ysr jayanthi| వైఎస్సార్ సేవలు చిరస్మరణీయం

ysr jayanthi| వైఎస్సార్ సేవలు చిరస్మరణీయం

డిప్యూటీ సీఎం భట్టి విక్రమార్క

వైఎస్సార్ 77వ జయంతి సందర్భంగా పంజాగుట్టలో విగ్రహానికి ఘన నివాళులు
ఆరోగ్యశ్రీ నుంచి రైతులకు ఉచిత విద్యుత్ వరకు సంక్షేమ పథకాలే ఆయన చిరస్మరణీయ వారసత్వమన్న భట్టి
ప్రజల సమస్యలే పాలనకు కేంద్రబిందువుగా మార్చిన నాయకుడు వైఎస్సార్ అని ప్రశంస

ఆంధ్ర‌ప్ర‌భ వెబ్‌డెస్క్ :దివంగత మాజీ ముఖ్యమంత్రి డాక్టర్ వైఎస్ రాజశేఖరరెడ్డి ప్రజల గుండెల్లో చిరస్థాయిగా నిలిచిన మహానేత అని తెలంగాణ ఉప ముఖ్యమంత్రి మల్లు భట్టి విక్రమార్క అన్నారు. వైఎస్సార్ 77వ జయంతి సందర్భంగా హైదరాబాద్‌లోని పంజాగుట్ట సిటీ సెంటర్ వద్ద ఉన్న వైఎస్సార్ విగ్రహానికి పూలమాల వేసి నివాళులర్పించిన ఆయన, అనంతరం నిర్వహించిన జయంతి వేడుకల్లో పాల్గొని కేక్ కట్ చేశారు.

వైఎస్సార్ 77వ జయంతి సందర్భంగా పంజాగుట్ట సిటీ సెంటర్‌లో ఘనంగా నిర్వహించిన కార్యక్రమంలో డిప్యూటీ సీఎం భట్టి విక్రమార్క పాల్గొన్నారు. వైఎస్సార్ విగ్రహానికి పూలమాలలు సమర్పించి నివాళులర్పించిన అనంతరం ఆయన మాట్లాడుతూ, డాక్టర్ వైఎస్ రాజశేఖరరెడ్డి అమలు చేసిన సంక్షేమ కార్యక్రమాలు నేటికీ దేశానికి ఆదర్శంగా నిలిచాయని అన్నారు.

పేదల సంక్షేమాన్ని ప్రభుత్వ పాలనలో ప్రధాన లక్ష్యంగా మార్చిన నాయకుడు వైఎస్సార్ అని కొనియాడిన భట్టి, ప్రజల సమస్యలను ప్రత్యక్షంగా తెలుసుకునేందుకు చేపట్టిన చారిత్రాత్మక పాదయాత్రే ఆయనను నిజమైన ప్రజానేతగా నిలబెట్టిందని పేర్కొన్నారు. సామాన్యులతో మమేకమై వారి అవసరాలను అర్థం చేసుకుని, వాటికి అనుగుణంగా సంక్షేమ విధానాలను రూపొందించిన నాయకుడిగా వైఎస్సార్ చరిత్రలో చిరస్థాయిగా నిలిచిపోయారని చెప్పారు.

ఆరోగ్యశ్రీ, 108 అత్యవసర అంబులెన్స్ సేవలు, ఇందిరమ్మ గృహాలు, సామాజిక భద్రతా పెన్షన్లు, విద్యార్థులకు ఫీజు రీయింబర్స్‌మెంట్, రైతులకు ఉచిత విద్యుత్, మహిళలకు పావలా వడ్డీ రుణాలు వంటి పథకాల ద్వారా లక్షలాది పేద కుటుంబాలకు ఆయన అండగా నిలిచారని గుర్తు చేశారు.

ముఖ్యమంత్రిగా ప్రమాణ స్వీకారం చేసిన వెంటనే రైతులకు ఉచిత విద్యుత్ అమలు ఫైలుపై తొలి సంతకం చేయడం రైతుల పట్ల వైఎస్సార్‌కు ఉన్న అంకితభావానికి నిదర్శనమని భట్టి విక్రమార్క పేర్కొన్నారు. రైతులు, పేదలు, బలహీన వర్గాల సంక్షేమమే ఆయన పాలనకు కేంద్రబిందువని అన్నారు. డాక్టర్ వైఎస్సార్ జీవితం, ప్రజాసేవ పట్ల ఆయన నిబద్ధత, సంక్షేమ దృక్పథం నేటి తరానికి స్ఫూర్తిదాయకమని భట్టి అన్నారు.

ఈ కార్యక్రమంలో మంత్రి దుద్దిళ్ల శ్రీధర్ బాబు, ప్రభుత్వ సలహాదారు మహ్మద్ అలీ షబ్బీర్, రాష్ట్ర ప్రణాళిక సంఘం ఉపాధ్యక్షుడు జి. చిన్నారెడ్డి, ఎమ్మెల్యే దానం నాగేందర్, మాజీ ఎంపీ కె.వి.పి. రామచంద్రరావుతో పాటు పలువురు ప్రజాప్రతినిధులు, కాంగ్రెస్ నాయకులు పాల్గొన్నారు.