వైభవంగా సమ్మక్క-సారలమ్మ జాతర మహోత్సవాలు
వైభవంగా సమ్మక్క-సారలమ్మ జాతర మహోత్సవాలు
ములకలపల్లి, ఆంధ్రప్రభ: ములకలపల్లి మండల పరిధిలోని వీకే రామవరం గ్రామంలో వెలసిన సమ్మక్క-సారలమ్మ, మహాలక్ష్మి తల్లి జాతర మహోత్సవాలు గురువారం అత్యంత వైభవంగా ముగిశాయి. గత ఐదు సంవత్సరాలుగా ఆదివాసీ సాంప్రదాయం ప్రకారం నిర్వహిస్తున్న ఈ వేడుకలకు భక్తులు భారీ సంఖ్యలో తరలివచ్చారు. ఉదయం 9.30 గంటలకు చిలకలగుట్ట నుండి కంకవనం తెచ్చే కార్యక్రమం భక్తిశ్రద్ధలతో సాగింది. అనంతరం అమ్మవార్లను గద్దెపై ప్రతిష్టించారు. భక్తులు పెద్ద సంఖ్యలో తరలివచ్చి మొక్కులు చెల్లించుకున్నారు.
అట్టహాసంగా అన్నదానం…
మధ్యాహ్నం 12.30 గంటల నుండి జాతరకు విచ్చేసిన భక్తుల కోసం భారీగా అన్నదాన కార్యక్రమం నిర్వహించారు. ఈ కార్యక్రమంలో గ్రామస్తులతో పాటు పరిసర ప్రాంతాల నుండి వచ్చిన భక్తులు అమ్మవారి ప్రసాదాన్ని స్వీకరించారు. ఈ ఉత్సవాలను గురువులు గుంజె భవాని, దేవరబాల తాటి ఈశ్వరమ్మ, గద్దె పూజారి తాటి చింపెయ్య నేతృత్వంలో నిర్వహించారు. జాతర నిర్వాహకులు తాటి రవి – సరోజిని, కమిటీ సభ్యులు సోడె స్వరాజ్ శాంతిప్రియ, ఊకే ఈశ్వరి, మడకం సాయి, సున్నం వెంకటేశ్వర్లు తదితరులు కార్యక్రమాన్ని పర్యవేక్షించారు.
