బ్రెయిన్ ట్యూమర్‌పై అప్రమత్తతే ప్రాణరక్షణ

ప్రారంభ దశలో గుర్తిస్తే చికిత్స ఫలితాలు మెరుగ్గా ఉంటాయి

వరల్డ్ బ్రెయిన్ ట్యూమర్ డే సందర్భంగా మెడికవర్ హాస్పిటల్స్‌లో అవగాహన కార్యక్రమం

కర్నూలు, ఆంధ్రప్రభ : బ్రెయిన్ ట్యూమర్ లక్షణాలను నిర్లక్ష్యం చేయకుండా ప్రారంభ దశలోనే గుర్తించి చికిత్స పొందితే మెరుగైన ఫలితాలు సాధ్యమవుతాయని న్యూరోసర్జన్ డా. విశ్వ కుమార్ కె.ఎస్ తెలిపారు. ప్రపంచ బ్రెయిన్ ట్యూమర్ దినోత్సవం సందర్భంగా సోమవారం కర్నూలులోని మెడికవర్ హాస్పిటల్స్‌లో ప్రత్యేక అవగాహన కార్యక్రమం నిర్వహించారు.

ఈ ఏడాది ప్రపంచ బ్రెయిన్ ట్యూమర్ దినోత్సవాన్ని “A Closer Look” అనే అంశంతో నిర్వహిస్తున్నట్లు వైద్యులు తెలిపారు. బ్రెయిన్ ట్యూమర్ బాధితులు ఎదుర్కొంటున్న సవాళ్లను సమాజం మరింత దగ్గరగా అర్థం చేసుకోవడం, వ్యాధిని ప్రారంభ దశలో గుర్తించడం, సమయానికి చికిత్స అందించడంపై అవగాహన కల్పించడమే ఈ థీమ్ ప్రధాన ఉద్దేశమని పేర్కొన్నారు.

ఈ సందర్భంగా డా. విశ్వ కుమార్ మాట్లాడుతూ, మెదడులో అసాధారణ కణాల పెరుగుదల వల్ల బ్రెయిన్ ట్యూమర్ ఏర్పడుతుందని వివరించారు. తరచూ తీవ్రమైన తలనొప్పి, వాంతులు, చూపు మందగించడం, చేతులు లేదా కాళ్లలో బలహీనత, మూర్ఛలు వంటి లక్షణాలు కనిపిస్తే నిర్లక్ష్యం చేయకుండా వెంటనే నిపుణులైన వైద్యులను సంప్రదించాలని సూచించారు.

ఆధునిక న్యూరో ఇమేజింగ్ సాంకేతికతలు, అత్యాధునిక న్యూరోసర్జరీ విధానాలు అందుబాటులోకి రావడంతో ప్రస్తుతం బ్రెయిన్ ట్యూమర్లను సమర్థవంతంగా గుర్తించి చికిత్స చేయడం సాధ్యమవుతోందని తెలిపారు. వ్యాధిని ప్రారంభ దశలోనే గుర్తించడం ద్వారా శస్త్రచికిత్స, ఇతర చికిత్సా విధానాలు మరింత ఫలప్రదంగా ఉంటాయని చెప్పారు.

కార్యక్రమంలో పాల్గొన్న ప్రజలు బ్రెయిన్ ట్యూమర్లకు సంబంధించిన పలు సందేహాలను వైద్యులను అడిగి నివృత్తి చేసుకున్నారు. వ్యాధి లక్షణాలు, నిర్ధారణ పరీక్షలు, చికిత్సా విధానాలు, కోలుకునే అవకాశాలపై వైద్యులు సమగ్ర అవగాహన కల్పించారు.

మెడికవర్ హాస్పిటల్స్ కర్నూలు హెడ్ మహేశ్వర్ రెడ్డి మాట్లాడుతూ, బ్రెయిన్ ట్యూమర్లపై ప్రజల్లో సరైన అవగాహన పెరగడం అత్యంత అవసరమన్నారు. ప్రారంభ లక్షణాలను గుర్తించి సమయానికి వైద్యులను సంప్రదించడం ద్వారా ప్రాణాపాయ పరిస్థితులను నివారించడంతో పాటు మెరుగైన చికిత్స పొందే అవకాశం ఉంటుందని తెలిపారు.

ప్రజల ఆరోగ్య సంరక్షణే లక్ష్యంగా మెడికవర్ హాస్పిటల్స్ నిరంతరం ఆరోగ్య అవగాహన కార్యక్రమాలను నిర్వహిస్తూ వైద్య సేవలను మరింత చేరువ చేస్తోందని ఆయన పేర్కొన్నారు.

బ్రెయిన్ ట్యూమర్ ముఖ్య లక్షణాలు

• తరచూ లేదా తీవ్రమైన తలనొప్పి
• వాంతులు, వికారం
• చూపు మందగించడం లేదా రెండుగా కనిపించడం
• చేతులు, కాళ్లలో బలహీనత
• మూర్ఛలు రావడం
• జ్ఞాపకశక్తి, ప్రవర్తనలో మార్పులు

ఈ లక్షణాలు కనిపిస్తే వెంటనే న్యూరో వైద్యులను సంప్రదించాలని నిపుణులు సూచిస్తున్నారు.