గుంతలమయంగా మోడల్ స్కూల్ రోడ్డు
- విద్యార్థులు, వాహనదారుల అవస్థలు
- మరమ్మతులు చేయాలని విజ్ఞప్తి
చౌటుప్పల్, ఆంధ్రప్రభ : యాదాద్రి భువనగిరి జిల్లా చౌటుప్పల్ మున్సిపాలిటీలోని లక్కారం ఆదర్శ మోడల్ స్కూల్కు వెళ్లే రహదారి పూర్తిగా దెబ్బతినడంతో విద్యార్థులు, వాహనదారులు తీవ్ర ఇబ్బందులు పడుతున్నారు. ఇటీవల వాటర్ పైప్లైన్ పనులు పూర్తి చేసిన అధికారులు, ఆ తర్వాత రోడ్డును సరిగ్గా లెవలింగ్ చేయకపోవడంతో దారి పొడవునా పెద్ద పెద్ద గుంతలు ఏర్పడ్డాయి. ప్రతిరోజూ ఈ దారి గుండా విద్యార్థులను తీసుకెళ్లే ఆటో డ్రైవర్లు మాట్లాడుతూ.. గుంతలమయమైన రోడ్డుపై ప్రయాణించడం వల్ల చిన్నారులకు నడుము నొప్పులు వస్తున్నాయని ఆవేదన వ్యక్తం చేస్తున్నారు.
వర్షం పడితే బురదగా, ఎండ తీవ్రతకు దుమ్ము ధూళితో ఈ రోడ్డుపై రాకపోకలు సాగించడం దుర్భరంగా మారిందని స్థానికులు మండిపడుతున్నారు. మోడల్ స్కూల్ రోడ్డుతో పాటు పాత ఎమ్మార్వో ఆఫీస్ నుండి లక్కారం గ్రామాలకు వెళ్లే ముఖ్య రహదారి కూడా బాగా డ్యామేజ్ అయిందని స్థానికులు తెలిపారు. ఈ రెండు కీలక రహదారుల పరిస్థితిపై విద్యార్థులు, తల్లిదండ్రులు, స్థానిక ప్రజలు తీవ్ర ఆందోళన వ్యక్తం చేస్తున్నారు. అధికారులు స్పందించి తక్షణమే మోడల్ స్కూల్ రోడ్డుతో పాటు, లక్కారం వెళ్లే రహదారికి యుద్ధ ప్రాతిపదికన మరమ్మతులు చేపట్టి తమ రవాణా కష్టాలను తీర్చాలని వాహనదారులు, ప్రజలు విజ్ఞప్తి చేస్తున్నారు.
