న్యాయవాది హత్య దారుణం…
న్యాయవాది హత్య దారుణం…
హైదరాబాద్ ఘటనపై కాంగ్రెస్ నాయకుడు ఆశ్రీఫ్ ఆగ్రహం
న్యాయవాదుల భద్రతపై ప్రభుత్వం దృష్టి పెట్టాలని డిమాండ్
వక్ఫ్ ఆస్తుల వివాద కోణంలో సమగ్ర దర్యాప్తు కోరిన ఆశ్రీఫ్
కుట్ర వెనుక ఉన్న వారిని వెంటనే అరెస్టు చేయాలన్న విజ్ఞప్తి
ఖాజా మొహిజుద్దీన్ కుటుంబానికి రక్షణ, ఆర్థిక సాయం అందించాలని డిమాండ్
ఖమ్మం, ఆంధ్రప్రభ : హైదరాబాద్లో ప్రముఖ న్యాయవాది ఖాజా మొహిజుద్దీన్ను దారుణంగా హత్య చేయడాన్ని ఖమ్మం జిల్లా కాంగ్రెస్ నాయకుడు ఆశ్రీఫ్ తీవ్రంగా ఖండించారు. ఆదివారం ఖమ్మం నగరంలో ఏర్పాటు చేసిన విలేకరుల సమావేశంలో ఆయన మాట్లాడుతూ, న్యాయవ్యవస్థను కాపాడాల్సిన వ్యక్తులపై ఇలాంటి దాడులు జరగడం ఆందోళనకరమన్నారు. నంబర్ప్లేట్ లేని కారుతో ఢీకొట్టి హత్య చేయడం రాష్ట్రంలో శాంతిభద్రతల పరిస్థితికి నిదర్శనమని విమర్శించారు. న్యాయవాదుల భద్రతపై ప్రభుత్వం ప్రత్యేక చర్యలు తీసుకోవాలని డిమాండ్ చేశారు.
వక్ఫ్ ఆస్తుల వివాదాల నేపథ్యంలో ఈ హత్య జరిగిందన్న ఆరోపణలను పోలీసులు సీరియస్గా తీసుకోవాలని ఆశ్రీఫ్ పేర్కొన్నారు. గతంలోనే బెదిరింపులు వచ్చినట్టు కుటుంబ సభ్యులు చెబుతున్నప్పటికీ తగిన రక్షణ కల్పించకపోవడం బాధాకరమన్నారు. ఘటనపై ప్రత్యేక దర్యాప్తు బృందాన్ని ఏర్పాటు చేసి కుట్ర వెనుక ఉన్న వారందరినీ గుర్తించాలని కోరారు. నిందితులను వెంటనే అరెస్టు చేసి కఠినంగా శిక్షించాలని ప్రభుత్వాన్ని డిమాండ్ చేశారు.
ఖాజా మొహిజుద్దీన్ కుటుంబానికి ప్రభుత్వం పూర్తి రక్షణ కల్పించడంతో పాటు ఆర్థిక సహాయం అందించాలని ఆశ్రీఫ్ కోరారు. న్యాయవాదులపై దాడులు ప్రజాస్వామ్య వ్యవస్థకు ముప్పుగా మారుతున్నాయని ఆందోళన వ్యక్తం చేశారు. రాష్ట్రవ్యాప్తంగా న్యాయవాద సంఘాలు ఈ ఘటనపై ఆగ్రహం వ్యక్తం చేస్తున్నాయని తెలిపారు. హత్య కేసును ఫాస్ట్ట్రాక్ కోర్టులో విచారించి త్వరితగతిన న్యాయం చేయాలని డిమాండ్ చేశారు.
