్టీ యువజన విభాగం నాయకుడు సందీప్ తదితరులు పాల్గొన్నారు.