Janasena | మణికొండలో పార్టీ నూతన కార్యాలయం

గ్రేటర్ హైదరాబాద్ ఎన్నికల్లో పోటీ చేయనున్న జనసేన
సంస్థాగత బలోపేతానికి పవన్ కల్యాణ్ వ్యూహం

Janasena | హైదరాబాద్, ఆంధ్రప్రభ వెబ్‌డెస్క్ : తెలంగాణ రాజకీయాల్లో తన పార్టీ ఉనికిని మరింత బలోపేతం చేసేందుకు జనసేన పార్టీ అధినేత, ఏపీ ఉప ముఖ్యమంత్రి ప‌వ‌న్ క‌ల్యాన్ (Pawan Kalyan) కీలక అడుగులు వేస్తున్నారు. హైదరాబాద్‌లోని మణికొండలో నూతనంగా నిర్మించిన జనసేన తెలంగాణ రాష్ట్ర కార్యాలయాన్ని ఆయన శుక్రవారం పూజా కార్యక్రమాల మధ్య ఘనంగా ప్రారంభించనున్నారు. తెలంగాణలో పార్టీ విస్తరణ, కార్యకర్తల సమన్వయం, సంస్థాగత నిర్మాణం బలోపేతం చేయడమే ఈ కార్యాలయం ఏర్పాటు వెనుక ప్రధాన ఉద్దేశ్యంగా పార్టీ వర్గాలు చెబుతున్నాయి.

తెలంగాణలో విస్తరణకు కార్యాచరణ
ఇటీవలి కాలంలో తెలంగాణ రాజకీయాలపై జనసేన ప్రత్యేక దృష్టి సారిస్తోంది. రాష్ట్రవ్యాప్తంగా పార్టీ నిర్మాణాన్ని బలోపేతం చేయడంతో పాటు యువత, ఉద్యోగులు, వివిధ సామాజిక వర్గాలను ఆకర్షించే కార్యక్రమాలను చేపట్టేందుకు కార్యాచరణ రూపొందిస్తోంది. ఈ నేపథ్యంలో మణికొండలో ఆధునిక సదుపాయాలతో రాష్ట్ర కార్యాలయాన్ని ఏర్పాటు చేయడం ప్రాధాన్యత సంతరించుకుంది.

జీహెచ్‌ఎంసీ ఎన్నికలే లక్ష్యం
రాబోయే గ్రేట‌ర్ హైద‌రాబాద్ మున్సిప‌ల్ కార్పొరేష‌న్ (Greater Hyderabad Municipal Corporation Elections) ఎన్నికలను దృష్టిలో పెట్టుకుని జనసేన వ్యూహాత్మకంగా ముందుకు సాగుతోంది. హైదరాబాద్ నగర పరిధిలో పార్టీ కార్యకలాపాలను విస్తరించడం, స్థానిక నాయకత్వాన్ని బలోపేతం చేయడం, ప్రజా సమస్యలపై ఉద్యమాలు నిర్వహించడం ద్వారా పట్టణ ఓటర్లలో గుర్తింపు పెంచుకోవాలని లక్ష్యంగా పెట్టుకుంది. ఎన్నికల్లో పోటీ చేసే దిశగా ఇప్పటికే పార్టీ శ్రేణులు సన్నాహాలు ప్రారంభించినట్లు సమాచారం.

పార్టీ నేతలతో కీలక సమావేశం
కార్యాలయ ప్రారంభోత్సవం అనంతరం తెలంగాణకు చెందిన ముఖ్య నేతలు, నియోజకవర్గ ఇన్‌చార్జీలు, కార్యకర్తలతో పవన్ కల్యాణ్ సమావేశమయ్యే అవకాశం ఉంది. పార్టీ విస్తరణ, సభ్యత్వ నమోదు కార్యక్రమాలు, భవిష్యత్ రాజకీయ కార్యాచరణపై ఆయన మార్గదర్శకాలు ఇవ్వనున్నట్లు తెలుస్తోంది.

తెలంగాణ రాజకీయాల్లో జనసేనకు కొత్త ఊపు
మణికొండలో నూతన రాష్ట్ర కార్యాలయం ప్రారంభం తెలంగాణలో జనసేన కార్యకలాపాలకు కొత్త ఊపు తీసుకురానుందని పార్టీ నాయకులు భావిస్తున్నారు. రాష్ట్రంలో పార్టీని క్రమంగా విస్తరించి, భవిష్యత్ ఎన్నికల్లో ప్రభావవంతమైన రాజకీయ శక్తిగా నిలబెట్టడమే జనసేన లక్ష్యంగా కనిపిస్తోంది.